பரங்கிப்பேட்டை தகவல் களஞ்சியம்

சனி, 30 ஏப்ரல், 2011 1 கருத்துரைகள்!

பரங்கிப்பேட்டை: பரங்கிப்பேட்டை நகர ஜமாஅத்துல் உலமா பேரவை சார்பில் கோடைக்கால நல்லொழுக்க (தீனிய்யாத்) பயிற்சி வகுப்புகள் நடைபெற்றுவருகிறது. ஏழாவது ஆண்டாக தொடர்ந்து நடைபெற்று வரும் இப்பயிற்சி பயிலரங்கத்தில் பள்ளி மாண-மாணவியர்கள் பலர் கலந்துக்கொண்டு பயன்பெற்றனர்.

கடந்த 16-ந்தேதி துவங்கிய இப்பயிற்சி வகுப்புகள் இன்றுடன் முடிவடைகிறது. கௌஸ் பள்ளி வாசலில் நடைபெற்று வரும் இப்பயிற்சிக்காக தேர்வுகளும் நேற்று நடைபெற்றது.
 

தேர்வில் வெற்றி பெற்ற மற்றம் கலந்துக் கொண்ட மாணவ-மாணவிகளுக்கு இன்று பரிசுகளும் வழங்ப்பட உள்ளது. இப்பயிற்சி வகுப்பில், திருக்குர்ஆனை எப்படி முறைப்படி தஜ்வீதுடன் ஓதுவது, இஸ்லாமிய கொள்ளை விளக்கம், தொழுகை, ஹதீஸ் கலை, துஆக்கள் மனனம் போன்றவை இடம்பெ;ற்றதுடன், உலமாக்களில் சொற்பொலிவுகளும் நடைபெற்றன.
மேலும் வாசிக்க>>>> "ஜமாஅத்துல் உலமாவின் 7-ம் ஆண்டு கோடைக்கால நல்லொழுக்க பயிற்சி வகுப்புகள்!"

0 கருத்துரைகள்!

தமிழ்நாடு மின்சார வாரியத்தின் பு.முட்லூர் துணை மின்நிலையத்தில் இருந்து மின்சாரம் பெறப்படும் பகுதிகளில் இது நாள் வரை பகல் 2 மணி முதல் மாலை 4 மணி வரை மின்சாரம் நிறுத்தப்பட்டு வருகிறது. நாளை (01-05-2010) முதல், நேரம் மாற்றப்பட்டு மாலை 4 மணி முதல் மாலை 6 வரை மின்சாரம் நிறுத்தப்படும் என சிதம்பரம் கோட்ட செயற்பொறியாளர் செல்வசேகர் வெளியிட்டுள்ள செய்திக்குறிப்பில் தெரிவிக்கப்பட்டுள்ளது. மேலும் நுகர்வோர்கள் மின் கட்டணத்தை கணணிமயமாக்கப்பட்ட பரங்கிப்பேட்டை தபால் நிலையத்தில் செலுத்தலாம் என்றும் இதற்கான சேவைக் கட்டணம் ரூ.5 மட்டும் கூடுதலாக செலுத்த வேண்டும் என்றும் அச்செய்திக்குறிப்பில் தெரிவிக்கப்பட்டுள்ளது.
மேலும் வாசிக்க>>>> "மின்சார வாரிய செய்திக்குறிப்பு"

0 கருத்துரைகள்!

 
பரங்கிப்பேட்டை : மீன் வியாபாரிகளுக்கு, விசைப்படகு சங்கத்தினர் பாதுகாப்பு கொடுக்க வேண்டும் என சமாதான கூட்டத்தில் தீர்மானம் நிறைவேற்றப்பட்டது. பரங்கிப்பேட்டை அன்னங்கோயில் முகத்துவாரம் பகுதியில் வெளியூர் மீன்களை வாங்க விசைப்படகு சங்கத்தினர் எதிர்ப்பு தெரிவித்ததால் மீன் வியாபாரிகளுக்கும், விசைப்படகு சங்கத்தினருக்கும் மோதல் ஏற்பட்டது. இதனால் பரங்கிப்பேட்டை கடற்கரையோர கிராமங்களில் பதட்டம் ஏற்பட்டதால் மீனவர்கள் மீன் பிடிக்கச் செல்லவில்லை. 

இதுகுறித்து சிதம்பரம் ஆர்.டி.ஓ., அலுவலகத்தில் டி.எஸ்.பி., நடராஜன், தாசில்தார் ராஜேந்திரன் முன்னிலையில் சமாதானக் கூட்டம் நடந்தது.விசைப்படகு சங்கம் சார்பில் சங்கர், சுப்ரமணியன், நாகராஜன், சீனிவாசன், ஜெகதீசன் ஆகியோரும், மீன் வியாபாரிகள் சங்கம் சார்பில் மாவட்ட மீன் வியாபாரிகள் சங்கத் தலைவர் பாலு, துணைத் தலைவர் ராமலிங்கம், அரவிந்தன், செழியன், ராஜேந்திரன் பங்கேற்றனர்.

கூட்டத்தில், வரும் மே மாதம் 6ம் தேதி வரை அந்தந்த பகுதியில் பிடிக்கும் மீன்களை அந்தந்த பகுதிகளிலும் அதன் பிறகு வழக்கம் போல் பரங்கிப்பேட்டை அன்னங்கோயிலில் விற்பனை செய்யலாம். மீன் வியாபாரிகளுக்கு, விசைப்படகு சங்கத்தினர் மற்றும் பொதுமக்கள் பாதுகாப்பு கொடுக்க வேண்டும் என தீர்மானங்கள் நிறைவேற்றப்பட்டன.
மேலும் வாசிக்க>>>> "மீன் வியாபாரிகளுக்கு பாதுகாப்பு: சமாதான கூட்டத்தில் முடிவு!"

வியாழன், 28 ஏப்ரல், 2011 0 கருத்துரைகள்!

ஹக்கா சாஹிப் தர்கா தெருவில், மர்ஹூம் அப்துல் அஜீஸ் அவர்களின் மகனாரும், அன்சாரி அவர்களின் சம்மந்தியும் ஹஸன் அலி அவர்களின் மாமனாரும், ஹுஸைன், சதாம் ஆகியோர்களின் தகப்பனாருமான "குடைக்கார பாய்" என்கிற A.ஷர்புதீன் அவர்கள் மர்ஹூம் ஆகி விட்டார்கள். இன்ஷா அல்லாஹ் இன்று மாலை 4 மணிக்கு நல்லடக்கம் ஹக்கா சாஹிப் தர்கா அடக்கஸ்தலத்தில்.

இன்னாலில்லாஹி வ இன்னா இலைஹி ராஜிவூன்
மேலும் வாசிக்க>>>> "இறப்புச் செய்தி"

0 கருத்துரைகள்!

பரங்கிப்பேட்டை: நான்கு தொகுதியில் மனுதாக்கல் செய்தது தொடர்பாக ஜெயலலிதா மீதான தேர்தல் வழக்கு பரங்கிப்பேட்டையில் 36வது முறையாக ஒத்திவைக்கப்பட்டது. கடந்த 2001ம் ஆண்டு நடந்த சட்டமன்ற தேர்தலில் அதிமுக பொதுச் செயலாளர் ஜெயலலிதா புவனகிரி, புதுக்கோட்டை உள்பட 4 தொகுதிகளில் போட்டியிட மனு தாக்கல் செய்தார். இது தவறு எனக் கூறி முன்னாள் திமுக எம்.பி குப்புசாமி சென்னை உயர்நீதிமன்றத்தில் வழக்கு தொடர்ந்தார்.

இதனை விசாரித்த உயர்நீதிமன்றம், தேர்தல் ஆணையம் நடவடிக்கை எடுக்க வேண்டும் என உத்தரவிட்டது. அதன்படி, புவனகிரி சட்டமன்ற தொகுதி தேர்தல் அதிகாரியாக செல்வமணி, கடலூர் மாவட்டம் பரங்கிப்பேட்டை நீதிமன்றத்தில் ஜெயலலிதா மீது வழக்கு தொடர்ந்தார்.

இந்த வழக்குக்கு தடை விதிக்க கோரி உச்சநீதிமன்றத்தில் ஜெயலலிதா மனு தாக்கல் செய்தார், உச்சநீதிமன்றம் தடை விதித்தது. இதனால் இந்த வழக்கு பரங்கிப்பேட்டை நீதிமன்றத்தில் பலமுறை விசாரணைக்கு வந்து ஒத்தி வைக்கப்பட்டது. 

இந்நிலையில், இந்த வழக்கு பரங்கிப்பேட்டை நீதிமன்றத்தில் நேற்று மீண்டும் விசாரணைக்கு வந்தது. நீதிபதி கோமதி, வழக்கை வரும் ஜூன் மாதம் 6ம் தேதிக்கு ஒத்தி வைத்தார். வழக்கு ஒத்திவைக்கப்படுவது இது 36வது முறையாகும்.
மேலும் வாசிக்க>>>> "ஜெயலலிதா வழக்கு: பரங்கிப்பேட்டையில் 36வது முறையாக ஒத்திவைக்கப்பட்டது"

செவ்வாய், 26 ஏப்ரல், 2011 4 கருத்துரைகள்!

பரங்கிப்பேட்டை: சிப்காட் குறித்த விழிப்புணர்வு கருத்தரங்கம் பரங்கிப்பேட்டை மினி ஷாதி மஹாலில் நடைபெற்றது. ஜி. நிஜாமுத்தீன் தலைமையில் நடைபெற்ற இக்கருத்தரங்கில், தமிழ்நாடு நுகர்வோர் கூட்டமைப்பின் பொதுச் செயலர் எம்.நிஜாமுத்தீன், ஆலோசகர் பால்கி (எ) பாலகிருஷ்ணன், சிப்காட் சுற்றுசூழல் கண்காணிப்பு குழு ஒருங்கிணைப்பாளர் அருள் மற்றும் ஒருங்கிணைப்பு குழு உறுப்பினர்கள் இதில் பங்கேற்றனர்.

கடலூர் சிப்காட் தொழிற்சாலைகளால் ஏற்படும் காற்று மாசு, எத்தனை நடவடிக்கைகளுக்குப் பிறகும் தொடர்கதையாகி இருக்கும் இன்றைய முக்கியமாக சூழலில் இந்த விழிப்புர்வு கருத்தரங்கம் முக்கியத்துவம் வாய்ந்ததாக அமைந்தது.

கடந்த ஜூன் மற்றும் ஆகஸ்ட் மாதங்களில் சிப்காட் தொழிற்பேட்டையில் சேகரிக்கப்பட்ட காற்றுமாசு, பாதுகாப்பான பைகளில் அடைக்கப்பட்டு, அமெரிக்க நாட்டின் தரம் வாய்ந்த 6 ரசாயனக் கூடங்களில் ஒன்றான கொலம்பியா ஆய்வுக் கூடத்தில் ஆய்வு செய்யப்பட்டது. ஆய்வின் முடிவுகளை தமிழ்நாடு நுகர்வோர் கூட்டமைப்பின் பொதுச் செயலர் எம்.நிஜாமுதீன் இந்த நிகழ்ச்சியில் விவரித்தார்.

கடலூர் காற்று மண்டலத்தில் புற்று நோயை உருவாக்கும் மோசமான ரசாயனங்கள் 2 ஆயிரம் மடங்கு இருப்பதாக சமூக சுற்றுச்சூழல் கண்காணிப்பகம் அறிவித்தது. எனினும் இந்த நிலைய முழுமையாக மாற்றி அமைக்க மாசுக் கட்டுப்பாடு வாரியம் எடுத்து வரும் நடவடிக்கைகள் போதாது என்பது பொதுநல அமைப்புகளின் கருத்து. இந்த நிலையில் சமூக சுற்றுச்சூழல் கண்காணிப்பகம் இந்த 3 அறிக்கைகளை வெளியிட்டு உள்ளது. இப்போதும் சிப்காட் தொழிற்சாலைகள் பகுதி காற்று மண்டலத்தில் 6 வேதிப் பொருள்கள் உள்ளிட்ட 19 நச்சு வேதிப் பொருள்கள் இருப்பதை அந்த அறிக்கைகள்  உறுதிப்படுத்தி உள்ளன.
 
இதற்கிடையே சிப்காட் மற்றும் அதைச் சுற்றிய பகுதிகளில் 6 புதிய தொழிற்சாலைகளின் கட்டுமானங்கள் பல்வேறு நிலைகளில் உள்ளன. 6 மில்லியன் டன் எண்ணெய் சுத்திகரிப்பு ஆலை, கப்பல் கட்டும்தளம், 13,320 மெகா வாடா திறன்கொண்ட 3 அனல் மின் நிலையங்கள் தொடங்குவதற்கான வேலைகள் நடந்து வருகின்றன. இப்புதிய திட்டங்கள் சுற்றுச்சூழலை மேலும் மோசமாக்கும் என்றார் நிஜாமுதீன்.
அடுத்து பேசிய சிப்காட் சுற்றுசூழல் கண்காணிப்பு குழு ஒருங்கிணைப்பாளர் அருள், ' இந்தியாவில் மாங்குரோவ் காடுகள் அதிகம் உள்ள பரங்கிப்பேட்டைக்கு அருகில் இருக்கும் பிச்சாவரத்தில், சிப்காட் சுற்றுச்சூழல் பாதிப்பால் மாங்குரோவ் காடுகள் அழிந்து வருகின்றன. இந்நிலையில் சுற்றுச்சூழல் சட்டங்களுக்கு எதிராக மாங்குரோவ் காடுகளுக்கு அருகே 10 ஆயிரம் மெகாவாட் உற்பத்தித் திறன்கொண்ட அனல் மின் நிலையங்களுக்கு அரசு அனுமதி அளித்துள்ளது. இந்தியாவில் வாழத் தகுதியற்ற நகரங்கள் பட்டியலில் கடலூர் 16-வது இடத்தில் இருப்பதாக இந்திய சுற்றுச்சூழல் மற்றும் வனத்துறை அறிவித்துள்ளது. கடலூர், நாகை மாவட்டங்களில் 250 ச.கி.மீ. பரப்பளவில் எண்ணெய் சுத்திகரிப்பு ஆலை அமைய இருப்பதாகவும் அறிவிப்பு வெளியாகி உள்ளது. கடலூர் மாவட்டக் கடலோரப் பகுதிகளில் மேலும் ரசாயன ஆலைகளையும், அனல்மின் நிலையங்களையும் எண்ணெய் சுத்திகரிப்பு ஆலைகளையும் நிறுவதற்காக அரசின் இணையதளங்களில் கார்பரேட் முதாலாலிகளுக்கு அழைப்பு விடுக்கிறது' என்று பேசினார்.
தமிழ்நாடு நுகர்வோர் கூட்டமைப்பின் ஆலோசகர் பால்கி (எ) பாலகிருஷ்ணன் பேசுகையில்,  'கடலூர் மாவட்டத்திலுள்ள சிப்காட் வளாகத்தில் பெருமளவில் காற்று மாசு நிறைந்து இருக்கிறது. அழுகிய முட்டையின் நாற்றம், ரப்பர் எரிக்கும் போது வரும் மணம், அழுகிய உடம்பின் நாற்றம், நெயில் பாலிஷ் வாசனை என மாசுபட்ட காற்றிலிருந்து ஏராளமான சாம்பிள்கள் எடுத்திருக்கிறோம். அத்தனையும் சிப்காட்டிலுள்ள ஒவ்வொரு கம்பெனியும் வெளிவிடும் மாசுக்கள்.  இந்தப் பகுதியில் வசிப்பவர்களுக்கு தொடர்ந்து சளி, ஆஸ்துமா என சுவாசம் தொடர்பான பாதிப்புகள் அதிகம். பெண்கள் வயதுக்கு வருவது தள்ளிப்போவது முதல், மாதவிடாய் காலத்தில் அதிக ரத்தப்போக்கு,  கருச்சிதைவு, குழந்தையின்மை என்று அவர்களின் வாழ்க்கையில் கோர விளையாட்டை ஆடிக்கொண்டிருக்கின்றன என்று ஆபத்தை அடுத்த தலைமுறைக்கு விதைத்துக் கொண்டிருக்கும் இவற்றின் ஹிட் லிஸ்ட் நீண்டுகொண்டே இருக்கிறது'  என்று குறிப்பிட்டார்.

நிகழ்ச்சி ஏற்பாட்டாளர் ஜி. நிஜாமுதீன் நன்றி தெரிவித்து பேசும்போது, ஒரு இறைநம்பிக்கையாளர் தெருவில் பிறருக்கு இடையூறாக இருக்கும் சிறிய கல்லை அப்புறப்படுத்துவதில் ஒழுங்கை கற்றுத்தரும் இஸ்லமிய நம்பிக்கைபடி பார்க்கும்போது, சிப்காட்டினால் விளையும் இது போன்ற கொடூரமான சுகாதரக்கேடுகளுக்கு எதிராக போரடவேண்டியது அவசியம் என்று சொன்னதுடன், 'கேன்சர் மற்றும் தோல், ஆஸ்தமா நோய்கள் வெளியில் செல்லும் ஆண்களைவிட இல்லங்களில் தங்கியிருக்கும் பெண்கள், மூத்தகுடிமகன்கள் மற்றம் சிறு குழந்தைகளை அதிகம் பாதிக்கிறது' என்று பால்கி கூறியதை நினைவு கூர்ந்தார்.

ஒரு அதிமுக்கியத்துவம் வாய்ந்த இந்த கருத்தரங்கம், ஒரு நல்ல துவக்கம் என்றாலும், முறையாக விளம்பரப்படுத்தாதினாலும் அனைவருக்கும் அழைப்பு எட்டாமல் போனதினாலும் சில-பலருடைய ஆதங்கமும் வெளிப்படுத்தப்பட்டது.
மேலும் வாசிக்க>>>> "சிப்காட் தொழிற்சாலைகள் குறித்த விழிப்புணர்வு கருத்தரங்கம்!"

3 கருத்துரைகள்!

பரங்கிப்பேட்டை: பரங்கிப்பேட்டை இஸ்லாமிய நல் வாழ்வு சங்கம், சிங்கை நிதியுதவி மற்றும் ஆலோசனை கொண்டு பெறப்பட்ட இரத்த அழுத்த பரிசோதனை கருவி மற்றும் இரத்த சர்க்கரையளவு காணும் கருவி இவைகளை பரங்கிப்பேட்டை பொது மக்களின் மருத்துவத்திற்காக இஸ்லாமிய ஐக்கிய ஜமாஅத்தால் நியமிக்கப்பட்டு கடந்த மாதம் முதல் பணியிலிருக்கும் செவிலியர் ஒருவரிடம் ஒப்படைக்கப்பட்டு அவைகளை பயன்பாட்டுக்கு கொண்டுவரப்பட்டுள்ளது.

நோயாளிகளின் வீடுகளுக்கே சென்று தேவையானவர்களுக்கு ஊசி போடுதல், இரத்த அழுத்தம், இரத்தப்பரிசோதனை, சர்க்கரை அளவு கண்டறிதல் போன்ற மருத்துவ சேவைகள் நமதூர் மக்களின் பெரு வரவேற்பை பெற்றுள்ள சூழ்நிலையில், இப்பணி அனைத்தும் இலவசமாகவே செய்யப்படுகின்றன. சர்க்கரை அளவு காணுவதற்கு மட்டும் 40 ரூபாய் கட்டணம் பெறப்படுகிறது.

இது குறித்து செய்தி வெளியிட்டுள்ள இஸ்லாமிய ஐக்கிய ஜமஅhத், இம்மருத்துவ சேவைகளை சமுதாய மக்களின் நலனை கருத்தில் கொண்டு சங்க நிதி மூலம் சிறப்பாக செய்ய உதவி புரிந்த பரங்கிப்பேட்டை இஸ்லாமிய நல் வாழ்வு சங்கம்-சிங்கை தலைவர் மற்றும் நிர்வாகிகளுக்கு பரங்கிப்பேட்டை பொதுமக்களின் சார்பில் நன்றியினையும், மனமார்ந்த பிரார்த்தனைகளை இறைவன் முன் சமர்ப்பிப்பதாக தெரிவித்துள்ளது.
மேலும் வாசிக்க>>>> "வீடு தேடி வரும் மருத்துவ உதவிகள்: சிங்கை நல்வாழ்வு சங்கத்துடன் இணைந்து ஜமாஅத் உதவிக்கரம்!"

0 கருத்துரைகள்!

பரங்கிப்பேட்டை: சிதம்பரம் அருகே, வெளியூர் மீனவர்கள் பிடித்து வரும் மீன்களை வாங்க எதிர்ப்பு தெரிவித்ததால், மீனவர்களுக்கிடையே ஏற்பட்ட மோதலில், 6 மினி வேன்கள் அடித்து நொறுக்கப்பட்டன. பதட்டத்தால் போலீசார் குவிக்கப்பட்டுள்ளனர்.

கடலூர் மற்றும் பரங்கிப்பேட்டை கடற்கரை கிராமங்களைச் சேர்ந்த மீனவர்கள், கடலில் பிடித்து வரும் மீன்களை சிதம்பரம் அருகே பரங்கிப்பேட்டை அன்னங்கோவில் முகத்துவாரம் பகுதிக்கு கொண்டு வந்து விற்பனை செய்வது வழக்கம். பரங்கிப்பேட்டை விசைப்படகு சங்கத்தினர், மீன்பிடி தடைக்காலம் முழுவதும் உள்ளூர் மீனவர்கள் பிடித்து வரும் மீன்களை மட்டும் வாங்க வேண்டும். வெளியூர் மீனவர்களின் மீன்களை வாங்கக் கூடாது என எதிர்ப்பு தெரிவித்தனர்.
 
நேற்று காலை கடலூர் ராசாப்பேட்டை, சொத்திக்குப்பம் கிராமத்தைச் சேர்ந்த 200க்கும் மேற்பட்டோர், அன்னங்கோவில் கடற்கரையோரம் நிறுத்தி வைத்திருந்த படகுகளை எடுத்துக் கொண்டு மீன் பிடிக்கச் சென்றனர். இதை எதிர்த்து, ஒன்பது கிராமங்களைச் சேர்ந்த 1,000 பேர், ஆறு மினி வேன்களை அடித்து நொறுக்கி, மீன் நிறுவனங்களில் இருந்த பொருட்களை சேதப்படுத்தினர். கடலில் சென்ற மீனவர்கள், இத்தகவலைக் கேட்டதும், கரைக்கு வந்து, அன்னங்கோவில் விசைப்படகு சங்கத்தைச் சேர்ந்தவர்களைத் தாக்கினர்.

photos: TNTJ-PNO


 


மேலும் வாசிக்க>>>> "பரங்கிப்பேட்டை மீனவ கிராமங்களுக்கிடையே மோதல்!"

வெள்ளி, 22 ஏப்ரல், 2011 0 கருத்துரைகள்!


தமிழகத்தில் தற்போது மீன்பிடி தடைக்காலம் என்பதால் மீனவர்கள் கடலுக்குள் லாஞ்சில் சென்று மீன் பிடிப்பது நிறுத்தப்பட்டுள்ளது. ஆனால் சிறிய படகில் மீனவர்கள் கடலோரம் மீன்களை பிடிப்பது வழக்கம்.இந்நிலையில் வியாழக்கிழமை பரங்கிப்பேட்டையில் உள்ள அண்ணாமலைப் பல்கலைக்கழக கடல்வாழ் உயிரின உயராய்வு மையம் அருகே உள்ள பகுதியில் மத்திமீன் வருகை அதிமாகி தென்பட்டதால் மீனவர்கள் படகில் சென்று பிடித்தனர். அப்பகுதி மீனவர்கள் ஒரு படகில் சுமார் 3 முதல் 4 டன் வரை மத்திமீன்களை பிடித்தனர்.

இந்த மத்திமீன் ஒரு டன் ரூ.8 ஆயிரத்துக்கு விற்பனை செய்யப்படுகிறது. குறிப்பாக, இந்த மீன்கள் கேரளத்துக்கு அனுப்பப்படுகிறது. இவையல்லாமல் இப்பகுதியில் உள்ள மீனவர்கள் தீவனத்துக்காக இந்த மத்திமீனை வாங்கி காயவைத்து உலர்த்தி வைத்துள்ளனர். வானிலை மற்றும் சுற்றுச்சூழல் மாற்றம் காரணமாக இந்த மத்திமீன்கள் பரங்கிப்பேட்டை பகுதிக்கு படையெடுத்திருக்கலாம் என கடல்வாழ் உயிரின உயராய்வு மைய உதவிப் பேராசிரியர் டி.டி.அஜீத்குமார் தெரிவித்தாக தினமணி நாளேடு செய்தி வெளியிட்டுள்ளது.
படம்: மாடல்

மேலும் வாசிக்க>>>> "பரங்கிப்பேட்டை கடல் பகுதியில் மத்திமீன் அதிகரிப்பு"

0 கருத்துரைகள்!


பரங்கிப்பேட்டை கீரைக்காரத் தெருவைச் சேர்ந்த சங்கரின் மகன் ராம்குமார் (18). இவர் அப்பகுதியில் உள்ள நண்பர்களுடன் கிரிக்கெட் விளையாடிய போது கடந்த ஏப்ரல் 15-ம் தேதி கீழே விழுந்ததில் ராம்குமாருக்கு தலையில் பலத்த காயம் ஏற்பட்டது. உடனடியாக அவர் புதுச்சேரி ஜிப்மர் மருத்துவமனையில் சிகிச்சைக்காக சேர்க்கப்பட்டார். பின்னர் மேல் சிகிச்சைக்காக சென்னை தனியார் மருத்துவமனையில் சேர்க்கப்பட்டு சிகிச்சை பெற்று வந்த ராம்குமார் புதன்கிழமை இறந்தார். இதுகுறித்து பரங்கிப்பேட்டை போலீஸார் வழக்குப் பதிந்து விசாரணை மேற்கொண்டுள்ளனர் என்று தினமணி நாளேடு செய்தி வெளியிட்டுள்ளது.
மேலும் வாசிக்க>>>> "கிரிக்கெட் விளையாடிய போது தலையில் அடிபட்டு மாணவர் சாவு"

திங்கள், 18 ஏப்ரல், 2011 4 கருத்துரைகள்!

பரங்கிப்பேட்டை: வாத்தியாப்பள்ளி கைப்பந்து அணி மற்றும் பெரியதெரு இளைஞர்கள் சேர்ந்து நடத்திய மாநில அளிவிளான கைப்பந்து போட்டிகள் கடந்த இரண்டு தினங்களாக பரங்கிப்பேட்டை ராலி தோட்டத்தில் நடைபெற்று வந்தது. பகல்-இரவு ஆட்டங்களாக நடைபெற்று வந்த இப்போட்டிகளில் தமிழ்நாடு மற்றும் புதுவையிலிருந்து பல்வேறு அணிகள் பங்கு பெற்றன. நேற்று இரவு நடந்த இறுதியாட்டத்தில் புதுவை பாரதி அணியும் பரங்கிகப்பேட்டை அணியும் மோதின. விறுவிறுப்பாக நடைபெற்ற இந்த இறுதியாட்டத்தில் புதுவை பாரதி அணி வெற்றி பெற்று முதல் பரிசை தட்டிச் சென்றது.




பரங்கிப்பேட்டை அணி இரண்டாவது இடத்தை பிடித்தது. மூன்றாவது பரிசு திருச்சி அணிக்கு கிடைத்தது. ரூ. 10,000 ரூ. 8,000 ரூ 7,000 என்று முறையே முதல், இரண்டாவது மற்றும் மூன்றாவது இடத்தை பெற்ற அணிகளுக்கு வழங்கப்பட்டது. பரிசளிப்பு நிகழ்ச்சியில் பேரூராட்சி மன்றத் தலைவரும் ஜமாஅத் தலைவருமான முஹமது யூனுஸ் பங்குபெற்று விளையாட்டு வீரர்களுக்கு பரிசுகளை வழங்கினார்.

Photos: TNTJ-PNO
மேலும் வாசிக்க>>>> "வாலிபால் கோப்பையை வென்றது புதுவை அணி; பரங்கிப்பேட்டைக்கு 2-வது இடம்!"

ஞாயிறு, 17 ஏப்ரல், 2011 1 கருத்துரைகள்!




வாத்தியாப்பள்ளி வாலிபால் கிளப் (V P V C) , மற்றும் BIG STREET இணைந்து நடத்தும் மாவட்ட அளவிலான கைப்பந்து (வாலிபால்) போட்டி, ஏப்ரல் 16 மற்றும் 17ல் சிறப்பாக நடைபெற்று வருகின்றது. மொத்தம் 30 அணிகள் கலந்து கொள்ளும் இந்த போட்டியில் நேற்று தகுதி சுற்று ஆட்டங்கள் நடத்தி முடிக்கப்பட்டன, அதனை தொடர்ந்து இன்று கால் இறுதி, அரை இறுதி மற்றும் இறுதி போட்டிகள் நடைபெறும். இதில் பல மாநில முண்ணனி விளயாட்டு வீரர்கள் கலந்து கொள்கின்றனர் என்பது தனிச்சிறப்பாகும்














மேலும் வாசிக்க>>>> "பரங்கிப்பேட்டையில் மாவட்ட அளவிலான வாலிபால் போட்டி...!"

சனி, 16 ஏப்ரல், 2011 1 கருத்துரைகள்!

ஞாநியின் ஓ பக்கங்களிருந்து...
முதலிலேயே சொல்லிவிடுகிறேன். அண்ணா ஹசாரேவின் போராட்டத்தை நான் ஆதரிக்கவில்லை. எனவே, இது தொடர்பான என் கருத்துகளுக்காக உணர்ச்சிவசப்படாமல் அறிவுபூர்வமாக விஷயத்தைப் பார்க்க வேண்டும்.ஊழலைக் கடுமையாக எதிர்க்கிறேன் என்பதனாலேயே அண்ணாவின் போராட்டத்தை ஆதரிக்க வேண்டியதில்லை. அவர் போராட்டத்தை ஏற்கவில்லை என்பதாலேயே அவரை இழிவுபடுத்துவதாக அவதூறு செய்வதாக அர்த்தமில்லை. சமூக சேவகர், சீர்திருத்தவாதி என்பதற்கு மேல் அவர் மீது எனக்குப் பெரிய பக்தியோ மரியாதையோ இல்லை.


1975லிருந்து தம் சொந்த கிராமம் ரெலகாவ்ன் சித்தியை தன்னிறைவு உடையதாக ஆக்க அவர் செய்த தொண்டு நல்ல விஷயம்தான். ஆனால், அது பெரும் பிரமிப்புக்குரியதல்ல. இப்போது சுமார் 2500 பேர் (சுமார் 400 குடும்பங்கள்) வாழும் ஊர் அது. 1975ல் இன்னும் குறைவான நபர்கள்தான் இருந்திருப்பார்கள். ஓடைகளுக்குக் குறுக்கே தடுப்பணைகள், தேக்கங்கள் அமைத்து நிலத்தடி நீரை மேம்படுத்தியது தான் அண்ணா அங்கே செய்த சாதனை; அதையடுத்து சூரிய ஒளியில் மின்விளக்குகள் அமைத்தார்கள். இதெல்லாம் நல்ல விஷயம்தான்.


இங்கேகூட எம்.எல்.ஏ., எம்.பி. தேர்தல்களில் சுயேச்சையாக நிற்கும் படித்த ‘நல்ல’ வேட்பாளர்கள் முதலில் அண்ணாவைப் போல அவரவர் கிராமத்தில் ஏதாவது உருப்படியாகச் செய்ய முயற்சிக்கலாம்.ஆனால், இவையெல்லாம் அண்ணாவை இரண்டாவது காந்தி என்றோ, இரண்டாவது சுதந்திரப் போராட்டத் தந்தை என்றோ புகழ்வதற்குரிய பெரும் சாதனைகள் அல்ல. இதேபோன்ற சாதனைகளை, சென்னை அருகே குத்தம்பாக்கத்திலும் அண்ணா போல தொண்டு நிறுவனம் மூலம் செய்யாமல், பஞ்சாயத்தில் தேர்ந்தெடுக்கப்பட்ட தலைவராக இருந்து இளங்கோ செய்திருக்கிறார். இளங்கோவுக்கு பத்மஸ்ரீ கூட கிட்டவில்லை. அண்ணாவுக்கு பத்மபூஷன் வரை அவர் எதிர்க்கிற அரசியல்வாதிகள் கொடுத்துக் கௌரவித்திருக்கிறார்கள்.



அண்ணா, காந்தியத்தில் ஆழ்ந்த அறிவு இருப்பவராகவும் எனக்குத் தெரியவில்லை. ஊழல் செய்பவர்களை, லஞ்சம் வாங்குபவர்களைத் தூக்கில் போட வேண்டும் என்று இந்த வாரம்கூடப் பேசியிருக்கிறார். அசல் காந்தி ஒருபோதும் மரணதண்டனையை ஆதரித்ததே இல்லை. பி.ஜே.பி முதலமைச்சர் மோடியைப் பாராட்டி அண்ணா பேசியிருக்கிறார். அந்த குஜராத்தில் மோடியின் அரசு ஏழு வருடங்களாக ஊழல் எதிர்ப்பு அமைப்பான லோகாயுக்த் பதவிக்கு யாரையும் நியமிக்கவில்லை என்பது அண்ணாவுக்குத் தெரியாதா? குஜராத் முஸ்லிம் படுகொலைகள் பற்றியெல்லாம் அண்ணா பதறியதாக எந்தச் செய்தியும் நான் படித்ததில்லை. காந்தி இருந்திருந்தால் கலவர நேரத்தில் அங்கேதான் முகாமிட்டுத் தடுக்க முயற்சித்திருப்பார்.


அண்ணா ஹசாரே வின் உண்ணாவிரதத்தை ஆதரித்து அதனால் மனம் நெகிழ்ந்து என்னிடம் பேசியவர்கள் பலருக்கும், அவர் ஊழலுக்கு எதிராக ஏதோ கடுமையான சட்டம் வரவேண்டும் என்று கோருகிறார் என்பதற்கு மேல் விவரங்கள் கூடத் தெரிந்திருக்கவில்லை. பிரதமர், அமைச்சர்கள், முதலமைச்சர், மாநில அமைச்சர்கள், எம்.பி.கள், எம்.எல்.ஏ.க்கள் போன்றோருக்கு எதிரான ஊழல் குற்றச்சாட்டுகளை விசாரிக்க அதிகாரம் உள்ள லோக்பால், லோகாயுக்த் அமைப்பை ஏற்படுத்த ஒரு சட்டம் தேவை. அந்தச் சட்டத்தை வடிவமைக்கப் போடப்படும் குழுவில் யார் யார் இருக்க வேண்டும் என்பவைப் பற்றிதான் அண்ணாவின் உண்ணாவிரதம். சுமார் 42 வருடங்களாக இந்த மசோதா பார்லிமெண்ட்டில் நிறைவேற வில்லை என்பது இன்னொரு குற்றச்சாட்டு. மகளிர் இடஒதுக்கீடு மசோதாகூடதான் நிறை வேறாமலே இருக்கிறது.

லோக்பால் மசோதா 1968ல் முதலில் மக்களவையில் கொண்டு வரப்பட்டு 1969ல் நிறைவேறிவிட்டது. ராஜ்யசபையான மாநிலங்களவைக்கு ஒப்புதலுக்கு வரும் முன்பு அவை கலைக்கப்பட்டுவிட்டது. எனவே மறுபடியும் 1971, 1977, 1985, 1989, 1996, 1998, 2001, 2005, 2008... என்று பல முறை திரும்பத் திரும்ப மக்களவையில் அந்த மசோதா கொண்டு வரப்பட்டிருக்கிறது. அதற்கெல்லாம் அண்ணா ஹசாரே காரணமல்ல. அவர் எதிர்க்கிற அரசியல்வாதிகளேதான் கொண்டு வந்தார்கள். ஒவ்வொரு முறையும் மசோதாவை மேம்படுத்த ஒரு கமிட்டியிடம் அது ஒப்படைக்கப்பட்டது. உண்மையில் இப்போது அண்ணா ஹசாரே உண்ணாவிரதம் இருந்ததும், இன்னொரு கமிட்டியிடம் அதை ஒப்படைக்கத்தான்.


மன்மோகன் அரசு இந்த மசோதாவை எழுதி முடிக்கும் பணியை ஓர் அமைச்சர் குழுவிடம் ஒப்படைத்தது. அந்தக் குழு மட்டும் போதாது; அதில் சம பலத்தில் பொதுமக்கள் சார்பில் அறிஞர் பிரதிநிதிகள் இருக்க வேண்டும் என்பதுதான் அண்ணாவின் கோரிக்கை. அதை அவர் பிரதமருக்குப் பலமுறை எழுதியிருக்கிறார். பதில் நடவடிக்கை இல்லாததால் உண்ணாவிரதம். தொண்டு நிறுவனங்கள் சிலவற்றின் சார்பில் இன்னொரு லோக்பால் மசோதா ஏற்கெனவே எழுதப்பட்டிருக்கிறது. அதில் ஈடுபட்டவர்களை அரசுக் குழுவில் சேர்க்க வேண்டும் என்று அண்ணாவும் அவரது ஆதரவாளர்களும் வற்புறுத்தினார்கள். இது தவிர சோனியா காந்தி தலைமையில் தேசிய ஆலோசனைக் குழு என்று ஒன்று இருக்கிறது. அதில் ஓர் உபகுழுவில் அண்ணாவின் ஆதரவாளரான சுவாமி அக்னிவேஷûம் இருக்கிறார். தேசிய ஆலோசனைக் குழுவும் லோக்பால் மசோதாவுக்கு ஆதரவாகக் கருத்து தெரிவித்திருக்கிறது.


அண்ணாவின் நான்கு நாள் உண்ணாவிரதத்தையடுத்து மத்திய அரசு லோக்பால் மசோதாவை இறுதி செய்யும் குழுவில் அண்ணா விரும்பிய சுயேச்சையான அறிஞர்களை சம பலத்தில் சேர்த்துக் கொள்வதாக அறிவித்துவிட்டது. உண்ணாவிரதம் முடிந்தது.இது ஊழலுக்கு எதிரான மக்கள் இயக்கத்துக்குக் கிடைத்த பெரிய வெற்றி என்று மீடியாக்கள் கொண்டாடுகின்றன.இங்கேதான் என் சில கவலைகளை முன்வைக்க விரும்புகிறேன்.

இதேபோல மற்றவர்கள் உண்ணாவிரதம் இருந்து ஒரு கோரிக்கையை அரசின் முன் வைத்தால், அரசு ஏற்றுக்கொண்டு விடுமா?


நான்கு நாள் உண்ணாவிரதத்துக்கு அடி பணிந்த இந்திய அரசு, பத்து வருடமாக மணிப்பூரில் ஐரம் ஷர்மிளா இருந்து வரும் (இப்போதும்..) உண்ணாவிரதத்தைப் பொருட்படுத்தாதது ஏன்? நவம்பர் 2000த்தில் அசாம் ரைபிள்ஸ் என்ற இந்திய ராணுவப் பிரிவு இம்பாலில் பஸ் ஸ்டாப்பில் நின்று கொண்டிருந்த பொதுமக்களை ஒரு கிழவி உட்பட, தீவிரவாதிகள் என்று சுட்டுக் கொன்றது. இதைக் கண்டித்தும், மணிப்பூரில் அமலில் இருக்கும் ராணுவச் சட்டத்தை விலக்கக் கோரியும் ஷர்மிளா உண்ணாவிரதம் தொடங்கினார். தற்கொலை முயற்சி என்று அவரைக் கைது செய்து மூக்குக்குழாய் வழியே கட்டாய உணவு செலுத்தி வருகிறது அரசு. தற்கொலை முயற்சிக் குற்றத்துக்கு அதிகபட்ச தண்டனையே ஒரு வருடம்தான் என்பதால், ஒவ்வொரு வருடம் முடிவதற்கு சில நாட்கள் முன்பு ஷர்மிளாவை விடுதலை செய்துவிட்டு, திரும்பக் கைது செய்யும் சடங்கை 10 வருடமாக அரசு செய்கிறது. 2004ல் ராணுவத்தால் கொடூரமாக மனோரமா என்ற பெண் கொல்லப்பட்டதும் நூற்றுக்கணக்கான மணிப்பூர் பெண்கள் ராணுவ அலுவலகம் முன்பு வந்து ஆர்ப்பாட்டம் செய்தனர். அதில் சிறுமிகள் முதல் முதியவர்கள் வரையிலான 40 பேர் முழு நிர்வாணமாக ராணுவ அலுவலகம் முன்பு நின்று ‘எங்களையும் பாலியல் வன்முறை செய்து கொல்’ என்று முழக்கமிட்டனர்.

மணிப்பூரும் இந்தியாதான்; ஷர்மிளாவும் இந்தியர்தான். ஆனால், ஒரு சட்ட மசோதாவை எழுதப் போகும் கமிட்டி பற்றிக் கொதித்துப் போகும் அறிவுஜீவிகளுக்கு, சொந்த நாட்டில் நடக்கும் ராணுவக் கொடுமையோ, கல்பாக்கம், கூடன்குளம் போன்ற அணு உலைகள் எவ்வளவு பாதுகாப்பானவை என்பது பற்றியோ ரத்தம் கொதிப்பதே இல்லை. லஞ்சம் ஊழலைத் திட்டுவதுதான் இருப்பதிலேயே எளிமையானது; அரசியல்வாதியைத் திட்டுவது அதைவிட எளிமையானது.

உண்மையில் ஏற்கெனவே ஊழலைத் தடுக்க, தண்டிக்க இருக்கும் சட்டங்கள் போதுமானவைதான். அசல் பிரச்னை சட்டம் போதவில்லை என்பதே அல்ல; அவை நடைமுறைப்படுத்தப்படாமல் இருப்பதுதான். நடைமுறைப்படுத்தினால், நம்மிடம் உள்ள சட்டங்கள் எவ்வளவு சிறப்பானவை என்பதற்கு, தேர்தல் நேரத்தில் தேர்தல் ஆணையம் எடுக்கும் செயல்களே சாட்சி. தேர்தல் ஆணை யம் செயல்படுத்தும் எதுவும் புது சட்டம் அல்ல. செயல்படுத்துவோரும் பழைய அதிகாரிகளேதான். லோக்பால் மசோதாவைச் சட்டமாக்கினால் போதாது. நிறைவேற்றும் பணி அதிகாரிகளிடம்தான் இருக்கிறது.அவர்கள் யார்? படித்த வர்க்கத்தைச் சேர்ந்தவர்கள். ஊழலுக்கு நம் நாட்டில் படிக்காத அரசியல்வாதிக்கு, ரவுடிக்கு முழு துணை புரியும் ஆடிட்டர், வக்கீல், அதிகாரி எல்லாருமே படித்த வர்க்கத்தினர்தான். இவர்களைத் திருத்தாமல் எத்தனை சட்டம் போட்டும் பயனே இல்லை.

ஏன் ஷர்மிளாவின் உண்ணாவிரதம் கவனிக்கப்படுவதில்லை? ஏன் அண்ணாவின் போராட்டம் கவனம் பெறுகிறது? முழுக்க முழுக்க மீடியாதான் காரணம். கிரிக்கெட் உலகக் கோப்பை முடிந்து ஐ.பி.எல். தொடங்குவதற்கு இடைப்பட்ட காலத்தில் மட்டும் அண்ணா ஹசாரே உண்ணாவிரதம் செய்யாமல் இருந்திருந்தால், அவரையும் மீடியா கவனித்திருக்காது. ஒரு பரபரப்பு முடிந்ததும் அடுத்த பரபரப்புக்காகத் தயார் செய்யும் ஆங்கில சேனல்கள் செயற்கையாக அண்ணாவின் போராட்டத்தை ஊதிப் பெரிதாக்கிக் காட்டின. அண்ணாவை தொழிலதிபர்கள், சினிமா நடிகர்கள் ஆதரிக்கிறார்கள் என்று முழங்கின. அவர்கள்தான் கறுப்புப் பணத்தை உற்பத்தி செய்பவர்கள்.மீடியா அடிமைகளாக இருக்கும் நடுத்தர வர்க்கத்துக்கு ஊழலுக்கு எதிராக மெழுகு வர்த்தி ஊர்வலம் போவதுதான் சாத்தியம். லஞ்சம் கேட்கும் ரிஜிஸ்திரார், தாசில்தார், ஆர்.டி.ஓ. அலுவலகங்களில் எதிர்க்கவும், போராடவும் அவர்களுக்கு முதுகெலும்பு கிடையாது. ஊழல் எதிர்ப்பை திருவிழாவாக, கூட்டு பஜனையாகக் கொண்டாடுவது ஆபத்தில்லாதது.

எல்லாவற்றுக்கும் மேலாக மக்கள் சார்பாக அரசின் மசோதா கமிட்டியில் யார் இருக்க வேண்டும் என்பதைத் தீர்மானிக்க அண்ணா ஹசாரே யார்? (அவரது நிர்பந்தத்துக்குப் பணிந்து அரசு ஏற்றிருக்கும் பெயர்களில் ஒரு பெண் கூட கிடையாது. கிரண்பேடி அவர் ஆதரவாளரானபோதும்.) இந்த முன்னுதாரணம் பின்பற்றப்பட்டால், எந்த அரசுக் குழுவிலும் தாங்கள் விரும்புவோரை வலிமையான மீடியா பலம் உள்ள ஒரு சிறு குழு புகுத்திவிட முடியும். ஒரு சிலர் கையில் துப்பாக்கியை வைத்துக் கொண்டு மிரட்டிக் காரியம் சாதித்தால் தீவிரவாதம் என்றால், வேறு ஒரு சிலர் மீடியா செல்வாக்கு, உண்ணாவிரத மிரட்டலைக் கொண்டு காரியம் சாதிப்பது மட்டும் காந்தியமாகிவிடுமா?

ஜனநாயகத்தில் நாம் விரும்பினாலும் விரும்பாவிட்டாலும், தேர்தலில் மக்கள் தேர்ந்தெடுத்து அனுப்பும் பிரதிநிதிகளுக்கே சட்டம் இயற்றவும் நிர்வாகம் செய்யவும் அதிகாரம் உண்டு. அவர்களிடம் மற்றவர்கள் கோரிக்கை எழுப்பலாம்; பரிந்துரைக்கலாம். இயற்றப்பட்ட சட்டம் தவறானதென்றால், நீதிமன்றம் சென்று போராடலாம். தடியெடுத்தவன் தண்டல்காரன் என்ற அணுகுமுறை - அது காந்தியத் தடியாக இருந்தாலும், தவறுதான்.

நன்றி: ஞாநி
மேலும் வாசிக்க>>>> "அண்ணா ஹசாரேவின் போராட்டத்தை நான் ஆதரிக்கவில்லை - ஞாநி"

வியாழன், 14 ஏப்ரல், 2011 0 கருத்துரைகள்!

பரங்கிப்பேட்டை: பரங்கிப்பேட்டையில் அமைதியான முறையில் நடந்து முடிந்த சட்டப்பேரவைத் தேர்தலில் சுமார் 65 முதல் 68 சதவீதம் வரையிலான வாக்குகள் பதிவாகின. நகரில் பல்வேறு வாக்குச்சாவடிகளில் நடைபெற்ற வாக்குபதிவில் ஆண்களைவிட பெண்கள் அதிக ஆர்வத்துடன் நீண்ட வரிசையில் காத்திருந்து தமத வாக்குப்பதிவினை செலுத்தினர். முற்பகலில் மட்டுமின்றி பிற்பகலிலும் வாக்குப்பதிவு விறுவிறுப்பாக நடைபெற்றது. வாக்குப்பதிவு அமைதியாக நடந்து முடிந்ததற்கு மட்டுமின்றி, அரசியல் கட்சிகளை முறைகேடுகள் செய்ய விடாமல் வெகுவாக தடுத்த வகையில், தேர்தல் ஆணையத்தை மக்கள் பாராட்டி வருகின்றனர். 

வாக்குப் பதிவு மாலை முடிந்ததும் அனைத்து வேட்பாளர்களின் முகவர்கள் முன்னிலையில் வாக்குப்பதிவு எந்திரங்கள் சீல் வைக்கப்பட்டன. அவை அனைத்தும் வாக்குகள் எண்ணப்படும் மையங்களுக்கு எடுத்துச் செல்லப்பட்டது. தேர்தல் முடிவுகள் ஒரு மாதத்திற்கப்பிறக மே 13-ல் வெளியாவதால், துணை ராணுவத்தின் பாதுகாப்பில் வைத்து கருவூலங்களை போல வாக்குப்பதிவு எந்திரங்களுக்கு 24 மணி நேரப் பாதுகாப்பு அளிக்கப்பட்டு வருகிறது.
மேலும் வாசிக்க>>>> "பரங்கிப்பேட்டையில் அமைதியான வாக்குப்பதிவு: 68% வரை பதிவு!"

புதன், 13 ஏப்ரல், 2011 2 கருத்துரைகள்!


பரங்கிப்பேட்டை: இன்று காலை சரியாக 8 மணிக்கு துவங்கிய வாக்குபதிவு விறுவிறுப்புடன் நடைபெற்று வருகிறது. ஆண்களைவிட பெண்கள் அதிகம் ஆர்வத்துடன் தமது வாக்குபதிவினை செலுத்துகின்றனர். வெயிலையும் பொருட்படுத்தாது, நீண்ட வரிசையில் காத்திருந்து ஓட்டு போடுகின்றனர். பகல் 12.30 மணி நிலவரப்படி, 27 சதவீதம் வாக்குகள் பரங்கிப்பேட்டையில் பதிவாகியுள்ளதாக தகவல் வெளியாகியுள்ளது. 
 
வாக்கப் பதிவினையொட்டி, பரங்கிப்பேட்டையில் பெரும்பாலான கடைகள், வணிக நிறுவனங்கள் மூடப்பட்டுள்ளது. இதனால் நகரின் முக்கிய வணிகப்பகுதியான சஞ்சிவீராயர் கோயில் தெரு முனை வெறிச்சோடி காணப்படுகிறது.
மேலும் வாசிக்க>>>> "வாக்குபதிவில் பெண்கள் ஆர்வம்! நீண்டவரிசையில் காத்திருந்து ஓட்டு போட்டனர்."

0 கருத்துரைகள்!

பரங்கிப்பேட்டை: சட்டமன்ற தேர்தலுக்கான வாக்குப் பதிவு இன்று காலை 8 மணிக்கு பலத்தப் பாதுகாப்புடன் துவங்கியது. பரங்கிப்பேட்டை அரசு மகளிர் பள்ளி, கும்மத்துபள்ளி, சலங்குகாரத்தெரு அரசினர் ஆரம்ப பள்ளி உட்பட கரிகுப்பம், சேவாமந்திர் பள்ளிகளில் அமையப்பெற்றுள்ள வாக்குச் சாவடிகளில் விறுவிறு வாக்குபதிவு நடைபெற்று வருகிறது. காலை நிலவரப்படி, பெண்கள் அதிக ஆர்வத்துடன் அவர்களுக்கான தனி வரிசையில் நின்று வாக்கு பதிவை செலுத்தி வருகின்றனர். வாக்குச் சாவடிக்குட்பட்ட எல்லையில் கண்காணிப்பு அதிகப்படுத்தப் பட்டுள்ளது.

முன்னதாக நேற்றே இந்த வாக்குச்சாவடிகள் பலத்த பாதுகாப்பின் கீழ் வந்து, வாக்களிக்கும் நடைமுறைகளுக்கான ஏற்பாடுகள் மேற்கொள்ளப்பட்டிருந்தன. துவங்கியவுடன் ஒரு சில பூத்துகள் தவிர கூட்டம் சற்று குறைவாக இருந்தது. தற்போது (காலை மணி 9.15) மக்கள் கூட்டம் சற்று அதிகமாக வரத்துவங்கியுள்ளது. எல்லைக்கு வெளியே பூத் சிலிப் வழங்கப்பட்டு வருகிறது.
மேலும் வாசிக்க>>>> "பரங்கிப்பேட்டையில் வாக்குப் பதிவு துவங்கியது!"

0 கருத்துரைகள்!

பரங்கிப்பேட்டை : காரில் கடத்தி வரப்பட்ட ஒரு லட்சம் ரூபாய் மதிப்புள்ள பிராந்தி பாட்டில்களுடன் நின்றிருந்த காரை தேர்தல் பறக்கும் படையினர் பறிமுதல் செய்தனர். 

புதுச்சத்திரம் அடுத்த ஆலப்பாக்கம் ஓட்டல் ஒன்றின் அருகே புதுச்சேரியிலிருந்து கடத்தி வரப்பட்ட பிராந்தி பாட்டில்களுடன் ஸ்கார்பியோ கார் நிற்பதாக குறிஞ்சிப்பாடி தேர்தல் பறக்கும்படை அதிகாரிக்கு தகவல் கிடைத்தது. அதையடுத்து பறக்கும் படை அதிகாரி சண்முக சிகாமணி உள்ளிட்ட அதிகாரிகள் சம்பவ இடத்திற்குச் சென்று காரை சுற்றி வளைக்க முயன்றனர். 

அதற்குள் கார் டிரைவர் உட்பட 3 பேர் காரில் இருந்து இறங்கி தப்பியோடினர். அதிகாரிகள் காரை சோதனை செய்ததில் 8 கேஸ்களில் 396 குவார்ட்டர் பிராந்தி பாட்டில்கள் இருந்தது கண்டுபிடிக்கப்பட்டது. கார் மற்றும் பிராந்தி பாட்டில்களை பறிமுதல் செய்து புதுச்சத்திரம் போலீசில் ஒப்படைத்தனர். கடத்தி வரப்பட்ட பிராந்தி பாட்டில்களின் மதிப்பு ஒரு லட்சம் ரூபாய் ஆகும். இதுகுறித்து புதுச்சத்திரம் போலீசார் வழக்குப் பதிந்து விசாரணை நடத்தி வருகின்றனர்.
மேலும் வாசிக்க>>>> "ஒரு லட்சம் மதிப்புள்ள பிராந்தி பாட்டில்களுடன் கார் பறிமுதல்!"

திங்கள், 11 ஏப்ரல், 2011 4 கருத்துரைகள்!



நம் அரசியல் கட்சிகள் திருந்தவில்லை என்பதற்குத் தொடர்ந்து பல அடையாளங்கள் இருந்துகொண்டே இருக்கின்றன. நாம்தான் அவற்றைச் சரியாகக் கவனிப்பதும் இல்லை. அழுத்தம் கொடுப்பதும் இல்லை.

சென்றமுறை ஜெயித்து வந்த 234 எம்.எல்.ஏ.க்களில் 77 பேர் மீது கிரிமினல் வழக்குகள் இருந்தன. இந்த முறை போட்டி யிடும் வேட்பாளர்களில் 18 சதவிகிதம் பேர் மீது கிரிமினல் வழக்குகள் உள்ளன. அதில் 66 பேர் மீது உள்ளவை கடும் குற்றச்சாட்டுகள். ஒவ்வொரு கட்சியின் வேட்பாளர் களிலும் கிரிமினல் வழக்குள்ளவர்கள் சதவிகிதம் அதிர்ச்சியாக இருக்கிறது. தி.மு.க – 22 சதவிகிதம். அ.தி.மு.க – 30. பா.ம.க -52. விடுதலைச் சிறுத்தைகள்- 50. தே.மு. தி.க- 19. காங்கிரஸ்- 11. பி.ஜே.,பி- 11.

சென்ற முறை ஜெயித்தவர்களில் 57 பேர் கோடீஸ்வரர்கள். இந்த முறை போட்டியிடுபவர்களில் 35 சதவிகிதம் பேர் கோடீஸ்வரர்கள். மீதி பெரும்பாலோர் லட்சாதிபதிகள். கோடீஸ்வர வேட்பாளர்கள் கட்சி வாரியாக: தி.மு.க – 65.77 சத விகிதம். அ.தி.மு.க – 52.08. காங்கிரஸ் – 61.11. பா.ம.க – 40.74. விடுதலைச் சிறுத்தைகள் – 33.33. தே.மு.தி.க – 33.333. பி.ஜே.பி- 14.79. மார்க்சிஸ்ட் – 8.33. கம்யூனிஸ்ட்- 0.

 ஐந்து வருடங்களில் இவர்களுடைய சொத்து எப்படிப் பெருகியிருக்கிறது என்பதே இவர்கள் மக்களுக்கு எப்படி சேவை செய்திருக்கிறார்கள் என்பதைக் காட்டி விடும். தி.மு.க அமைச்சர் இ.வ.வேலுவின் சொத்து பல நூறு மடங்கு அதிகரித்திருக்கிறது. ஆட்சியில் இருந்த அமைச்சர்களை விட அவர்களுடைய மனைவிகள், துணைவிகள் சொத்து அதிகரித்திருக்கிறது. முதலமைச்சர்தான் இதில் வழிகாட்டி. பிறவி கம்யூனிஸ்ட் அல்லவா அவர்! 2006ல் அவர் சொத்து 26.52 கோடி. 2011ல் 44.14 கோடி இதில் கருணாநிதியின் சொத்து வெறும் சுமார் 5 கோடிதான். தயாளுவுடையது சுமார் 16 கோடி. ராஜாத்தியுடையது சுமார் 24 கோடி! இன்னும் பல பேர் மனைவி-துணைவி கணக்கு காட்டியிருக்கிறார்கள். வீரபாண்டி ஆறுமுகத்தின் சொத்து மதிப்பு வெறும் 75 லட்சம். மனைவி ரங்கநாயகியுடையதோ 93 லட்சம். துணைவி லீலாவுடையதோ 2.25 கோடி!

 

தேர்தல் ஆணையம் இந்த முறை தமிழ்நாட்டில் பிரதான பிரச்னை, பெரும் பணம் வாக்காளர்களுக்கு லஞ்சமாகக் கொடுக்கப்படுவதைத் தடுப்பதுதான் என்று அறிவித்து, கடுமையாகச் செயல்பட்டிருக்கிறது. இதன் விளைவு டீக்கடைக்காரர் வீட்டில் சில லட்சங்களும் ஆம்னி பஸ் கூரையில் பல கோடிகளும் பிடிபட்டிருக்கின்றன. தமிழ்நாட்டில் எந்த அளவு கறுப்புப் பணம் சுழற்சியில் இருக்கிறது என்பதற்கு, தேர்தல் ஆணையம் தரும் ஒரு புள்ளிவிவரமே சாட்சி. சென்ற வாரம் வரை பிடிபட்ட 22 கோடியே 40 லட்சம் ரூபாயில், முறையாகக் கணக்கு காட்டி தேர்தலுக்குச் சம்பந்தம் இல்லாத நியாயமான சொந்தப் பணம் என்று நிரூபித்து திரும்பப் பெறப்பட்ட தொகை வெறும் 4 கோடியே 88 லட்சம்தான்.

பணபலம் இல்லாமல் தேர்தலில் போட்டியிடவே முடியாது என்பது தெளிவாகத் தெரிகிறது. ஒருசில விதிவிலக்கான இடதுசாரி வேட்பாளர்கள் தவிர, எந்தப் பெரிய கட்சி வேட்பாளரும் ஆணையம் நிர்ணயித்த வரம்புக்குள் செலவு செய்வதே இல்லை என்பது உண்மை. பணபலம் இல்லாமலே ஜெயிக்க முடியும் என்று நம்பும் படித்த இளைஞர்களின் பிரதிநிதியாகத் தங்களை முன்னிறுத்தும் சுயேச்சை வேட்பாளர் சரத்பாபு போன்றோர் போடும் கணக்குக் கூட தப்பாகவே இருக்கிறது. மொத்தம் 2 லட்சம் வாக்காளர்கள் உள்ள வேளச்சேரியில் தமக்கு 40 ஆயிரம் வாக் குகள் கிடைத்தால் ஜெயித்து விடலாம் என்று அவர் ஒரு கடிதம் அனுப்பியிருந்தார். 70 சதவிகித வாக்குப் பதிவு என்றால் ஒரு லட்சத்து 40 ஆயிரம் வாக்குகள் விழும். அதில் 40 ஆயிரம் ஜெயிக்கப் போதும் என்றால் மீதி ஒரு லட்சம் வாக்குகளுக்கு அர்த்தம் என்ன? அவை பல வேட்பாளரிடையே பிரிவதால் தான் 40 ஆயிரத்துக்கு மதிப்பு வருகிறது!

 

இந்தத் தேர்தல் முறையே தவறு; விகிதாசாரப் பிரதிநிதித்துவம் இருக்க வேண்டும் என்பது பற்றித்தான் படித்தவர்கள் பிரசாரம் செய்து கருத்து திரட்ட வேண்டும். இருக்கும் தவறான முறைக்குள்ளேயே செயல்பட்டு ஜெயித்துவிடலாம் என்று கணக்குப் போடுவது படித்த நல்லவர்களின் அப்பாவித்தனம் அல்லது சாமர்த்தியம். காங்கிரஸ் வேட்பாளராகப் போட்டியிடும் என் நண்பர் அவருக்கு எதிர் வேட்பாளர் மூன்று கோடி செலவு செய்தால், தான் ஒரு கோடி வரைக்குமாவது செலவிடும் கட்டா யத்துக்குத் தள்ளப்படுவேன் என்கிறார். நண்பருக்கு மாத வருவாயே 15 ஆயிரத்துக்குள்தான். எப்படி ஒரு கோடி திரட்ட முடியும்? கொடுப்பவர்கள் நாளைக்கு பதிலுக்கு என்னவெல்லாம் பிரதி உபகாரம் கேட்பார்கள் என்பதை நினைத்தால் கலக்கமாக இருக்கிறது.

இப்படிப்பட்ட ஒட்டுமொத்த அருவருப்பான சூழ்நிலையில் ஒரே நம்பிக்கைக் கீற்று, தேர்தல் ஆணையத்தின் கறாரான செயல்பாடு மட்டும்தான். ஆனால் அது போதாது. இன்னும் பல தேர்தல்களுக்கு இப்படிப்பட்ட கெடுபிடிகள் தொடர்ந்தால்தான் கட்சி அமைப்பு சீர்படும்.

இப்போதும் பணபலமும், இலவச ஆசை காட்டி வோட்டு வாங்கும் உத்தியும் ஆதிக்கம் செலுத்தவே செய்கின்றன.

இந்தச் சூழலில் எந்தக் கட்சிக்கு வோட்டுப் போடுவது என்று பலரும் என்னைத் தொடர்ந்து கேட்டுக் கொண்டே இருக்கிறார்கள். நம் முன்னால் மூன்று வழிகள்தான் இருக்கின்றன.

 

வழி 1: 49 ஓ. எல்லா வேட்பாளரையும் நிராகரிக்கும் உரிமை. இப்போதைக்கு இது மின் வாக்குப்பதிவு இயந்திரத்தில் ரகசிய பட்டனாக இல்லை. எனவே பகிரங்கமாக சொல்லித்தான் இதைப் பதிவுசெய்ய வேண்டும். எனவே பெருவாரியானவர்கள் இதைப் பயன்படுத்தும் வாய்ப்புக் குறைவு. பெருவாரியாக 49 ஓ விழுந்தால்தான் கட்சிகளுக்குக் கலக்கம் ஏற்படும். ஒரு சில நூறு 49 ஓக்கள் பயன் தராது. என் கொள்கையில் நான் உறுதியாக இருக்கிறேன் என்று நமக்கு நாமே வலியுறுத்திக் கொள்ள இது உதவும்.

 

வழி 2: தி.மு.க, அ.தி.மு.க என்ற இரு மட்டைகளுக்கும் இடையில் பெரும் வேறுபாடுகள் எதுவும் இல்லை. இருவரும் நிராகரிக்கப்பட வேண்டியவர்கள்தான்.

 

(இது-பற்றி நான் எழுதிய நையாண்டி நாடகம் ‘ஆப்புக்கு ஆப்பு’ தேர்தலுக்குச் சில தினங்கள் முன்னால் எங்கள் பரீக்‌ஷா குழுவால் நடிக்கப்பட இருக்கிறது.) கடந்த ஆட்சிக் காலங்களைப் பார்த்தீர்களானால், 1996-2001ல் தி.மு.க ஆட்சியும், 2001-2006ல் அ.தி. மு.க ஆட்சியும் சகிக்கக்கூடியனவாக இருந்தன. ஆனால், 1991-96 அ.தி.மு.க ஆட்சியும் 2006-2011 தி.மு.க ஆட்சியும் சகிக்க முடியாதவை. மூன்றாவது அணியாக உருப்படியாக எதுவும் உருவாவதற்கு இன்னும் 15 வருடங்கள் ஆகலாம். அதுவரை எந்த ஒரு கழகத்தையும் தொடர்ந்து பத்தாண்டு ஆள விடாமல், 5 வருடங்களுக்கு ஒரு முறை கேரளா மாடலில் மாற்றி மாற்றித் தேர்ந்தெடுத்து நம்மை நாமே கொஞ்சம் ஆறுதல்படுத்திக் கொள்ளலாம்.

 

வழி 3: வேட்பாளர் அடிப்படையில் பார்ப்போம். சரியான கட்சியில் இருக்கும் தப்பான ஆள் என்று சொல்ல எவருமில்லை. ஏனென்றால் சரியான கட்சிகளே இல்லை. தப்பான கட்சியில் இருக்கும் சரியான ஆட்களாக யாரேனும் இருக்கிறார்களா என்று தேடலாம். (சரியான ஆளாக இருந்தால் அவர் ஏன் தப்பான இடத்துக்குப் போகிறார் என்ற தர்க்க நியாயம் தனி.) இரு பிரதான அணிகளிலும் இருக்கும் வேட்பாளர்களில் இருப்பதில் சுமாரானவர் என்பவருக்கு வோட்டுப் போடலாம். நல்ல சுயேச்சைகளுக்குப் போட்டுப் பயனில்லை. எப்படியும் கட்சிகள்தான் ஆட்சிக்கு வரும். அவற்றில் பெருவாரியாக முழு அயோக்கியர்களுக்கு பதில், ஓரளவு நல்லவர்களை யாவது ஜெயிக்க வைக்கலாம்.

 

மூன்றில் உங்களுக்கு எது பிடிக்கிறதோ செய்யுங்கள். ஆனால் வோட்டுப் போடாமல் மட்டும் இருந்து விடாதீர்கள். மூன்றில் எப்படி வோட்டுப் போட்டாலும் தொலைநோக்கில் மாற்றம் வர அது நிச்சயம் உதவும்.

நன்றி: ஞாநி

மேலும் வாசிக்க>>>> "அவசியம் "ஓ" போடுங்க!"

1 கருத்துரைகள்!


பரங்கிப்பேட்டையில் குடிநீர் கேட்டு, காலி குடங்களுடன் பெண்கள் சாலை மறியலில் ஈடுபட்டனர். பரங்கிப்பேட்டை பேரூராட்சிக்குட்பட்ட பகுதிகளில், மின் பற்றாக்குறை காரணமாக, கடந்த 20 நாட்களாக குடிநீர் கிடைக்காமல் மக்கள் அவதியடைந்து வருகின்றனர். இதனால் ஆத்திரமடைந்த கொடிமரத் தெரு, ஆற்றங்கரை தெருவைச் சேர்ந்த பெண்கள், நேற்று காலை காலி குடங்களுடன் பேரூராட்சி அலுவலகம் முன், மெயின்ரோட்டில் மறியலில் ஈடுபட்டனர்.

தகவலறிந்த, பரங்கிப்பேட்டை இன்ஸ்பெக்டர் ராமகிருஷ்ணன் மற்றும் போலீசார், அவர்களுடன் பேச்சுவார்த்தை நடத்தினர். தினமும் லாரி மூலம் குடிநீர் வினியோகம் செய்ய நடவடிக்கை எடுப்பதாக, உறுதியளித்ததைத் தொடர்ந்து, மறியல் கைவிடப்பட்டது. திடீர் மறியலால், அப்பகுதியில் போக்குவரத்து பாதிக்கப்பட்டது.

தினமலர் செய்தி
மேலும் வாசிக்க>>>> "பேரூராட்சி அலுவலகம் முன் சாலை மறியல்!"

2 கருத்துரைகள்!

பரங்கிப்பேட்டை இந்தியன் வங்கியில் A.T.M., வசதி செய்து தர தி.மு.க., இளைஞரணி கோரிக்கை வைத்துள்ளது. இதுகுறித்து பரங்கிப்பேட்டை தி.மு.க., நகர இளைஞரணி அமைப்பாளர் முனவர் உசேன், சென்னை இந்தியன் வங்கி தலைமை அலுவலகத்திற்கு அனுப்பியுள்ள மனுவில் பரங்கிப்பேட்டையில் இந்தியன் வங்கியில் ஏராளமான வாடிக்கையாளர்கள் உள்ளனர். வங்கியில் A.T.M., வசதியில்லாததால் தங்கள் வங்கி வாடிக்கையாளர்கள் பிற வங்கிகளின் A.T.M,ற்கு செல்ல வேண்டிய நிலை உள்ளது. எனவே அதிகரித்து வரும் தங்கள் வங்கி சேமிப்பு கணக்கு வாடிக்கையாளர்கள் எண்ணிக்கையை கருத்தில் கொண்டு உடனடியாக A.T.M, வசதி செய்து தர வேண்டும் என்று கோரிக்கை விடுத்துள்ளதாக தினமலர் நாளேடு செய்தி வெளியிட்டுள்ளது.
மேலும் வாசிக்க>>>> "பரங்கிப்பேட்டை இந்தியன் வங்கியில் ATM வசதி: தி.மு.க கோரிக்கை"

சனி, 9 ஏப்ரல், 2011 0 கருத்துரைகள்!

வாத்திய பள்ளி தெருவில், மர்ஹூம். ஜைனுல்லாபுதுதீன் தாதா சாஹிப் அவர்களின் மகனாரும், மர்ஹூம். ஹசனா மரைக்காயர் அவர்களின் மருமகனாரும் K. முஹம்மது கவுஸ், M. முஹம்மது நைய்னா, O.A.W. பாவாஜான் இவர்களின் மாமனாரும் K. நாசர் உசேன் அவர்களின் தகப்பனாரும் மர்ஹூம். அப்துல் ரஹீம் சாஹிப், மர்ஹூம். அப்துல் மாலிக் சாஹிப், Z. அப்துல் அலீம் மற்றும் Z. ஹபிபுல்லாஹ் இவர்களின் சகோதரருமான Z. கபீர் கான் சாஹிப் அவர்கள் மர்ஹுமாகிவிட்டார்கள். இன்ஷா அல்லாஹ் நாளை காலை 10 ௦ மணிக்கு மீராப்பள்ளியில் நல்லடக்கம் செய்யப்படுவார்கள்.

இன்னாலில்லாஹி வஇன்னா இலைஹி ராஜிவூன்
மேலும் வாசிக்க>>>> "இறப்புச் செய்தி"

வெள்ளி, 8 ஏப்ரல், 2011 0 கருத்துரைகள்!


சிதம்பரம் சட்டசபை தொகுதியை பதட்டமானதாக அறிவித்து கூடுதல் துணை ராணுவ பாதுகாப்பு போட வேண்டும் என தலைமை தேர்தல் ஆணையருக்கு மா.கம்யூ., வேட்பாளர் பாலகிருஷ்ணன் கோரிக்கை வைத்துள்ளார்.
இதுகுறித்து தலைமை தேர்தல் ஆணையருக்கு அவர் அனுப்பியுள்ள மனு: சிதம்பரம் தொகுதி தி.மு.க., கூட்டணி கட்சியின் வேட்பாளர் ஸ்ரீதர் வாண்டையார் கடந்த 31ம் தேதி பரங்கிப்பேட்டை அடுத்த கொத்தட்டையில் ஓட்டு சேகரிக்கச் சென்ற போது பிரச்னை ஏற்பட்டது.

பரங்கிப்பேட்டை தி.மு.க., ஒன்றிய செயலர் முத்துபெருமாள், அவரது தம்பி முடிவண்ணன் உள்ளிட்ட 50க்கும் மேற்பட்டவர்கள் கொத்தட்டைக்கு சென்று காண்டீபன், தாமோதரன் ஆகியோரை அரிவாளால் வெட்டி வீடுகளை சேதப்படுத்தியுள்ளனர். இதுகுறித்து பரங்கிப்பேட்டை போலீசில் புகார் செய்யப்பட்டு வழக்கு பதிவு செய்யப்பட்டுள்ளது. அமைச்சர் பன்னீர்செல்வம் தலையீட்டால் நடவடிக்கை துரிதப்படுத்தாமல் போலீசார் தயக்கம் காட்டி வருகின்றனர். இதனால் அப்பகுதி பதட்டமாகவே உள்ளது.

மேலும் சிதம்பரம் சட்டசபை தொகுதியில் வன்முறை சம்பவங்கள் நடத்தி வாக்காளர்களை அச்சுறுத்தி கள்ள ஓட்டுகளை பதிவு செய்து, அடியாள் பலத்துடன் ஓட்டுச்சாவடிகளை கைப்பற்ற முயற்சி மேற்கொள்ளப்பட்டு வருவதாக தகவல்கள் வருகிறது. எனவே சிதம்பரத்தை பதட்டமான தொகுதியாக அறிவித்து கூடுதலாக துணை ராணுவ பாதுகாப்பு போட வேண்டும். கொத்தட்டை கிராம மக்கள் மீது தாக்குதல் நடத்திய தி.மு.க., ஒன்றிய செயலர் முத்துபெருமாள் உள்ளிட்ட அனைவரையும் கைது செய்ய வேண்டும். இவ்வாறு மனுவில் கூறியுள்ளார்.

தின மலர் செய்தி
மேலும் வாசிக்க>>>> "சிதம்பரம் தொகுதிக்கு கூடுதல் துணை ராணுவ பாதுகாப்பு தேவை! மா.கம்யூ வேட்பாளர் கோரிக்கை"

வியாழன், 7 ஏப்ரல், 2011 2 கருத்துரைகள்!

 பரங்கிப்பேட்டை: அ.தி.மு.க. கூட்டணியின் சிதம்பரம் சட்டமன்ற தொகுதியின் மா.கம்யூ வேட்பாளர் பாலகிருஷ்ணனுக்கு ஆதரவாக பரங்கிப்பேட்டை நகர மனித நேயமக்கள் கட்சியினர் வாக்கு சேகரித்தனர்.
 மா.கம்யூனிஸ்ட் மாநில செயலாளர் ராமகிருஷ்ணன் பரங்கிப்பேட்டை நகரில் பிரச்சாரத்தில் ஈடுபட்ட போது, மனிதநேய மக்கள் கட்சி நகரத் தலைவர் ஜாகிர் ஹூசைன், நகர செயலாளர் நூருல் பிலாலுதின், த.மு.மு.க. செயலாளர் ஹசன் அலி, பொருளாளர் சையது மரைக்காயர், நகர து.தலைவர் ஹாஜி நூர்அலி மற்றும் ம.ம.க. தொண்டர்களும் கூட்டணி கட்சி தொண்டர்களும் கலந்துக் கொண்டனர்.
மேலும் வாசிக்க>>>> "பாலகிருஷ்ணனுக்கு வாக்கு சேகரிக்கும் ம.ம.க.!"

புதன், 6 ஏப்ரல், 2011 0 கருத்துரைகள்!

பரங்கிப்பேட்டை: சிதம்பரம் தொகுதியில், தி.மு.க., - பா.ம.க, நிர்வாகிகளுக்குள் ஏற்பட்ட பிரச்னையில், வேட்பாளரே நேரடியாகச் சென்று அதிருப்தியாளர்களை சரிக்கட்டினார்.  சிதம்பரம் தொகுதியில், தி.மு.க., கூட்டணியில் மூ.மு.க., வேட்பாளர் ஸ்ரீதர் வாண்டையார் போட்டியிடுகிறார். கடந்த, 1ம் தேதி, கொத்தட்டை கிராமத்தில், ஸ்ரீதர் வாண்டையார் ஓட்டு கேட்க சென்ற போது, தி.மு.க., சேர்மன் முத்து பெருமாள், பா.ம.க., நிர்வாகிகளை அறிமுகப்படுத்தவில்லை. இதனால், பா.ம.க.,வைச் சேர்ந்த காண்டீபன், தாமோதரனும் சேர்மன் முத்து பெருமாளை நெட்டித் தள்ளினர். தகவல் அறிந்த முத்து பெருமாளின் தம்பி, பா.ம.க.,வைச் சேர்ந்த முடிவண்ணன், 50க்கும் மேற்பட்ட தி.மு.க.,வினருடன் கொத்தட்டைக்குச் சென்று, காண்டீபன், தாமோதரனையும் தாக்கினர்.  இதில் இருவரும் காயமடைந்தனர். இதுகுறித்து, 50 பேர் மீது போலீசார் வழக்கு பதிந்தனர்.

இப்பிரச்னையால் கூட்டணி கட்சி நிர்வாகிகளுக்கு இடையே, "ஈகோ' தலை தூக்கியது. மேலும், கொத்தட்டை உட்பட சில இடங்களில் வேட்பாளர் ஸ்ரீதர் வாண்டையாருக்கு ஓட்டு வங்கி குறையும் சூழல் நிலவியது. உளவுப் பிரிவின் அறிக்கையைத் தொடர்ந்து, வேட்பாளர் ஸ்ரீதர் வாண்டையார் கொத்தட்டை கிராமத்திற்குச் சென்று காண்டீபன், தாமோதரனை சந்தித்து ஆறுதல் கூறி சமாதானப்படுத்தினார். இதேபோல், அதிருப்தியில் உள்ள கூட்டணி கட்சி நிர்வாகிகள் தனியாக கவனிக்கப்பட்டு வருகின்றனர். ஸ்ரீதர் வாண்டையாரை வெற்றி பெறச் செய்ய ஆளும் கட்சி தலைமை உத்தரவிட்டுள்ளதால், உளவுப் பிரிவு போலீசார் தனி கவனம் செலுத்தி வருகின்றனர்.
மேலும் வாசிக்க>>>> "தி.மு.க.- பா.ம.க. மோதல்: பிரச்சனையை சரிகட்டினார் வேட்பாளர்!"

0 கருத்துரைகள்!

பரங்கிப்பேட்டை : மத்திய அமைச்சர் அழகிரிக்கு மதுரை உயர்நீதி மன்றம் முன் ஜாமீன் வழங்கியதை கண்டித்து பரங்கிப்பேட்டை வழக்கறிஞர்கள் நேற்று கோர்ட் புறக்கணிப்பில் ஈடுபட்டனர். மதுரை மாவட்டம் மேலூர் அருகே வல்லடிகார்கோவில் வளாகத்தில் தேர்தல் அதிகாரி தாக்கப்பட்ட வழக்கில் மத்திய அமைச்சர் அழகிரிக்கு மதுரை உயர்நீதிமன்றம் முன் ஜாமீன் வழங்கியது. முன் ஜாமீன் வழக்கில் இதுவரை கோர்ட்டுகள் கடைப்பிடிக்கப்பட்ட மரபுகள் மீறப்பட்டுள்ளது எனக் கூறிஇ மதுரை ஐகோர்ட்டை கண்டித்து நேற்று பரங்கிப்பேட்டை வக்கீல்கள் கோர்ட் புறக்கணிப்பு செய்தனர்.
மேலும் வாசிக்க>>>> "அழகிரிக்கு முன்ஜாமின் வழங்கியதை கண்டித்து பரங்கிப்பேட்டை வழக்கறிஞர்கள் கோர்ட் புறக்கணிப்பு!"

செவ்வாய், 5 ஏப்ரல், 2011 2 கருத்துரைகள்!

கடந்த ஐந்து ஆண்டுகளில் கருணாநிதி தலைமையிலான அமைச்சரவையில் சிறப்பாக மக்கள் சேவை செய்த அமைச்சர்களின் பட்டியல் அல்ல இது.



மக்களால் தேர்தெடுக்கப்பட்ட இந்த மக்கள் பிரதிநிதிகள் மக்களுக்கு செய்தவற்றை பட்டியல் இட வழியில்லாமல் கடந்த ஐந்து ஆண்டுகளில் அதிக சொத்து குவித்த சாதனை(!?)புரிந்த அமைச்சர் பெருமக்களின் பட்டியல்தான் இது.
கடந்த ஐந்து ஆண்டுகளில் அதிக சொத்து குவித்து டாப் 10 ல் முதலிடம் பெறுபவர் கே.கே.என் நேரு இவரின் இன்றைய சொத்து மதிப்பு 17,77,79,731 கடந்த தேர்தலில் இவரின் சொத்து மதிப்பு 2,83,87,516 ஏறத்தாழ 15 கோடி ரூபாய் அளவுக்கு இவரது சொத்து மதிப்பு அதிகரித்துள்ளது.

இவருக்கு அடுத்து இரண்டாம் இடத்தை பிடித்து இருப்பவர் “நீரா ராடியாவின் தோழி பூங்கோதை இவரின் இன்றைய சொத்து மதிப்பு 15,43,48,480 கடந்த தேர்தலில் இவரின் சொத்து மதிப்பு 1,35,77,414. மூன்றாவது இடத்தை பிடித்திருப்பவர் பரிதி இளம் வழுதி. லட்சாதிபதியாக இருந்து கோடீஸ்வரர் ஆகி இருக்கும் இவர் கடந்த தேர்தலில் 62,26,162 மட்டுமே சொத்து மதிப்பாக காட்டிய பரிதியின் இன்றைய சொத்து மதிப்பு 6,49,17,568.

அடுத்த ஏழு இடங்களை பெற்ற அமைச்சர்களின் விவரங்கள் கீழே. அடைப்புக்குறியில் அவர்களது முந்தைய சொத்து மதிப்பு

4)பொன்முடி - 8,22,32,709( 2,50,00,000)

5)எம்.ஆர்.கே பன்னீர்செல்வம் - 6,14,45,419( 1,04,27,000)

6)உபயதுல்லா 9,94,65,654(5,46,55,965)

7)வெள்ளகோயில் சாமிநாதன் - 4,85,85,116(86,09,911)

8)வீரபாண்டி ஆறுமுகம் - 4,94,28,803(1,05,58,114)

9)துரைமுருகன் - 6,20,03,389(2,33,33,249)

10)பொங்கலூர் பழனிச்சாமி - 15,66,63,000(12,23,12,951)


இவர்களுக்கும் மேலான இடத்தை ஒருவர் பிடித்திருக்கிறார். அவர்தான் இவர்களின் தலைவர் "மொதல் அமைச்சர்" கருணாநிதி மேலே குறிப்பிட்டுள்ள அனைவரையும் விட அதிக அளவு சொத்து சேர்த்திருப்பதால் இவர்களோடு கருணாநிதி 44,14,93,770( 26,52,00,948) அவர்களை பட்டியல் சேர்க்காமல் முதலிடத்திற்கும் மேலான உயர்ந்த இடத்தில் வைத்து விட்டோம்.

குறிப்பு :ஜூனியர் விகடனில் வெளியான செய்தியை தழுவி எழுதப்பட்ட கட்டுரை


மேலும் வாசிக்க>>>> "டாப் 10 அமைச்சர்கள்!!!"

  • காவல் - 243224
  • மருத்துவமனை(G.H.) - 253996
  • ஆம்புலன்ஸ் - 253800
  • தீ - 243303
  • மின் வாரியம் - 253786
  • துணை மின்நிலையம் - 247220
  • தொலைபேசி BSNL - 243298
  • பேரூராட்சி - 243249
  • பேரூராட்சி - 243249
  • பஞ்சாயத்து யூனியன் - 243227
  • கேஸ் சர்வீஸ் - 243387
  • ஜமாஅத் - 253800
  • அஞ்சல் நிலையம் - 243203
  • சின்னகடை P.O. - 243230
  • இரயில்வே - 243228

  • Dr அங்கயற்கண்ணி - 253922
  • Dr அமுதா (SMC) . - 243392
  • Dr நகுதா Maricar - 243673
  • Dr பார்த்தசாரதி - 243396
  • Dr பிரேம்குமார் - 253580
  • Dr ஷகீலா பேகம் - 243234