பரங்கிப்பேட்டை தகவல் களஞ்சியம்

K-Tic: குவைத்தில் முப்பெரும் விழா! அரசு விருந்தினராக சூளைமேடு அப்துல்லாஹ் பாகவீ பங்கேற்பு!!

2011-11-23T00:19:00.000+05:30

குவைத்தில் முப்பெரும் விழா!

குவைத் அரசு சிறப்பு விருந்தினராக சென்னை, சூளைமேடு மவ்லானா அப்துல்லாஹ் பாகவீ பங்கேற்பு!!

குவைத் தமிழ் இஸ்லாமியச் சங்கம் (K-Tic) ஏற்பாடு!!

-------------------------------------------------

ஹிஜ்ரீ 1433 / இஸ்லாமியப் புத்தாண்டு சிறப்பு நிகழ்ச்சி!

கல்வி / சமூக விழிப்புணர்வு நிகழ்ச்சி!!

சங்கத்தின் 7ம் ஆண்டு துவக்க நிகழ்ச்சி!!!

பேரன்புடையீர்! அஸ்ஸலாமு அலைக்கும் வரஹ்ம..

கடந்த ஆறு வருடங்களுக்கும் முன் ஹிஜ்ரீ 1427 / இஸ்லாமியப் புத்தாண்டு துவங்கும் முஹர்ரம் மாதத்தில் ஆரம்பிக்கப்பட்டு, குவைத் இந்திய தூதரகம், குவைத் அவ்காஃப் / இஸ்லாமிய விவகாரங்கள் துறை அமைச்சகம், மஸ்ஜிதுல் கபீர் நிர்வாகம் மற்றும் பள்ளிவாசல்கள் துறை நிர்வாகம் ஆகியவற்றில் பதிவு செய்யப்பட்டு, குவைத் வாழ் தமிழ் மக்களுக்கு சமூகம், சமயம், கல்வி என பல்வேறு தளங்களில் சீரிய சிந்தனையாளர்களின் ஆலோசனைகளாலும், சீர்மிகு ஆலிம் பெருமக்களின் வழிகாட்டுதலின் அடிப்படையிலும், ஸுன்னத் வல் ஜமாஅத் கொள்கை அடிப்படையில் குவைத்தில் இயங்கும் ஒரே சிறந்த பேரியக்கமான K-Tic (கே-டிக்) என்றழைக்கப்படும் குவைத் தமிழ் இஸ்லாமியச் சங்கம், ஒவ்வொரு ஆண்டும் சங்கத்தின் துவக்க நிகழ்ச்சியை ஹிஜ்ரா நிகழ்ச்சியுடன் சேர்த்து கல்வி / சமூக விழிப்புணர்வு நிகழ்ச்சியையும் இணைத்துமுப்பெரும் விழாவாக நடத்திக் கொண்டு வருகின்றது.

அந்த அடிப்படையில் 'குவைத் தமிழ் இஸ்லாமியச் சங்கம் (K-Tic)'ஏற்பாடு செய்யும் (1) ஹிஜ்ரீ 1433 / இஸ்லாமியப் புத்தாண்டு சிறப்பு நிகழ்ச்சி (2) கல்வி / சமூக விழிப்புணர்வு நிகழ்ச்சி (3) சங்கத்தின் 7ம் ஆண்டு துவக்க நிகழ்ச்சி ஆகிய 'முப்பெரும் விழா', நான்கு நாட்கள் மூன்று இடங்களில் ஐந்து நிகழ்ச்சிகளாக குவைத் அவ்காஃப்/ இஸ்லாமிய விவகாரங்கள் துறை அமைச்சகம் மற்றும் மஸ்ஜிதுல் கபீர் நிர்வாகத்தின் ஆதரவில் நடைபெற இருக்கின்றன இன்ஷா அல்லாஹ்...

சங்கத்தின் தலைவர் விஸ்வகுடி மவ்லவீ அஷ்ஷைஃக் எம்.எஸ். முஹம்மது மீராஷா ஃபாஜில் பாகவீ ஹழ்ரத் அவர்கள் தலைமையில் நடைபெறும் இச்சிறப்புமிகு நிகழ்ச்சிகளில் தமிழகத்திலிருந்து வருகை தரும் மலேஷியா, கோலாலம்பூர் மஸ்ஜிதே இந்தியாவின் முன்னாள் இமாமும், பன்னூல் ஆசிரியரும், சீரிய சிந்தனையாளருமான சென்னை, சூளைமேடு மவ்லானா மவ்லவீ அஃப்ழலுல் உலமா அல்ஹாஜ் அஷ்-ஷைஃக் பேராசிரியர் மு. அப்துல்லாஹ் ஃபாஜில் பாகவீ ஹழ்ரத் கிப்லா அவர்கள் குவைத் அவ்காஃப்/ இஸ்லாமிய விவகாரங்கள் துறை அமைச்சகத்தின் சிறப்பு விருந்தினராக கலந்து கொண்டு சிறப்புரையாற்ற இருக்கின்றார்கள்.

முதல் நிகழ்ச்சி:

01.12.2011 வியாழக்கிழமை இரவு 6:30 மணி முதல் இஷா தொழுகையை தொடர்ந்து குவைத் ஃபஹாஹீல் பகுதியில் உள்ள 'மஜீத் அல் ஹிலால் அல் உதைபீ (உர்தூ குத்பா)' பள்ளிவாசலில் 'ஹிஜ்ரா - முழுமையான வரலாறும், படிப்பினைகளும், பாடங்களும்....' என்ற தலைப்பில் சிறப்புரை நடைபெறும். இந் நிகழ்ச்சி ஹிஜ்ரீ 1433 / இஸ்லாமியப் புத்தாண்டு சிறப்பு நிகழ்ச்சியாக ஏற்பாடு செய்யப்பட்டுள்ளது.

இரண்டாம் நிகழ்ச்சி:

02.12.2011 வெள்ளிக்கிழமை நண்பகல் 12:00 மணி முதல் ஜும்ஆ தொழுகையை தொடர்ந்து குவைத், ஃகைத்தான் பகுதியிலுள்ள K-Tic தமிழ் ஜும்ஆ ஃகுத்பா பள்ளிவாசலான அல் மிக்தாத் பின் அம்ரூ (ரழி) பள்ளிவாசலில் 'ஜகாத் - நோக்கங்களும், தற்கால நடைமுறைகளும், பைத்துல் மாலின் (பொது நிதி கருவூலம்) முக்கியத்துவமும்...' என்ற தலைப்பில் சிறப்புரை நடைபெறும்.

மூன்றாம் நிகழ்ச்சி:

02.12.2011 வெள்ளிக்கிழமை இரவு 6:30 மணி முதல் இஷா தொழுகையை தொடர்ந்து குவைத் சிட்டி, மிர்காப் பகுதியில் உள்ள 'அல்-ஷாயா மஸ்ஜித் (KPTC பேரூந்து நிலையம் / லிபரேஷன் டவர் அருகில், சூக்குல் வதனிய்யா எதிரில் உள்ள)' பள்ளிவாசலில் 'கல்வியும், ஒழுக்கம் சார்ந்த நெறிகளும், மார்க்கக் கல்வியின் முக்கியத்துவமும்....' என்ற தலைப்பில் சிறப்புரை நடைபெறும். இந் நிகழ்ச்சி கல்வி / சமூக விழிப்புணர்வு சிறப்பு நிகழ்ச்சியாக ஏற்பாடு செய்யப்பட்டுள்ளது.

நான்காம் நிகழ்ச்சி:

08.12.2011 வியாழக்கிழமை இரவு 6:30 மணி முதல் இஷா தொழுகையை தொடர்ந்து குவைத், ஃகைத்தான் பகுதியிலுள்ள K-Tic தமிழ் ஜும்ஆ ஃகுத்பா பள்ளிவாசலான அல் மிக்தாத் பின் அம்ரூ (ரழி) பள்ளிவாசலில் 'முன்மாதிரி முஸ்லிம் குடும்பம் - இஸ்லாமியக் குடும்பவியல்' என்ற தலைப்பில் சிறப்புரை நடைபெறும். இந் நிகழ்ச்சி பெண்களுக்கான சிறப்பு நிகழ்ச்சியாக ஏற்பாடு செய்யப்பட்டுள்ளது.

ஐந்தாம் நிகழ்ச்சி:

09.12.2011 வெள்ளிக்கிழமை நண்பகல் 12:00 மணி முதல் ஜும்ஆ தொழுகையை தொடர்ந்து குவைத், ஃகைத்தான் பகுதியிலுள்ள K-Tic தமிழ் ஜும்ஆ ஃகுத்பா பள்ளிவாசலான அல் மிக்தாத் பின் அம்ரூ (ரழி) பள்ளிவாசலில் 'உளத்தூய்மை, மரண சிந்தனை, மண்ணறை வாழ்க்கை, மறுமை வெற்றி' என்ற தலைப்பில் சிறப்புரை நடைபெறும்.

இந்த சிறப்பு நிகழ்ச்சிகள் அனைத்திலும் குவைத் வாழ் தமிழ் உலமா பெருமக்கள், பேராசிரியர்கள் மற்றும் பிற அமைப்புகளின் பிரதிநிதிகள் கலந்து கொண்டு வாழ்த்துரைகளையும், சிற்றுரைகளையும் வழங்க இருக்கின்றனர். துஆவுடன் அனைத்து நிகழ்ச்சிகளும் இனிதே நிறைவுபெறும் இன்ஷா அல்லாஹ்.

இச்சிறப்புமிகு நிகழ்ச்சிகளில் குவைத் வாழ் தமிழ் முஸ்லிம்கள் அனைவரும் தங்கள் குடும்பத்தார், மனைவி, மக்கள், உறவினர்கள், நண்பர்கள் மற்றும் பிற சமய சகோதரர்கள் அனைவருடனும் பங்கேற்று பயனடையுமாறு நிகழ்ச்சிகளுக்கான ஏற்பாடுகளை சிறப்பான முறையில் செய்து கொண்டிருக்கும் குவைத் தமிழ் இஸ்லாமியச் சங்கத்தின் நிர்வாகிகள், உறுப்பினர்கள், நிகழ்ச்சி ஏற்பாட்டாளர்கள் மற்றும் களப்பணியாளர்கள் அன்புடன் அழைக்கின்றனர்.

குறிப்பு:

நிகழ்ச்சிகள் குறித்த நேரத்தில் ஆரம்பிக்கப்பட்டு, குறிப்பிட்ட நேரத்தில் முடிக்கப்படும்.
அனைத்து நிகழ்ச்சிகளிலும் பெண்களுக்கு தனியிட வசதி உண்டு.
08.12.2011 வியாழக்கிழமை அன்று நடைபெறும் நிகழ்ச்சியில் மட்டும் இரவு உணவு ஏற்பாடு செய்யப்பட்டுள்ளது.
தொடர்ந்து நமது சங்கத்திற்கு ஆதரவு அளித்துக் கொண்டிருக்கும் அனைத்து நல்லுள்ளங்களுக்கும், நமது செய்திகளை தொடர்ந்து வெளியிடும் இணையதளங்கள், இதழ்கள், வலைப்பூக்கள், தொலைக்காட்சிகள் மற்றம் ஊடகங்கள் ஆகியவற்றின் நிர்வாகிகளுக்கும்,ஆசிரியர் குழுவினருக்கும் மனமார்ந்த நன்றிகளை தெரிவித்துக் கொள்வதுடன் தொடர்ந்து எங்களின் சேவைகளை செய்திகளாக மக்களிடம் சேர்ப்பிக்குமாறு அன்புடன் வேண்டுகோள் விடுக்கின்றனர் சங்கத்தின் நிர்வாகிகள்.
குவைத்திற்கு வெளியே வாழும் சகோதரர்கள் குவைத்தில் வசிக்கும் தங்களுக்கு தெரிந்தவர்களிடம் இந்தச் செய்தியை எத்தி வைக்குமாறும், நம் சங்கத்தின் பணிகள் மென்மேலும் விரிவடைய தங்களின் இருகரமேந்திய பிரார்ததனைகளை சமர்ப்பிக்க வேண்டும் என்றும் அன்பு வேண்டுகோள் விடுக்கின்றனர் K-Tic சங்க நிர்வாகிகள்.

அனைவரும் குடும்பத்துடன் வருக! அன்பர்களையும் அழைத்து வருக!! அளவிலா அறிவமுதம் பெ(ப)ருக!!!

உலக மக்கள் அனைவருக்கும் K-Ticன் இதயங்கனிந்த ஹிஜ்ரீ 1433 / இஸ்லாமியப் புத்தாண்டு நல்வாழ்த்துக்கள்!

மேலதிக விபரங்களுக்கும், இணைந்து செயல்படுவதற்கும் தொடர்பு கொள்க:

துரித சேவை அலைபேசி எண்: (+965) 97 87 24 82

மின்னஞ்சல் முகவரிகள்: q8tic@yahoo.com / ktic.kuwait@gmail.com

யாஹு குழுமம்: http: //groups.yahoo.com/group/K-Tic-group

இணையதளம்: www.k-tic.com

வாங்க www.mypno.com தளத்திற்கு..!

2011-06-18T12:46:00.007+05:30

கடந்த சில மாதங்களாக, கட்டமைப்பு மறு சீரமைப்பு பணிகளுக்காக தற்காலிகமாக நிறுத்தி வைக்கப்பட்டிருந்த MYPNO.COM இணையத்தளம், நேற்று முதல் தனது வழக்கமான சேவையினை மீண்டும் தொடங்கியுள்ளது. அல்ஹம்துலில்லாஹ். எனவே வாசகர்கள் www.mypno.com தளத்திற்கு வருகை தந்து தங்களது ஆதரவினை நல்க வேண்டும் என்று ஆசிரியர் குழு சார்பில் கோருகிறோம். நன்றி

புதிய கட்டமைப்புடன் உங்கள் MYPNO.COM

2011-06-15T22:02:00.001+05:30

நம்முடைய mypno.com இணைய தளம், சில மாதங்களாக, கட்டமைப்பு மறு சீரமைப்பு பணிகளுக்காக நிறுத்தி வைக்கப்பட்டிருந்தது. தற்போது, சீரமைப்பு பணி முடிவடைந்த நிலையில், நம் இணைய தளம் உங்கள் முன் வலம் வர தயாராக இருக்கின்றது. இன்ஷா அல்லாஹ், வெள்ளிக்கிழமை முதல் நமது இணையதளம் செயல்பட தொடங்கும் என்பதை மகிழ்வுடன் தெரிவித்துக்கொள்கின்றோம்.

இது நாள்வரை தங்கள் ஆர்வம் சற்றும் குறையாமல், தங்களது ஆதரவை நம்முடைய வலைப்பூவின் மூலம் பதிவு செய்தீர்கள்.

உங்கள் ஆதரவை தொடர்ந்து நாடுகின்றோம்.

விரைவில் பற்பல புதிய தகவல்களையும், சுவையான பதிவுகளையும் தங்கள் கண்முன் கொண்டுவர முயற்சித்து வருகின்றோம்.

உங்கள் ஆதரவையும் , கருத்துக்களையும் அன்புடன் வரவேற்கின்றோம்.

உங்கள் அன்புடன்
mypno.com ஆசிரியர் குழு

முன்னோடியாகிறது இஸ்லாமிய ஐக்கிய ஜமாஅத்..!

2011-06-15T21:09:00.011+05:30

முஸ்லிம்கள் அதிகம் வாழும் பல ஊர்களில் ஒவ்வொரு முஹல்லாவுக்கும் ஒரு ஜமாஅத் என்ற அடிப்படையில் ஊருக்கு குறைந்தது ஐந்து ஜமாஅத் என்றளவில் இருந்து ஐக்கியம் என்பது ஐயம் மிக்க வினாவாகவே இருக்கும், ஆனால் பெயருகேற்றப்படி ஒரே ஐக்கிய ஜமாஅத் என்பது, பரங்கிப்பேட்டைக்கு இறைவன் வழங்கிய அருட்கொடைகளில் முதன்மையான ஒன்றாகும்.

சமுதாய ஒற்றுமை, மத நல்லிணக்கம், கல்வி, மகளிர் நலன், வட்டியில்லா கடனுதவி, சிறுதொழில்களுக்கான வாய்ப்புகள், மருத்துவம், அவசரக்கால ஊர்திகள், இயற்கை இடையூறுகளின் போது உதவி என்று பல்வேறு துறைகளிலும் சிறப்பாக செயல்பட்டு வரும், பரங்கிப்பேட்டை இஸ்லாமிய ஐக்கிய ஜமாஅத் பல முஸ்லிம் ஊர்களுக்கு முன்னோடியாகவும் இருந்து வருகிறது. அல்ஹம்துலில்லாஹ்.

இதன் அடுத்த கட்டமாக அமைக்கப்பட்ட கடலூர் மாவட்ட இஸ்லாமிய ஐக்கிய ஜமாஅத் சார்பில், பல ஊர்களில் இஸ்லாமிய ஐக்கிய ஜமாஅத் அமைப்பு ஏற்படுத்தப்பட்டு வருகிறது. இதனடிப்படையில் பரங்கிப்பேட்டையுடன் நெருங்கிய தொடர்பில் இருக்கும் கடலூர் முதுநகர் (OT) ஜமாஅத்தார்கள் பரங்கிப்பேட்டை இஸ்லாமிய ஐக்கிய ஜமாஅத் தலைவர் M.S.முஹம்மது யூனுஸ் தலைமையிலான நிர்வாகிகளை கடந்த சில தினங்களுக்கு முன் சந்தித்து ஜமாஅத் செயல்பாடுகளை கேட்டறிந்தனர், மஹ்மூதியா ஷாதி மஹாலில் நடைப்பெற்ற இச்சந்திப்பு சுமார் 3 மணி நேரம் நடைப்பெற்றது.

படம்: TNTJ PNO

இறைவா..!, கல்வி ஞானத்தை அதிகப்படுத்துவாயாக...

2011-06-15T12:49:00.011+05:30

சமச்சீர் கல்வி குழப்பத்தால் ஜூன் 1-ந்தேதி திறக்கப்பட வேண்டிய பள்ளிக்கூடம் ஜூன் 15 அன்று திறக்க அரசு உத்தரவிட்டது. மேலும் சமச்சீர் கல்வி குறித்து ஆராய நிபுணர் குழு அமைக்க வேண்டும் என்று உச்சநீதிமன்றம் நேற்று உத்தரவிட்டுள்ளது. இதனையடுத்து இன்று பரங்கிப்பேட்டையில் பள்ளிகள் அனைத்தும் திறக்கப்பட்டன, கடந்த 2 மாத காலமாக காலை நேரப்போக்குவரத்து இல்லாததின் காரணமாக அமைதியாக இருந்த பரங்கிப்பேட்டை நகர வீதிகளில் காலை 8 மணி முதல் பள்ளிக்கூட வேன்கள் - ஆட்டோக்கள் போக்குவரத்து மிகுந்ததால் வழக்கமான பரப்பரப்பு மீண்டும் காணப்பட்டது. பரங்கிப்பேட்டையின் " தி.நகர் ரங்கநாதன் தெரு" என்றழைக்கப்படும் மேட்டுத்தெரு வணிக வளாகங்களில், பள்ளிக்கூடங்களுக்கு தேவையான பொருட்கள் வாங்குவதற்காக நேற்று மாலை மக்கள் போக்குவரத்து அதிகமாக இருந்தது. மாணவ - மாணவிகளின் கல்வி சிறக்க mypno.com ஆசிரியர் குழு சார்பாக எல்லாம் வல்ல இறைவனை பிரார்த்திக்கிறோம். மாணவ - மாணவிகளை வாழ்த்துகிறோம்.

இறப்புச் செய்தி

2011-06-14T19:13:00.004+05:30

ஜுன்னத் மியான் தெருவில் மர்ஹும் ரஹ்மதுல்லாஹ்ஷா அவர்களின் மகளாரும், செய்யது அஹமது அவர்களின் மனைவியும், ஹாஜா மக்தூம், முஹம்மது காசிம், உமர் ஆகியோர்களின் சகோதரியும், சிராஜ் அவர்களின் தாயாருமாகிய உம்முசல்மா அவர்கள் மர்ஹும் ஆகி விட்டார்கள். இன்ஷா அல்லாஹ் நாளை புதன்கிழமை (15-06-2011) மாலை 5 மணிக்கு நல்லடக்கம் அப்பா பள்ளியில்.

இன்னாலில்லாஹி வ இன்னா இலைஹி ராஜிவூன்

சமச்சீர் கல்வி: உச்ச நீதிமன்றம் அதிரடி தீர்ப்பு..!

2011-06-14T18:15:00.001+05:30

சமச்சீர் கல்வி திட்டத்தை நிறுத்தி வைக்கும் வகையில் தமிழக அரசு கொண்டுவந்த சமச்சீர் கல்வி திருத்த மசோதாவுக்கு சென்னை ஐகோர்ட்டு இடைக்கால தடை விதித்துள்ளது. இந்த நிலையில், ஐகோர்ட்டு தீர்ப்பை எதிர்த்து சுப்ரீம் கோர்ட்டில் தமிழக அரசு சார்பில் அப்பீல் மனு தாக்கல் செய்யப்பட்டது. இந்த மனு மீது இன்று விசாரணை நடந்தது. இதில் 1-ம் மற்றும் 6-ம் வகுப்புகளுக்கு இந்தாண்டு சமச்சீர் கல்வி தொடர வேண்டும். இதர வகுப்புகளுக்கு சமச்சீர் கல்வி அமல்படுத்துவது குறித்து ஆராய நிபுணர் குழு அமைக்க வேண்டும் என்று உச்சநீதிமன்றம் உத்தரவிட்டுள்ளது. நிபுணர் குழு அறிக்கை 2 வாரத்துக்குள் சென்னை உயர்நீதிமன்றத்தில் தாக்கல் செய்யப்பட வேண்டும் என்றும், நிபுணர் குழு அறிக்கை மீது ஒரு வாரத்தில் உயர்நீதிமன்றம் தீர்ப்பளிக்க வேண்டும் என்றும் உத்தரவிட்டுள்ளது. உயர்நீதிமன்றம் தீர்ப்பு கூறும் வரை 2,3,4,5, 7,8,9,10-ம் வகுப்புகளுக்கு பாடம் நடத்த வேண்டாம். தீர்ப்புக்கு பின் பாடம் நடத்தலாம் என்றும் கூறியுள்ளது.

எம்.எல் ஏ-வுக்கு பிடி-வாரண்ட்

2011-06-14T12:50:00.004+05:30

1997 - ஆம் ஆண்டு கோவை கலவரத்தால் பாதிக்கப்பட்ட மக்களுக்கு தமிழ்நாடு முஸ்லிம் முன்னேற்றக் கழகத்தின் சார்பாக உதவித்தொகை வழங்கப்பட்டது. இதற்காக வெளிநாட்டில் பணம் வசூல் செய்யப்பட்டதாகவும், அந்தப் பண வசூல் தொடர்பாக முறையான ஆவணங்கள் சமர்பிக்கப்படவில்லை என்பதால் கடந்த 2001 -ஆம் ஆண்டு சி.பி.ஐ வழக்கு பதிவு செய்து விசாரித்து வருகிறது.

இந்த வழக்கின் விசாரணை எழும்பூர் நீதிமன்றத்தில் நேற்று விசாரணைக்கு வந்தது.இந்த வழக்கில் மூன்று முறை சம்மன் அனுப்பியும் நீதிமன்றத்தில் ஆஜராகததால் ராமநாதபுரம் தொகுதி எம்.எல்.ஏ-வும் த.மு.மு.க மாநிலத் தலைவருமான ஜவாஹிருல்லாஹ், த.மு.மு.க பொதுச் செயலாளர் ஹைதர் அலி மற்றும் நல்லார் முஹம்மது,காசிம்,செய்யது நிஷார் அஹ்மது ஆகிய ஐந்து பேருக்கும் ஜாமீனில் வெளிவர முடியாதபடி பிடிவாரண்டை பிறப்பித்து எழும்பூர் கோர்ட் உத்தரவிட்டுள்ளது.

source:dinakaran

ஹஜ் யாத்ரிகர்களுக்கு மேலும் சலுகைகள்

2011-06-14T12:46:00.005+05:30

ஹஜ் யாத்திரை மேற்கொள்ளும் இந்தியப் பயணிகளுக்கு மேலும் சில சலுகைகளை வெளியுறவுத்துறை அமைச்சர் எஸ்.எம். கிருஷ்ணா திங்கள் கிழமை அறிவித்தார்.

எழுபது வயதுக்கு மேற்பட்ட பயணிகள் உடன் துணைக்கு ஒருவரை அழைத்துச் செல்லலாம்.

தொடர்ந்து 3 ஆண்டுகளாக விண்ணப்பித்து தேர்வு செய்யப்படாதவர்கள் மீண்டும் விண்ணப்பித்தால் சீட்டு குலுக்கல் ஏதும் இல்லாமல் தேர்வு செய்யப்பட்டு விடுவார்கள்.

பாஸ்போர்ட் பெற விண்ணப்பித்தால், போலீஸ் சரிபார்ப்புகூட இல்லாமல், 8 மாதங்களுக்குச் செல்லத்தக்கதாக பாஸ்போர்ட் வழங்கப்படும்.

யாத்திரைக்கு சாமான்கள் எடுத்துச் செல்லும் நடைமுறை எளிதாக்கப்படும்.

இந்தியாவில் 21 ஊர்களிலிருந்து ஹஜ் யாத்திரைக்கு விமானங்களில் நேரடியாகச் செல்லலாம்.

ஹஜ் பயணத்தின்போது இந்திய யாத்ரீகர்கள் தங்க 1,25,000 வீடுகள் வாடகைக்கு எடுக்கப்படும்.

ஜித்தாவில் இந்தியத் தூதரகத்தில் இந்திய யாத்ரிகர்களுக்கு உதவுவதற்காக தனிப்பிரிவு செயல்படும்.

கடந்த ஆண்டு 1,71,671 பேர் யாத்திரை மேற்கொண்டனர். இந்த ஆண்டு இந்த எண்ணிக்கை மேலும் அதிகரிக்கும்.

இத்தகவல்களை அமைச்சர் எஸ்.எம். கிருஷ்ணா நிருபர்களிடம் தில்லியில் திங்கள்கிழமை தெரிவித்தார்.

சி.முட்லூரில் நடைபெற்ற கிரிக்கெட் போட்டியில் பரங்கிப்பேட்டை அணி வெற்றி

2011-06-13T14:31:00.003+05:30

சிதம்பரம் அடுத்த சி.முட்லூரில் நடந்த கிரிக்கெட் போட்டியில் பரங்கிப்பேட்டை ஆர்.சி.சி., அணி வெற்றி பெற்று முதல் பரிசை வென்றது.

சிதம்பரம் அடுத்த சி.முட்லூர் சேலஞ்சர் கிரிக்கெட் கிளப் சார்பில் கிரிக்கெட் போட்டி நடந்தது. துவக்க நிகழ்ச்சியில் சிவசங்கரன் தலைமை தாங்கினார். வட்டார போக்குவரத்து ஆய்வாளர் முனுசாமி, நம்மாழ்வார், ராமச்சந்திரன், ராமநாதன் முன்னிலை வகித்தனர். வரதராஜன் போட்டியை துவக்கி வைத்தார். பாபு சீருடை வழங்கினார்.

சிதம்பரம், காட்டுமன்னார் கோவில், பரங்கிப்பேட்டை மற்றும் குறிஞ்சிப்பாடியைச் சேர்ந்த 150க்கும் மேற்பட்ட அணிகள் பங்கேற்றன. இதில் முதல் நான்கு பரிசுகளாக 25 ஆயிரம் ரூபாய்க்கும் மேல் ரொக்கம் மற்றும் சுழற்கோப்பை வழங்கும் நிகழ்ச்சி சி.முட்லூர் விளையாட்டுத் திடலில் நடந்தது. அணித் தலைவர் ரவிச்சந்திரன் வரவேற்றார். முன்னாள் கிரிக்கெட் வீரர் பானுச்சந்தர் முன்னிலை வகித்தார்.

முதல் பரிசு 6,666 ரூபாய் பரங்கிப்பேட்டை ஆர்.சி.சி., அணியும், இரண்டாம் பரிசு 5,555 ரூபாய் ஒரத்தூர் நாட் ரீச்சபிள் அணியும், மூன்று மற்றும் நான்காம் பரிசுகளாக 7,777 ரூபாயை சி.முட்லூர் சேலஞ்சர் இரு அணிகளும் வென்றது. வெற்றி பெற்ற அணிகளுக்கு சிறப்பு விருந்தினர்கள் பரிசு வழங்கினர். தமிழ் நன்றி கூறினார்.

நன்றி: தினமலர்

இறப்புச் செய்தி

2011-06-12T21:01:00.000+05:30

வாத்தியாப்பள்ளி தெருவில் மர்ஹும் அப்துல் ரஜ்ஜாக் அவர்களின் மகனாரும், செய்யது அலாவுதீன் அவர்களின் தகப்பனாரும், மர்ஹும் முஸ்தபா கமால் பாஷா, பாரூக் ஆகியோர்களின் மாமனாருமாகிய A.யூனுஸ் அவர்கள் மர்ஹும் ஆகி விட்டார்கள். இன்ஷா அல்லாஹ் நாளை திங்கள் கிழமை (13-06-2011) காலை 10 மணிக்கு நல்லடக்கம் மீராப்பள்ளியில்.

இன்னாலில்லாஹி வ இன்னா இலைஹி ராஜிவூன்.

பரங்கிப்பேட்டை அருகே தகராறு: தந்தை, மகன் மீது தாக்குதல்; கார் கண்ணாடி உடைப்பு; 6 பேர் கைது!

2011-06-12T17:00:00.003+05:30

பரங்கிப்பேட்டை அருகே ஏற்பட்ட தகராறில் தந்தை, மகனை தாக்கி, கார் கண் ணாடியை உடைத்த 6 பேரை போலீசார் கைது செய்தனர்.மேலும் 2 பேரை தேடி வருகின்றனர்.

பரங்கிப்பேட்டை அருகே உள்ள சின்னூர் கிராமத்தில் அம்மன்கோவில் கும்பாபிஷேகம் சமீபத்தில் நடந்தது.கும்பாபிஷேகத்தையொட்டி நேற்று முன்தினம் இரவு பாட்டுக்கச்சேரி நடந்தது.இதை பார்ப்பதற்காக பரங்கிப்பேட்டையை சேர்ந்த சேகர் மனைவி செல்வி (வயது 37).அவரது மகன் ரகு (24) ஆகிய 2 பேரும் சின்னூர் வழியாக நடந்து சென்று கொண்டிருந்தனர்.

அவர்கள் குட்டியாண்டவர் கோவில் அருகே சென்ற போது பரங்கிப்பேட்டை மாதாகோவில் தெருவை சேர்ந்த சத்தியராஜ், வினோத் குமார், முரளி உள்பட 8 பேர் ஆபாசமாக பேசிக் கொண்டிருந்தனர். இதை அந்த வழியாக சென்ற செல்வி தட்டிக் கேட்டார். இதில் ஆத்திரமடைந்த சத்திய ராஜ் மற்றும் சிலர் அவரிடம் வாக்கு வாதம் செய்தனர்.

இதை செல்வி மகன் ரகு தட்டிக் கேட்டார். அவரை சத்தியராஜ், வினோத்குமார், செந்தில்குமார், சரவணன், முரளி, மகேஷ், சுந்தர்ராஜ், சதீஷ் ஆகிய 8 பேரும் தாக்கினர்.சம்பவம் கேள்விபட்டு வந்த ரகுவின் தந்தை சேகரையும் அவர்கள் தாக்கினர்.

இந்த தாக்குதலின் போது சலங்குகார தெருவை சேர்ந்த சரவணன் என்பவருக்கு சொந்தமான காரை டிரைவர் நடராஜன் அங்கு நிறுத்தினார். இதை பார்த்த சத்தியராஜ் உள்பட 8 பேரும் சேர்ந்து கார் கண்ணாடியை அடித்து உடைத்து சேதப்படுத்தி விட்டு சென்றனர். இதற்கிடையில் இந்த தாக்குதலில் காயமடைந்த ரகு,சேகர் ஆகிய 2 பேரும் சிதம்பரம் அரசு மருத்துவமனையில் அனுமதிக்கப்பட்டனர். அங்கு அவர்களுக்கு சிகிச்சை அளிக்கப்பட்டு வருகிறது.

இது பற்றி கார் டிரைவர் நடராஜன் பரங்கிப்பேட்டை போலீசில் புகார் செய்தார். அதன்பேரில் போலீஸ் இன்ஸ்பெக்டர் ராமகிருஷ்ணன், சப்-இன்ஸ்பெக்டர் சீனுவாசன் ஆகியோர் வழக்குப் பதிவு செய்து சத்தியராஜ், செந்தில் குமார், முரளி, மகேஷ், சுந்தர்ராஜ், சதீஷ் ஆகிய 6 பேரையும் கைது செய்தனர். தலைமறைவாக உள்ள வினோத்குமார், சரவணன் ஆகிய 2 பேரையும் தேடி வருகிறார்கள்.

நன்றி: தினத்தந்தி

இப்படியும் கேன்சர் வரும்!!!

2011-06-12T12:30:00.004+05:30

ஐ.நா. உலக சுகாதார அமைப்பின் சர்வதேசப் புற்றுநோய் ஆராய்ச்சி நிறுவனம் மே 26 தொடங்கி ஜூன் 2-ம் தேதி வரை எட்டு நாள் மாநாடு ஒன்றை பிரான்ஸில் நடத்தியது. 14 நாடுகளைச் சேர்ந்த 31 விஞ்ஞானிகள் கலந்துகொண்ட இந்த மாநாட்டில் புற்று நோய் தடுப்பு குறித்தும் அதற்கான நவீன சிகிச்சைகள் குறித்தும் விவாதங்களும் ஆய்வுக் கட்டுரைகளும் எடுத்து வைக்கப்பட்டன. இந்த மாநாட்டில்தான், 'செல்போன் பயன்படுத்துவதால் மூளைப் புற்று நோய் வரலாம்’ என்ற அபாய அறிவிப்பை வெளியிட்டு அதிரவைத்து இருக்கிறார்கள்.

தினமும் அரை மணி நேரம் செல்போனில் பேசுகிறவர்களிடம் கடந்த 10 ஆண்டுகளாக நடத்தப்பட்ட ஆய்வுகளின் அடைப்படையில் இந்த அறிவிப்பு வெளியிடப்படுவதாகச் சொன்ன விஞ்ஞானிகள், ''புற்று நோய் வரலாம் என்பது எச்சரிக்கைதானே தவிர இன்னும் முழுமையாக உறுதிப்படுத்தப்படவில்லை. ஆனால், சமீபகாலமாக மூளைப் புற்று அதிகரித்து வருவதற்கு செல்போன் உபயோகிப்பதற்கும் தொடர்பு இருக்கலாம்...'' என்று சொல்கிறார்கள்.

இதுகுறித்து மதுரை அப்போலோ மருத்துவமனையின் புற்று நோய் மற்றும் கதிரியக்க சிகிச்சை நிபுணர் டாக்டர் அமர்நாத்திடம் பேசினோம். ''வாகனப் புகை, சிகரெட் புகை, தொழிற்சாலை நச்சு போன்றவை போலவே, செல்போன்களில் இருந்து பரவும் மின் காந்த அலைகளும் நமது உடலில் நிச்சயம் பாதிப்பை உண்டாக்கும். அது மூளைப் புற்றாக இருக்கலாம் என்று உலக சுகாதார அமைப்பு எச்சரிக்கை மணி அடித்துள்ளது. இன்னும் ஆய்வுகள் முழுமையடையவில்லை. அநேகமாக ஜூலை மாதத்தில் முதல் கட்ட ஆய்வு முடிவுகள் அதிகாரபூர்வமாக வெளியாகலாம்.

கதிரியக்கத்தின் அளவுக்கு இல்லை என்றாலும்கூட, மின் காந்த அலைகள் நமது உடலின் மரபணுக்களுக்கு பாதிப்புகளை உண்டாக்குகிறது. குறிப்பாக மின்காந்த அலைகளானது, நமது மூளையில் உள்ள மரபு அணுக்களைத் தாக்குகிறது. இந்தத் தாக்குதல் தொடர்ந்து கொண்டே இருந்தால்... மூளைப் புற்று கட்டாயம் வந்துவிடும். செல்போனை அதிகநேரம் காதில் வைத்துப் பேசுவதால் காது நரம்புகளிலும் ஒரு வகையான கட்டி உருவாகலாம். இது சாதாரணக் கட்டியாகவும் இருக்கலாம்... கேன்சராக மாறவும் வாய்ப்பு உண்டு.

செல்போன்களை அதிகம் பயன்படுத்தும் ஆண்களின் விந்தில் உள்ள உயிரணுக்கள் அழிக்கப்படுகிறது. அதனால் தாம்பத்ய உறவு பாதிக்காது என்றாலும் குழந்தை பிறப்பதில் சிக்கல் ஏற்படும். அப்படியே பிறந்தாலும் ஊனமாக இருக்க வாய்ப்பு அதிகம். பெண்களுக்கு கருச்சிதைவு வாய்ப்பும் உண்டு!'' என்று அதிர வைத்தார்.அவரே தொடர்ந்து, ''அமெரிக்கா, நியூஸிலாந்து, ஆஸ்திரேலியா, கனடா போன்ற வளர்ச்சியடைந்த நாடுகளில், ஒரு பொருளால் பாதிப்பு ஏற்படுவது உறுதியாகத் தெரிந்தால், உடனடியாக தடுப்பு நடவடிக்கைகளையும் விழிப்பு உணர்வு பிரசாரங்களையும் முடுக்கிவிடப்படுகிறது. இந்த விஷயத்தில் தெளிவான உறுதியான ஆராய்ச்சி முடிவு களுக்காக அவர்கள் காத்திருக்கிறார்கள். நம் நாட்டிலும், டெல்லியில் உள்ள ஜவஹர்லால் நேரு இன்ஸ்டிட்யூட்டில் இதற்கான ஆராய்ச்சிகள் நடக்கின்றன. செல்போன் பாதிப்புகள் குறித்து உலக சுகாதார அமைப்பு எச்சரித்தாலும் நம்முடைய இண்டியன் கவுன்சில் ஆஃப் மெடிக்கல் ரிசர்ச் அமைப்பு, 'உலக சுகாதார அமைப்பின் அறிக்கை குறித்து இந்தியாவில் யாரும் அச்சப்படத் தேவை இல்லை. உடற்கூறுகளில் இந்தியர்களுக்கும் ஐரோப்பிய மற்றும் அமெரிக்க மக்களுக்கும் நிறையவே வேறுபாடுகள் இருப்பதால் அங்கு நடத்தப்பட்ட ஆய்வுகளை வைத்து நாம் ஒரு முடிவுக்கு வரமுடியாது. நம் நாட்டின் ஆராய்ச்சி முடிவுகள் வந்தால்தான் உறுதியாகச் சொல்ல முடியும்’ என்கிறார்கள். இது இந்திய செல்போன் வியாபாரத்தை பாதித்துவிடக் கூடாது என்பதற்காகச் சொல்லப்படும் கருத்தாகவே தெரிகிறது.

உலகம் முழுவதும் 5 பில்லியன் மனிதர்களின் கைகளில் செல்லப் பிள்ளையாய் இருக்கிறது செல்போன். அதிலும், இந்தியர்கள்தான் அதிக நேரம் செல்போனைப் பயன்படுத்துகிறார்கள். புற்று நோய் குறித்த தகவல்கள் இன்னமும் உறுதிப்படுத்தப்படவில்லை என்றாலும், நம்மை நாமே காத்துக் கொள்ளும் நடவடிக்கைகளில் இப்போதே இறங்குவது நல்லது. செல்போன்களை எப்போதும் உடம்புடன் ஒட்டியே வைத்திருக்க வேண்டியது இல்லை. அதிகநேரம் பேசுவதைத் தவிர்க்கலாம்... அவசியம் ஏற்பட்டால் ஹெட் போன்களை பயன்படுத்தலாம். தூங்கும் நேரத்தில், தலையணைக்கு அருகில் செல்போன் வைப்பதை கண்டிப்பாகத் தவிர்க்க வேண்டும்!'' என்று ஆலோசனையும் தருகிறார்.

அளவுக்கு மிஞ்சினால் அமிர்தமும் நஞ்சு என்பதால்... செல்போனை தேவைக்கு 'மட்டும்’ பயன்படுத்தித் தள்ளி வைப்போமே!

நன்றி:- ஜூனியர் விகடன்

சிங்கப்பூர் காசினோ: மிகத் தெளிவாக ஒரு சூதாட்ட பிசினெஸ் பிளான்!

2011-06-11T21:45:00.000+05:30

சிங்கப்பூர்: உலக அளவில் சூதாட்டத்தின் (காசினோ) அதிகப்படி வருமானம் கிடைக்கும் ஸ்பாட், Macau (ஹாங்காங்) என்பது உண்மைதான். ஆனால், அங்கிருந்து 5 மணிநேர விமானப் பயணத்தில் உள்ள சிங்கப்பூர்தான்.

மார்னிங் ஸ்டார் நிறுவனத்தின் பொருளாதார அதிகாரி சாட் மோல்மன், “சிங்கப்பூரின் காசினோ மாடலைத்தான், தற்போது மற்றைய ஆசிய நாடுகளும் பின்பற்றத் தொடங்கியுள்ளன. காரணம், இது ஒரு மிகத் தெளிவான, எளிமையான பிசினெஸ் பிளான். நஷ்டம் ஏற்படவே சாத்தியமில்லாத வர்த்தக செட்டப்” என்கிறார்.

அவர் குறிப்பிடுவது சிங்கப்பூரிலுள்ள மரீனா பே சான்ட்ஸ் கசீனோவை.

மரீனா பே சான்ட்ஸ் கசீனோ, சிங்கப்பூரிலுள்ள இரு பிரதான கசீனோக்களில் ஒன்று. இது அமெரிக்க முதலீடு. லாஸ் வேகஸ் சான்ட்ஸின் ஆசியப் பதிப்பு. இரண்டாவது காசினோ, ரிசாட்ஸ் வேர்ல்ட் சிங்கப்பூர். இது மலேசிய முதலீடு.

சாட் மோல்மன் கூறியதுபோல, இவை இரண்டுமே மிக தெளிவான வியாபார முயற்சிகள்தான். இரண்டும், ஒன்றுடன் ஒன்று போட்டியிடவில்லை. மிக எளிமையாக, கஸ்டமர்களைத் தமக்கிடையே பங்கிட்டுக் கொள்கிறார்கள்.

அது எப்படி?

மிகச் சுலபம். இரு நிறுவனங்களும் இலக்கு வைக்கும் கஸ்டமர்கள் வெவ்வேறு. மரீனா பே சான்ட்ஸ் இலக்கு வைப்பது, கன்வென்ஷன் ரக கஸ்டமர்களை. பிசினெஸ் மீட்டிங்களுக்கான இடவசதி, ஹெ-என்ட் ரெஸ்ட்டாரென்ட் என்று இவர்களது உலகம் தனியானது.

எல்லாமே குரூப் கஸ்டமர்கள்தான் இவர்களது இலக்கு. காட்டில் தொலைந்துபோன ஆட்டுக்குட்டிபோல, எப்போதாவதுதான் ஒரு தனிநபரைக் காணமுடியும்.

ஆனால், ரிசாட்ஸ் வேர்ல்ட் இலக்கு வைப்பது குடும்பங்களை. இங்கு கன்வென்ஷன் குரூப்களைக் காண முடியாது. தீம் பார்க், அந்த விளையாட்டு. இந்த விளையாட்டு என்று குடும்பம் குடும்பமாகக் கவர்வதுதான் இவர்களது பாணி.

இப்படி தம்மிடையே போட்டியில்லாமல் கஸ்டமர்களைத் தமக்கிடையே பங்கி்ட்டுக் கொள்ளும் வர்த்தகங்கள், மிக அபூர்வம். அதனால்தான் சிங்கப்பூரின் காசினோ மாடலைப் பின்பற்ற மற்றைய ஆசிய நாடுகள் விரும்புகின்றன.

இரு நிறுவனங்களின் குறிக்கோளும் ஒன்றே. சிங்கப்பூர் என்ற நாட்டின் குறிக்கோளும் அதுவே. அது என்ன குறிக்கோள்? உல்லாசப் பயணிகளிடமிருந்து சைட்-ட்டராக்காகப் பணம் சம்பாதிப்பது. இதில் ‘சைட்-ட்ராக்காக’ என்பது முக்கியம். காரணம், அது மாறினால், வேறு சாயம் பூசப்பட்டுவிடும்.

உதாரணமாக, அமெரிக்காவின் லாஸ் வேகஸை, அல்லது ஹாங்காங்கின் மக்காவை எடுத்துக்கொள்ளுங்கள். இந்த இரு இடங்களிலும் சூதாட்டம் சைட்-ட்ராக்காக இல்லை. பிரதான வர்த்தகமே அதுதான். அப்படியான தோற்றம், காலப்போக்கில் பல கஸ்டமர்களை அங்கிருந்து ஒதுங்க வைத்துவிடும்.

வேறு ஒரு நகரம் காசினோவுக்குப் புகழ்பெறத் தொடங்கினால், கஸ்டமர்களின் ஒருபகுதி அங்கே போய்விடுவார்கள். வேறு ஒரு பகுதியினருக்கு, இந்த செட்டப்பே அலுத்துப்போய், வேறு இடங்களை நாடத் தொடங்கிவிடுவார்கள். (கடந்த வருடம் லாஸ் வேகஸின் கசீனோ வருமானம், 2009ம் ஆண்டு வருமானத்தில் 74 சதவீதம்தான்!)

ஆனால், சிங்கப்பூருக்கு வருபவர்கள் சூதாட மாத்திரம் வருவதில்லை என்று உறுதிப்படுத்திக் கொள்கின்றது சிங்கப்பூர் அரசு. வருபவர்களுக்கு மற்றைய ஆப்ஷன்களும் இருக்குமாறு பார்த்துக் கொள்கின்றது. சுருக்கமாகச் சொன்னால், ஒரு டிப்பிக்கல் உல்லாசப் பயணியின் ‘பார்க்க வேண்டிய பட்டியலில்’ காசினோவும் ஒன்று.

பட்டியலில், இதைவிட வேறு விடயங்களே அதிகம் இருக்குமாறு பார்த்துக் கொள்ளப்படுகின்றது.

இந்த இரு காசினோக்களுக்கும் வருட டேர்ன்ஓவர், 3 பில்லியன் டாலர். வருமானத்தை விடுங்கள். இரு காசினோக்களும் சிங்கப்பூரில் இயங்க அனுமதி கொடுக்கப்பட்டபின், உல்லாசப் பயணிகளின் எண்ணிக்கை 20% அதிகரித்திருக்கின்றது.

மொத்தத்தில், நிறுவனங்களுக்கும் சந்தோஷம்! அரசுக்கும் ஆனந்தம்!!

இறப்புச் செய்தி

2011-06-11T21:38:00.000+05:30

தெசன் தைக்கால் தெரு, மர்ஹும் முஹம்மது அப்துல் காதர் மரைக்காயர் அவர்களின் மகளாரும், பீர்கான் அவர்களின் மனைவியும், முஹம்மது முராது, நகுதா மரைக்காயர், ஜாபர் அலி ஆகியோரின் சகோதரியும் ஆகிய ரோஜா (எ) கவுஸ் பீவி மர்ஹும் ஆகிவிட்டார்கள். இன்ஷா அல்லாஹ் நாளை பகல் 12 மணிக்கு நல்லடக்கம் புதுப்பள்ளியில். இன்னாலில்லாஹி வஇன்னா இலைஹி ராஜுவூன்.

ரூ. 200 கோடிக்கும் மேலான மக்களின் பணம் என்ன ஆவது?

2011-06-11T08:30:00.004+05:30

தமிழகத்தில் ஆட்சி மாற்றம் ஏற்பட்டதற்கு பின்னர் தமிழக அரசின் கொள்கை முடிவிற்கு எதிரான முதல் தீர்ப்பு ஒன்றினை சென்னை உயர்நீதி மன்றம் வழங்கியுள்ளது. சமச்சீர் கல்விச் சட்டம் தொடர்பாக தமிழக அரசு மேற்கொண்ட சட்ட திருத்தத்துக்கு சென்னை உயர் நீதிமன்றம் இடைக்காலத் தடை விதித்துள்ளது.

திமுகவினரைப் பற்றிய பிரசாரத்துக்கு பயன்படும் வகையில் சமச்சீர் கல்வி பாடப் புத்தகங்கள் தயாரிக்கப்பட்டுள்ளதாகக் கூறி, அத்திட்டத்தைத் தள்ளிப்போடும் வகையில் சட்டப் பேரவையில் சமச்சீர் கல்வி முறை (திருத்தச்) சட்ட மசோதா கொண்டுவரப்பட்டது.

இதற்கு எதிர்ப்புத் தெரிவித்து பொதுப் பள்ளிகளுக்கான மாநில மேடை மற்றும் பூந்தமல்லியைச் சேர்ந்த ஓய்வு பெற்ற ஆசிரியை மனோன்மணி ஆகியோர் சென்னை உயர் நீதிமன்றத்தில் மனு தாக்கல் செய்தனர். இந்த மனுக்கள் தலைமை நீதிபதி எம்.ஒய். இக்பால், நீதிபதி டி.எஸ். சிவஞானம் ஆகியோரைக் கொண்ட முதல் பெஞ்ச் முன்பு வியாழக்கிழமை விசாரணைக்கு வந்தது.

அப்போது தமிழக அரசின் சார்பில் அரசு தலைமை வழக்கறிஞர் நவநீதகிருஷ்ணன், ஆர். கிருஷ்ணமூர்த்தி உள்ளிட்டோர் ஆஜராகி வாதிட்டனர். இரு தரப்பு வாதங்களையும் கேட்ட நீதிபதிகள் விசாரணையை வெள்ளிக்கிழமைக்கு ஒத்திவைத்தனர்.

இந்த வழக்கு வெள்ளிக்கிழமை காலை மீண்டும் விசாரணைக்கு வந்தது. தொடர்ந்து இரு தரப்பு வாதங்களையும் கேட்ட தலைமை நீதிபதி எம்.ஒய். இக்பால், சமச்சீர் கல்விச் சட்டம் தொடர்பாக தமிழக அரசு கொண்டுவந்த சட்ட திருத்தத்துக்கு இடைக்கால தடை விதித்து உத்தரவிட்டார்.

அவருடைய உத்தரவில் கூறியிருப்பதாவது:

தமிழகத்தில் புதிய அரசு பொறுப்பேற்ற பின்னர், சமச்சீர் கல்வி தொடர்பாக ஆலோசனை நடத்துவதற்காக மே மாதம் 22-ம் தேதிதான் முதல் அமைச்சரவைக் கூட்டம் நடைபெற்றுள்ளது. பின்னர் மே 23-ம் தேதி நடத்தப்பட்ட கூட்டத்தில் சமச்சீர் கல்வி பாட புத்தகங்களுக்குப் பதிலாக, பழைய பாடத் திட்டத்தின்படி புத்தகங்களை அச்சடிக்க அமைச்சரவை முடிவெடுத்துள்ளது.

ஒரே நாளில் அமைச்சரவை இந்த முடிவை எடுத்தது எப்படி? இதுபோல் நிபுணர்கள் குழு ஒன்று, ஒன்றாம் வகுப்பு முதல் 10-ம் வகுப்பு வரையிலான பாட புத்தகங்கள் அனைத்துக்குமான பாடத் திட்டங்களை ஒரே நாளில் ஆய்வு செய்து சமர்ப்பிப்பது என்பதும் இயலாத காரியம்.

இந்த விவகாரத்தில் தமிழக அரசு எடுத்த நடவடிக்கைகள் அனைத்தும் அவசரத்தில் எடுக்கப்பட்டவை என்பது தெளிவாகிறது.

மேலும், சமச்சீர் கல்வி முறை (திருத்த) சட்ட மசோதா கொண்டுவருவதற்கான காரணம், உரிய ஆதாரங்களுடன் நீதிமன்றத்தில் தெரிவிக்கப்படவில்லை.

தமிழக அரசின் இந்த முடிவு நடைமுறைப்படுத்தப்படுமானால் 9 கோடி சமச்சீர் பாட புத்தகங்களை அச்சடிப்பதற்காக செலவிடப்பட்ட ரூ. 200 கோடிக்கும் மேலான மக்களின் பணம் என்ன ஆவது?

பழைய பாடத்திட்டத்தின் கீழ் புதிதாக புத்தகங்களை அச்சடித்து, தமிழகம் முழுவதும் உள்ள 45 ஆயிரம் அரசு பள்ளிகளுக்கும், 11 ஆயிரம் மெட்ரிக் பள்ளிகளுக்கும், 50 ஆங்கிலோ-இந்தியன் பள்ளிகளுக்கும், 25 ஓரியன்ட்டல் பள்ளிகளுக்கும் விநியோகிப்பது என்பது இயலாத காரியமாகும்.

ஏற்கெனவே 2010-11-ம் கல்வியாண்டில் பள்ளிகளில் 1-ம் வகுப்பு மற்றும் 6-ம் வகுப்புகளில் சமச்சீர் கல்வி முறை நடமுறைப்படுத்தப்பட்டுள்ளது. இப்போது இதை நீக்கிவிட்டு பழைய கல்வி முறையை கொண்டுவருவது என்பது, சமச்சீர் கல்வித் திட்டம் சரியானதுதான் என கடந்த ஆண்டு உயர் நீதிமன்றம் அளித்த உத்தரவுக்கே எதிரானதாக அமைந்துவிடும்.

எனவே, மாணவர் சமுதாயத்தின் நலனையும் கருத்தில் கொண்டு, பழைய கல்வி முறையை அமல்படுத்துவதற்கு இந்த நீதிமன்றம் அனுமதி மறுக்கிறது. தமிழக அரசு கொண்டுவந்த சமச்சீர் கல்வி முறை (திருத்த) சட்ட மசோதாவுக்கு இடைக்காலத் தடை விதிக்கப்படுகிறது.

இதன்படி, 2011-12 கல்வியாண்டில் 1-ம் வகுப்பு முதல் 10-ம் வகுப்பு வரை சமச்சீர் கல்வி முறையையே அமல்படுத்த வேண்டும்.அதே நேரம், சமச்சீர் கல்வி பாட புத்தகங்களில் தேவையான பக்கங்களை நீக்கவோ அல்லது சேர்க்கவோ தமிழக அரசு மேற்கொள்ளும் நடவடிக்கைகளுக்கு இந்த நீதிமன்றம் தடை விதிக்கவில்லை.

இந்த பாட புத்தகங்களில் குறிப்பிட்ட அரசியல் கட்சியையோ அல்லது தனி நபரையோ முன்னிருத்தும் வகையிலான பகுதிகள் இடம்பெறுவது தவிர்க்கப்பட வேண்டும். இவ்வாறு உத்தரவில் தெரிவிக்கப்பட்டுள்ளது.

மேலும், இந்த விவகாரம் தொடர்பான முக்கிய வழக்கில், அரசுத் தரப்பு பதில் மனு தாக்கல் செய்யவேண்டும் என்றும் உத்தரவில் தலைமை நீதிபதி எம்.ஒய். இக்பால் கூறியுள்ளார்.

நன்றி: தினமணி

பூண்டியாங்குப்பத்தில் பஸ் கவிழ்ந்தது

2011-06-10T14:24:00.001+05:30

சென்னையில் இருந்து வேளாங்கண்ணிக்கு நேற்று இரவு ஆம்னி பஸ் ஒன்று புறப்பட்டது. இன்று அதிகாலை கடலூர் அருகே பூண்டியாங்குப்பம் என்ற இடத்தில் பஸ் சென்று கொண்டிருந்தபோது திடீரென்று நிலை தடுமாறி ரோட்டு ஓரத்தில் இருந்த மரத்தில் மோதி 10 அடி பள்ளத்தில் கவிழ்ந்தது. பயணிகள் அலறல் சத்தம் கேட்டு கிராம மக்கள் விரைந்து வந்து பஸ்சுக்குள் சிக்கிய பயணிகளை மீட்டனர். இந்த விபத்தில் 20 பேர் காயம் அடைந்தனர். அவர்கள் மருத்துவமனையில் அனுமதிக்கப்பட்டனர்

சிறந்த பள்ளிகளில் பிளஸ் 1 பயில அரசு உதவித் தொகைக்கு அணுகலாம்

2011-06-09T14:19:00.003+05:30

அரசுப் பள்ளிகளில் 10-ம் வகுப்பு படித்து, அதிக மதிப்பெண் பெற்ற மாணவர்கள்,தமிழகத்தின் சிறந்த தனியார் பள்ளிகளில் பயில, உதவித் தொகை பெறுவதற்கு அணுகலாம் என்று கடலூர் மாவட்ட ஆட்சியர் வி. அமுதவல்லி அறிவித்து உள்ளார்.

ஆட்சியர் செவ்வாய்க்கிழமை வெளியிட்ட செய்திக் குறிப்பு:

கடலூர் மாவட்ட அரசுப் பள்ளிகளில் படித்து, 10-ம் வகுப்பு பொதுத் தேர்வில் அதிக மதிப்பெண் பெற்ற மாணவர்கள் இச்சலுகையைப் பெறலாம். பிற்படுத்தப்பட்ட வகுப்பைச் சேர்ந்த 3 மாணவர்கள், 3 மாணவிகள் மற்றும் மிகப்பிற்படுத்தப்பட்டோர் மற்றும் சீர்மரபினர் 2 மாணவர்கள், 2 மாணவிகள் ஆக மொத்தம் 10 மாணவர்கள் இச்சலுகையைப் பெறுவதற்குத் தேர்ந்தெடுக்கப்படுவார்கள்.

தேர்ந்தெடுக்கப்படும் மாணவர்கள், அவர்கள் விரும்பும் தமிழகத்தில் தலைசிறந்த தனியார் மேல்நிலைப் பள்ளிகளில் சேர்ந்து, பிளஸ் 1, பிளஸ் 2 வகுப்பில் பயில நிதி உதவி வழங்கப்படும். இத்திட்டத்தில் உதவிபெற விரும்பும் மாணவர்களின் பெற்றோர் ஆண்டு வருமானம் ரூ.1 லட்சத்துக்கு மிகாமல் இருக்க வேண்டும்.

இத்திட்டத்தில் தேர்ந்தெடுக்கப்படும் மாணவருக்கு, ஆண்டுக்கு ரூ.28 ஆயிரத்துக்கு மிகாமல் 2 ஆண்டுகளுக்கு, மொத்தம் ரூ.56 ஆயிரம் நிதிஉதவி அளிக்கப்படும்.

தகுதி உள்ள மாணவ மாணவியர் கடலூர் மாவட்ட பிற்பட்டோர் நல அலுவரை அணுகுமாறு கேட்டுக் கொள்ளப்படுகிறார்கள் என்று அந்த செய்திக் குறிப்பு தெரிவிக்கிறது.

வத்தக்கரை தீ விபத்தில் பாதிக்கப்பட்டவர்களுக்கு நிதியுதவி: அமைச்சர் உறுதி

2011-06-09T14:06:00.003+05:30

சிதம்பரம் சட்டப்பேரவை உறுப்பினர் கே.பாலகிருஷ்ணன் கோரிக்கையை ஏற்று பரங்கிப்பேட்டை அன்னங்கோயிலில் தீவிபத்தில் பாதிக்கப்பட்ட மீனவர்களுக்கு உரிய நிவாரணம் வழங்கிட மீன் வளத்துறை அமைச்சர் உறுதி அளித்துள்ளார்.

பரங்கிப்பேட்டை அன்னங்கோயில் பகுதியில் கடந்த மே 9-ம் தேதி ஏற்பட்ட திடீர் தீவிபத்தில் தனியாருக்கு சொந்தமான 33 மீன் விற்பனை மையங்கள் சேதமடைந்து 1 கோடியே 79 லட்சத்து 5 ஆயிரத்து 690 ரூபாய் இழப்பு ஏற்பட்டு வாழ்வாதாரமே கேள்விக்குறியானது.

இது குறித்த விரிவான செய்திகள் புகைப்படங்களுடன் நமது MYPNOவில் ஏற்கனவே வெளியிடப்பட்டுள்ளன.

இந்நிலையில் சிதம்பரம் சட்டப்பேரவை உறுப்பினர் கே. பாலகிருஷ்ணன் அப்பகுதிக்கு நேரில் சென்று பார்வையிட்டு மீன் வியாபாரிகளுக்கு ஆறுதல் தெரிவித்தார்.

பாதிக்கப்பட்ட அன்னங்கோயில் மீன் வியாபாரிகளுக்கு உரிய நஷ்ட ஈடு வழங்கி வேண்டியும்இ மீண்டும் அவர்களது வாழ்வாதார உரிமையை பெற்றுத்தருமாறு தமிழக மீன்வளத்துறை அமைச்சரை கடந்த ஜூன் 6-ம் தேதி சந்தித்து கோரிக்கை விடுத்தார்.

சட்டப்பேரவை உறுப்பினர் கோரிக்கையை ஏற்று முதல்வரின் கவனத்திற்கு கொண்டு சென்று உரிய நிவாரணம் வழங்குவதாக மீன்வளத்துறை அமைச்சர் உறுதியளித்துள்ளார் என சட்டப்பேரவை உறுப்பினர் அலுவலக செயலாளர் கோ.பழநி தெரிவித்துள்ளார்.

ஜெயலலிதா வழக்கு: பரங்கிப்பேட்டையில் 37வது முறையாக ஒத்திவைக்கப்பட்டது

2011-06-09T13:51:00.003+05:30

தேர்தல் கமிஷன் சார்பில் அதிமுக பொதுச்செயலாளரும் தமிழக முதல்வருமான ஜெயலலிதா மீது 2001-ம் ஆண்டு போடப்பட்ட வழக்கின் விசாரணை 37-வது முறையாக திங்கள்கிழமை பரங்கிப்பேட்டை நீதிமன்றத்தில் ஒத்தி வைக்கப்பட்டது.

அதிமுக பொதுச்செயலாளர் ஜெயலலிதா கடந்த 2001-ம் ஆண்டு நடைபெற்ற சட்டப் பேரவைத் தேர்தலில் ஆண்டிப்பட்டி, கிருஷ்ணகிரி, புதுக்கோட்டை, புவனகிரி ஆகிய 4 தொகுதிகளில் போட்டியிட வேட்பு மனு தாக்கல் செய்தார். இது தேர்தல் விதிமுறைகளை மீறிய செயல் என்று கூறி அவர் மீது தேர்தல் கமிஷன் வழக்கு தொடர அனுமதி அளித்து உயர்நீதிமன்றம் உத்தரவு பிறப்பித்தது.

அதன் அடிப்படையில் புவனகிரி தொகுதி தேர்தல் அதிகாரி செல்வமணி, பரங்கிப்பேட்டை நீதிமன்றத்தில் கடந்த 2007-ம் ஆண்டு ஜூலை 9-ம் தேதி வழக்கு தொடர்ந்தார்.

பின்னர் விசாரணைக்கு தடை கோரி ஜெயலலிதா உச்ச நீதிமன்றத்தில் தாக்கல் செய்த மனுவின் அடிப்படையில் உச்சநீதிமன்றம் இடைக்கால தடை உத்தரவு பிறப்பித்தது. தடை உத்தரவினால் இதுவரை இவ்வழக்கு 36 முறை ஒத்தி வைக்கப்பட்டுள்ளது.

இந்நிலையில் இவ்வழக்கு பரங்கிப்பேட்டை நீதிமன்றத்தில் ஜூன் 6-ம் தேதி திங்கள்கிழமை விசாரணைக்கு வந்தது. நீதிபதி கோமதி இவ்வழக்கை ஜூன் 27-ம் தேதிக்கு ஒத்தி வைத்து உத்தரவிட்டார்.

ஆட்சியருடன் ஜமாஅத் நிர்வாகிகள் சந்திப்பு..!

2011-06-08T21:18:00.005+05:30

கடலூர் மாவட்டத்தின் புதிய ஆட்சியராக பொறுப்பேற்றிருக்கும் அமுதவல்லி-யை இன்று மாலை பரங்கிப்பேட்டை இஸ்லாமிய ஐக்கிய ஜமாஅத்தின் சார்பில் ஜமாஅத் தலைவர் M.S.முஹம்மது யூனுஸ் தலைமையில், ஜமாஅத் நிர்வாகிகள் ஹமீது கவுஸ், ஹாஜா கமால், உதுமான் அலி, ஜி.எம்.கவுஸ், அலாவுதீன் ஆகியோர்கள் மரியாதை நிமித்தமாக சந்தித்து வாழ்த்து தெரிவித்ததாக இஸ்லாமிய ஐக்கிய ஜமாஅத் வெளியிட்டுள்ள செய்திக்குறிப்பு தெரிவிக்கிறது

..ம்ஹும்., கெடயாதாம்...!

2011-06-08T12:45:00.004+05:30

திமுக எம்பி கனிமொழி மற்றும் கலைஞர் டிவி நிர்வாக இயக்குநர் சரத்குமார் ஆகியோர் தாக்கல் செய்த ஜாமீன் மனுக்களை தில்லி உயர்நீதிமன்றம் இன்று தள்ளுபடி செய்தது. முன்னதாக 2ஜி வழக்கில் கைது செய்யப்பட்டு திகார் சிறையில் அடைக்கப்பட்டுள்ள இருவரின் ஜாமீன் மனுக்களையும் விசாரணை நீதிமன்றம் மே 20-ம் தேதி தள்ளுபடி செய்திருந்தது. அதை எதிர்த்து கனிமொழியும், சரத்குமாரும் தில்லி உயர்நீதிமன்றத்தில் அப்பீல் மனு தாக்கல் செய்தனர். அந்த மனுக்களின் மீதான விசாரணை தில்லி உயர்நீதிமன்றத்தில் மே 30-ம் தேதி முடிவடைந்தது. அதன் மீது இன்று தீர்ப்பு அளிக்கப்பட்டது. 2ஜி ஊழலில் தொலைத்தொடர்பு முன்னாள் அமைச்சர் ஆ.ராசாவுடன் சேர்ந்து சதி செய்தார் என கனிமொழி மீது குற்றம்சாட்டப்பட்டுள்ளது.

தீர்ப்பு வாசிக்கப்படும்போது கனிமொழியின் தாயார் ராஜாத்தி அம்மாள், திமுக நாடாளுமன்ற குழுத் தலைவர் டி.ஆர்.பாலு ஆகியோர் நீதிமன்றத்தில் இருந்தனர்.

2ஜி ஊழல் பணத்தில் ஸ்வான் டெலிகாம் நிறுவனத்தில் இருந்து கலைஞர் டிவிக்காக ரூ 200 கோடியை பெற்றார் என நீதிமன்றத்தில் சிபிஐ தாக்கல் செய்த குற்றப்பத்திரிகையில் குறிப்பிடப்பட்டிருந்தது.

முன்னதாக சினியுக் பிலிம்ஸ் இயக்குநர் கரீம் மொரானியின் ஜாமீன் மனுவை பாட்டியாலா நீதிமன்றம் நிராகரித்தது. அவரது மனுவை நிராகரித்த நீதிபதி ஓ.பி.சைனி அவரை நீதிமன்றக் காவலுக்கு அனுப்ப உத்தரவிட்டார். ஜாமீன் மனு நிராகரிக்கப்பட்டவுடன் உடனடியாக அவர் கைது செய்யப்பட்டார்.

ரூ 214.84 கோடியை கடனாகப் பெற்றதாக கலைஞர் டிவியின் வரவுசெலவு கணக்கில் குறிப்பிடப்பட்டிருந்தது. அது சினியுக் பிலிம்ஸ் நிறுவனத்திடம் இருந்து பெறப்பட்டுள்ளது. கலைஞர் டிவிக்கு ரூ 214.86 கோடி அளித்ததாக சினியுக் பிலிம்ஸ் நிறுவனத்தின் 2009-10 ஆண்டு வரவுசெலவு கணக்கில் குறிப்பிடப்பட்டிருந்தது.

சினியுக் நிறுவனம் பால்வா மற்றும் மொரானி சகோதரர்களுக்கு சொந்தமானது. சினியுக் நிறுவனத்தின் வரவுசெலவு கணக்கின்படி, அந்த நிறுவனம் ஆசிப் பால்வாவுக்கு சொந்தமான குஸேகாவோன் நிறுவனத்திடம் இருந்து ரூ 212 கோடியை கடனாகப் பெற்றதாக குறிப்பிடப்பட்டிருந்தது.

ஆசிப் பால்வா டிபி ரியாலிட்டி நிறுவனத்தில் ஒரு இயக்குநராவார். டிபி ரியாலிட்டி நிறுவனம் ஸ்வான் டெலிகாம் நிறுவனத்தில் முதலீடு செய்துள்ளது குறிப்பிடத்தக்கது.

ஆம்னி பேருந்து விபத்து: பலர் பலி?

2011-06-08T00:22:00.006+05:30

சென்னையில் இருந்து திருப்பூருக்கு தனியார் ஆம்னி பஸ் 07-06-2011 இரவு சென்று கொண்டு இருந்தது. வேலூர் மாவட்டம் ஓச்சேரியை அடுத்த காவேரிப்பாக்கம் அருகே சற்று முன் சென்ற போது பஸ் திடீரென்று கட்டுப்பாட்டை இழந்து சாலையோரத்தில் இருந்த பாலத்தில் மோதி 15 அடி பள்ளத்துக்குள் தலை குப்புற கவிழ்ந்தது. இதில் அந்த பஸ் திடீரென்று தீப்பிடித்து எரிந்து விபத்துக்குள்ளானது. இந்த கோர விபத்தில் பஸ்சில் இருந்து டிரைவர் மட்டும் உயிரோடு மீட்கப்பட்டார். பஸ்சில் பயணம் செய்த அனைத்து பயணிகளும் தீயில் கருகி பலியாகி இருக்கலாம் என்று அஞ்சப்படுகிறது. சம்பவ இடத்துக்கு வேலூர் கலெக்டர் நாகராஜ் மற்றும் வேலூர் சரக டிஐஜி ஜெயராம், தீயணைப்புத்துறை வேலூர் சரக துணை இயக்குனர் டேவிட் வின்சென்ட் மற்றும் போலீஸ் அதிகாரிகள் விரைந்து வந்து மீட்பு பணியில் ஈடுபட்டு வருகிறார்கள்

முன்னர் வந்த செய்தி:

வேலூர் மாவட்டம் அவலூர் கிராமத்தில் உள்ளது சென்னை - பெங்களூர் தேசிய நெடுஞ்சாலை. இச்சாலையில் சென்னையில் இருந்து பெங்களூருக்கு 07.06.2011 அன்று இரவு தனியார் பேருந்து சென்றுகொண்டிருந்தது. பெங்களூரு நோக்கி சென்ற தனியார் பேருந்து மீது பின்னால் வந்த லாரி மோதியது. இதில் பேருந்து தீப்பிடித்து எரிந்தது. இந்த விபத்தில் யாரும் தப்பிக்க முடியததால் 27 பேர் உடல் கருகி உயிரிழந்ததாக கூறப்படுகிறது. இதுபற்றி தகவல் தெரிந்ததும் தீயணைப்பு மற்றும் காவல்துறையினர் சம்பவ இடத்திற்கு விரைந்தனர்.

இறப்புச் செய்தி

2011-06-06T20:48:00.005+05:30

காயிதே மில்லத் தெருவில் மர்ஹும் யூசுப் மியான் அவர்களின் பேரனும், மர்ஹும் ஆரிப் மியான் அவர்களின் மகனாரும் அஷ்ரப் அலி, ஷாஹ் அலி ஆகியோர்களின் சகோதரரும், கிள்ளை தைக்கால் பஷீர் அஹமது அவர்களின் மருமகனாருமாகிய ஹஸன் அலி என்கிற ஷாஹுல் ஹமீது அவர்கள் மர்ஹும் ஆகி விட்டார்கள். இன்ஷா அல்லாஹ் நாளை செவ்வாய்கிழமை (07-06-2011) காலை 10 மணிக்கு நல்லடக்கம் கும்மத்பள்ளியில்.

இன்னாலில்லாஹி வ இன்னா இலைஹி ராஜிவூன்

வரும் முன் காப்போம்..!

2011-06-05T10:47:00.004+05:30

பரங்கிப்பேட்டையின் பிரதான சாலைகளில் ஒன்றான வாத்தியாப்பள்ளி தெரு சாலையினை தான் படத்தில் காண்கிறீர்கள். தமிழ்நாடு அரசின் குடிநீர் வடிகால் வால்வு தொட்டி முறையான பாதுகாப்பு வசதியின்றி இப்படி இருக்கிறது. பேருந்து - கார், ஆட்டோ, இரு சக்கர வாகன போக்குவரத்து மிகுந்த இச்சாலையில் உள்ள தொட்டி அருகினில்தான் குழந்தைகளும் விளையாடி வருகின்றனர். அசம்பாவிதம் ஏதும் நேரும் முன் தகுந்த பாதுகாப்பு ஏற்பாடுகளை செய்ய வேண்டுமென்பதே அப்பகுதி மக்களின் எதிர்பார்ப்பு. தொடர்புடைய அரசுத்துறை நிர்வாகம் கவனிக்குமா?

மீன்பிடி தடைக்கால நிதியுதவி...!

2011-06-05T09:27:00.001+05:30

பரங்கிப்பேட்டை அடுத்த சி.புதுப்பேட்டையில் மீனவர்களுக்கு மீன்பிடி தடைக்கால நிதியுதவிக்கான காசோலை வழங்கும் விழா நேற்று நடந்தது. கலெக்டர் அமுதவல்லி தலைமை தாங்கினார். மீன்வளத்துறை உதவி இயக்குனர் ராதாகிருஷ்ணன் வரவேற்றார். எம்.எல்.ஏ., க்கள் பாலகிருஷ்ணன், முருகுமாறன் முன்னிலை வகித்தனர். 30 மீனவர்களுக்கு உதவி தொகையை சமூக நலத்துறை அமைச்சர் செல்வி ராமஜெயம் வழங்கி பேசுகையில், "தேர்தலின்போது கொடுத்த வாக்குறுதிகளை முதல்வர் ஜெயலலிதா நிறைவேற்றி வருகிறார். சமூக நலத்துறை மூலம் கணவனால் கைவிடப்பட்டவர்கள், ஆதரவற்றோர், மாற்றுத் திறனாளிகள் உள்ளிட்டவர்களுக்கு உதவி தொகைகள் உயர்த்தி வழங்கப்படுகிறது. மாற்று திறனாளிகளுக்கு தேவையான உதவிகளை செய்ய அரசு தயாராக உள்ளது' என்றார். விழாவில் , அ.தி.மு.க மாவட்ட செயலாளர் அருண்மொழித்தேவன், டி.ஆர்.ஒ., ராஜேந்திரன், ஆர்.டி.ஓ., இந்துமதி, பரங்கிப்பேட்டை அ.தி.மு.க., நகர செயலாளர் மாரிமுத்து, இளைஞரணி செயலாளர் சங்கர் உட்பட பலர் பங்கேற்றனர். மீன்வளத்துறை ஆய்வாளர் ரவிராஜன் நன்றி கூறினார்.

பரங்கிப்பேட்டையில் கலைஞர் பிறந்த நாள்

2011-06-05T08:39:00.000+05:30

பரங்கிப்பேட்டையில் முன்னாள் முதல்வர் கலைஞர் பிறந்த நாள் தி.மு.க-வினரால் கொண்டாடப்பட்டது, இதனையொட்டி அன்று காலை 8.30 மணியளவில், பரங்கிப்பேட்டை அரசு மருத்துவமனையில் சிகிச்சை பெறும் நோயாளிகளுக்கு பேரூராட்சி மன்ற தலைவர் M.S.முஹம்மது யூனுஸ் தலைமையில் பரங்கிப்பேட்டை ஒன்றிய தி.மு.க செயலாளர் - சேர்மன் முத்துபெருமாள் பழம், பிரட் வழங்கினார். இந்நிகழ்ச்சியில் நகர தி.மு.க. செயலாளர் J.பாண்டியன், பேரூராட்சி மன்ற துணைத் தலைவர் G.செழியன், மாவட்ட தி.மு.க பிரதிநிதியும் நகர இளைஞரணி அமைப்பாளருமான A.R.முனவர் உசேன், கவுன்சிலர்கள் M.G.M.ஹாஜா கமால், M.E.அஷ்ரப் அலி உட்பட பலர் பங்கேற்றனர்.அகரம் கொள்ளுமேடு பகுதியில் நடந்த கொடியேற்று நிகழ்ச்சிக்கு கிளைச் செயலர் சரவணன் தலைமை தாங்கினார்.

இறப்புச் செய்தி

2011-06-03T13:45:00.007+05:30

வல்லத்தம்பி மரைக்காயர் தெருவில் மர்ஹும் மஸ்தான் ஷா அவர்களின் மகனாரும், மர்ஹும் பிஸ்மில்லாஹ் சாபு அவர்களின் தம்பியும், அஹமது மரைக்காயர் அவர்களின் மாமாவுமாகிய ஷேக் யூசுப் அவர்கள் மர்ஹும் ஆகி விட்டார்கள். இன்ஷா அல்லாஹ் இன்று வெள்ளிக்கிழமை (03-06-2011) மாலை 7 மணிக்கு நல்லடக்கம் புதுப்பள்ளியில்.

இன்னாலில்லாஹி வ இன்னா இலைஹி ராஜிவூன்

பரங்கிப்பேட்டையில் எளிமையுடன் துவங்கியது 20கி இலவச அரிசித் திட்டம்!

2011-06-02T13:03:00.000+05:30

பரங்கிப்பேட்டை: தமிழக அரசின் இலவச அரிசி வழங்கும் பணி பரங்கிப்பேட்டை நியாய விலை கடைகளில் எளிமையுடன் நேற்று துவங்கியது. முறைகேடுகளை தவிர்க்க அதிகாரிகள் குழுவினர் திடீர் ஆய்வு மேற்கொண்டனர். தமிழக முதல்வராக கடந்த 16ம் தேதி பொறுப்பேற்று முதல்வர் ஜெயலலிதாஇ ரேஷன் கார்டுகளுக்கு மாதம் 20 கிலோ அரிசி ஜூன் மாதம் 1ம் தேதி முதல் இலவசமாக வழங்கப்படும் என அறிவித்தார். அதனையொட்டி பரங்கிப்பேட்டை உள்ளிட்ட கடலூர் மாவட்டத்தில் உள்ள ஆறு லட்சத்து 38 ஆயிரத்து 525 ரேஷன் கார்டுகளுக்கு இலவச அரிசி வழங்கும் பணி, ஆயிரத்து 360 நியாய விலை கடைகளில் நேற்று காலை துவங்கியது.

இத்திட்ட துவக்க விழாவில் ஆடம்பரம் கூடாது; அரசியல் பிரமுகர்கள் எவரும் பங்கேற்கக்கூடாது எனவும், இலவச அரிசி வழங்கும் பணியில் முறைகேடுகள் நடந்தால் அதிகாரிகளுக்கு தகவல் தெரிவிக்க முதல்வர் அறிவுறுத்தியிருந்தார். இதன் காரணமாக பரங்கிப்பேட்டையில் இலவச அரிசி வழங்கும் பணி எந்தவித ஆடம்பரமும் இன்றி அமைதியாக துவங்கியது.

மீண்டும் சின்னக்கடை அஞ்சல்நிலையம்?

2011-06-01T20:47:00.001+05:30

பரங்கிப்பேட்டை: மீராப்பள்ளி தெருவில் நீண்ட காலமாக செயல்பட்டு வந்த சின்னக்கடை அஞ்சல்நிலையம் மற்றும் முசாபர்கானா எனப்படும் சத்திரம் குறித்து மீராப்பள்ளி நிர்வாகம் விரைவில் நடவடிக்கை எடுக்கும் என்று தகவல் வெளியாகியுள்ளது. சின்னக்கடை அஞ்சல்நிலையம் காலி செய்தது குறித்தும் சத்திரம் சீர் செய்யாமல் இருப்பது குறித்தும் நடவடிக்கை எடுக்க கோரி பரங்கிப்பேட்டை இந்திய தவ்ஹீத் ஜமாஅத் சார்பில் பொது மக்கள் சிலரிடம் கையெழுத்து வாங்கி மீராப்பள்ளி நிர்வாகத்திடம் மனு கொடுக்கப்பட்டது.

இந்த மனு குறித்து பதில் அளித்துள்ள மீராப்பள்ளி நிர்வாகம், அதற்கான காரணங்களை சுட்டிகாட்டியதுடன் விரைவில் சத்திரம் பழுது பார்க்கப்படும் என்றும். பலரின் வேண்டுகோளுக்கிணங்க மீண்டும் சின்னக்கடை அஞ்சல்நிலையம் செயல்பட நடவடிக்கை எடுக்கப்படும் என்று விளக்கம் அளித்துள்ளது.

இந்த மாசம் பத்து டூ பன்னண்டு!

2011-06-01T10:01:00.003+05:30

பரங்கிப்பேட்டை: மின்சார வாரியத்தின் தினசரி மின்நிறுத்த நேரம் மாதந்தோறும் மாற்றியமைக்கப்படுகிறது. அதன்படி, கடந்த மாதம் மாலை 3 மணி முதல் 5 அல்லது 6 மணி வரை இரண்டு அல்லது மூன்று மணி நேரம் மின் நிறுத்தம் செய்யப்பட்டு வந்தது. இன்று ஜூன் 1 முதல் நடப்பு மாதத்திற்கு தினசரி மின்வெட்டு காலை 10 முதல் பகல் 12 மணிவரை என்று மின்சார வாரியம் அறிவித்துள்ளது. சூழ்நிலைக்கு ஏற்ப பகல் 1 மணி வரைக்கும் இந்த மின்நிறுத்தம் நீடிக்கவும் வாய்ப்புள்ளது.

இறப்புச் செய்தி

2011-05-31T12:26:00.000+05:30

தெசன் தைக்கால் தெருவில் மர்ஹும் முஹம்மது சுல்தான் மரைக்காயர் அவர்களின் மகனாரும், மர்ஹும் ஹசன் முஹம்மது அவர்களின் மருமகனாரும், முஹம்மது சுல்தான் மரைக்காயர் அவர்களின் தகப்பனாருமான முஹம்மது யூசுப் மரைக்காயர் மர்ஹும் ஆகிவிட்டார்கள். இன்ஷா அல்லாஹ் இன்று செவ்வாய்கிழமை (31-05-2011) மாலை 4 மணிக்கு நல்லடக்கம் புதுப்பள்ளியில்.

இன்னாலில்லாஹி வ இன்னா இலைஹி ராஜிவூன்

இறப்புச் செய்தி

2011-05-31T11:41:00.009+05:30

காஜியார் தெருவில் வசித்து வந்த , மர்ஹூம் அப்துல் காதர் சாஹிப் அவர்களின் மகனாரும் மர்ஹூம் முஹம்மது யூசுப் மரைக்காயர் அவர்களின் மருமகனாரும், மர்ஹூம் அமீர் அலி சாஹிப் மற்றும் ஷம்சுதீன் சாஹிப் ஆகியோர்களின் சகோதரரும், அப்துல் காதர், வஜ்ஹுதீன் ஆகியோர்களின் பெரிய தகப்பனாரும், முஹம்மது சாதிக், அப்துல் காதர் ஆகியோரின் தகப்பனாருமாகிய உபைதுல்லாஹ் சாஹிப் மர்ஹூம் ஆகிவிட்டார்கள். நேற்று திங்கள்கிழமை (30-05-2011) இரவு இசா தொழுகைக்கு பின்னர் மீராப்பள்ளியில் நல்லடக்கம் செய்யப்பட்டது.

இன்னாலில்லாஹி வ இன்னா இலைஹி ராஜிவூன்.

வரவேற்பு மழையில் செல்வி ராமஜெயம்!

2011-05-29T21:04:00.003+05:30

பரங்கிப்பேட்டை: சமூகநலத்துறை அமைச்சராக பொறுப்பேற்ற பின்னர் செல்விராமஜெயம் முதல் முறையாக நேற்று தொகுதிக்கு வந்தார். அமைச்சருக்கு முட்லூரில் அ.தி.மு.க. சார்பில் உற்சாக வரவேற்பு அளிக்கப்பட்டது. பேண்டு வாத்தியங்கள் முழங்க, பட்டாசு வெடிக்க உற்சாக வரவேற்பில் நனைந்தார் செல்வி ராமஜெயம். பின்பு எம்.ஜி.ஆர். சிலைக்கு மாலை அணிவித்தார். தொடர்ந்து கட்சி நிர்வாகிகள், தொண்டர்கள் வாழ்த்து தெரிவித்ததுடன் அமைச்சருக்கு பொன்னாடைகள் போர்த்தினர்.

நிகழ்ச்சியில் மாவட்ட செயலர் அருண்மொழித்தேவன், பரங்கிப்பேட்டை ஒன்றிய செயலர் சுப்ரமணியன், பரங்கிப்பேட்டை அ.தி.மு.க. நிர்வாகிகள் மாரிமுத்து, ஷாஜஹான், இக்பால், காமில், யூசுப் அலி உள்ளிட்ட பலர் கலந்துக் கொண்டனர்.

இதனைத் தொடர்ந்து, புவனகிரி சட்டமன்ற தொகுதி வாக்காளர்களுக்கு நன்றி தெரிவிக்க புறப்பட்டர் அமைச்சர் செல்வி ராமஜெயம்.

மின்சாரம் நிறுத்தம்

2011-05-29T20:49:00.002+05:30

பி.முட்லூர் துணை மின்நிலையத்தில் பராமரிப்பு பணிகள் நடைப்பெற இருப்பதால் நாளை (30-05-2011) திங்கள்கிழமை பரங்கிப்பேட்டை உட்பட சிதம்பரம் தாலுக்காவில் உள்ள புவனகிரி, கிள்ளை, பிச்சாவரம், சாத்தபாடி, சாமியார்பேட்டை, புதுச்சத்திரம், பெரியப்பட்டு, கீரப்பாளையம் பு.முட்லூர், தீர்த்தாம் பாளையம், பகுதிகளில் காலை 9 மணி முதல் மாலை 5 மணி வரை மின்நிறுத்தம் செய்யப்படும் என மின்வாரிய செயற்பொறியாளர் செல்வசேகர் தெரிவித்துள்ளார்.

சவூதியில் விபத்து - 4 தமிழர்கள் உயிரிழப்பு

2011-05-29T16:50:00.002+05:30

சவூதி ஜுபைல் பகுதியில் தமிழகத்தை சேர்ந்த அப்துல் ஹாலிக் என்பவர் சிறு கட்டிட காண்ட்ராக்ட்டராக தொழில் புரிந்து வருகிறார்.சமீபத்தில் அவரது மாமனார் மாமியார் ஆகியோரை விசிட் விசாவில் வரவழைத்து, கடந்த வாரம் உம்ராவுக்கு பயணமானார். கடந்த 26.05.2011 அன்று ரியாத்தை தாண்டி ஹுமைதியா என்ற பகுதியில் அவர்களது வாகனம் சென்று கொண்டிருந்த போது ஏற்பட்ட விபத்தில் அவரது மனைவி ஃபாரின்னிசா, மாமனார் அபூசாலிஹ், மாமியார் லைலுன்னிசா ஆகியோர் சம்பவ இடத்திலேயே பலியானார்கள். இவர்களுடன் கன்னூரைச் சேர்ந்த டிரைவர் அஷ்ரப் என்பவரும் சம்பவ இடத்திலேயே பலியானார்

அப்துல் ஹாலிக்கும் அவரது மூன்று பிள்ளைகளும் காயடைந்து தற்சமயம் ஹுமைதியாவில் உள்ள மருத்துவ மனையில் சிகிச்சை பெற்று வருகின்றனர் என்று த.மு.மு.க சவூதி அரேபியா கிழக்கு மண்டல ஊடகப்பிரிவு செய்தி வெளியிட்டுள்ளது

நன்றியுடன் பாலகிருஷ்ணன்!

2011-05-28T21:08:00.000+05:30

பரங்கிப்பேட்டை: சிதம்பரம் தொகுதி சட்டமன்ற உறுப்பினர் பரங்கிப்பேட்டை வாக்காளர்களுக்கு நன்றி தெரிவித்தார். சிதம்பரம் சட்டமன்றத்தில் மா.கம்யூனிஸ்ட் வேட்பாளராக போட்டியிட்டு வெற்றி பெற்ற கே.பாலகிருஷ்ணன் பரங்கிப்பேட்டையில் வீதிவீதியாக திறந்த ஜீப்பில் சென்றவாறு வாக்காளர்களிடம் நன்றி தெரிவித்தார். சட்டமன்ற உறுப்பினருடன் கூட்டணிக் கட்சியினரான அ.தி.மு.க, மனிதநேய மக்கள் கட்சி, தே.மு.தி.க. நிர்வாகிகளும் சென்றனர்.

மதிப்"பெண்கள்"...!

2011-05-27T11:55:00.006+05:30

சற்று முன் வெளியிடப்பட்ட பத்தாம் வகுப்பு தேர்வு முடிவில் பரங்கிப்பேட்டை அளவில் பள்ளிகளின் தேர்ச்சி விவரம் சதவிகிதத்தில்:

சேவாமந்திர் பள்ளி - 99 %

அரசினர் பெண்கள் மேல்நிலைப்பள்ளி – 91 %

அரசினர் ஆண்கள் மேல்நிலைப்பள்ளி – 78 %

மூனா ஆஸ்திரேலியன் பள்ளி – 76 %

கலிமா மெட்ரிக்குலேஷன் பள்ளி - 71 %

அவரவர் பள்ளி அளவில் அதிக மதிப்பெண்கள் பெற்றவர்கள் விவரம்:

கலிமா மெட்ரிக்குலேஷன் பள்ளியில் ஃபைரோஸ் பானு 460, ஜொஹரா பானு 457, இந்துஜா 438 மதிப்பெண்கள் பெற்றுள்ளனர்

அரசினர் பெண்கள் மேல்நிலைப்பள்ளியில் செய்யது ராபியா பீவி 479, தீபா 470, கீர்த்தனா 466, நூர் சுல்தானா 463 மதிப்பெண்கள் பெற்றுள்ளனர்.

அரசினர் ஆண்கள் மேல்நிலைப்பள்ளியில் ராம் குமார் 477, நடனமுத்து 455 மதிப்பெண்கள் பெற்றுள்ளனர்.

மூனா ஆஸ்திரேலியன் மெட்ரிக்குலேஷன் பள்ளியில் ஏஞ்சலினா மேரி 431, சனோஃபர் 429. சமீரா 420 மதிப்பெண்கள் பெற்றுள்ளனர்

சேவாமந்திர் பள்ளி மாணவர் முஹம்மது கவுஸ் 455 மதிப்பெண்கள் பெற்றுள்ளார்.

மாணவ - மாணவிகளையும், உதவிப் புரிந்த ஆசிரியர்களையும், பெற்றோர்களையும் www.mypno.com ஆசிரியர் குழு சார்பாக வாழ்த்துகிறோம்.

மாணவிகள் அதிரடி..!

2011-05-27T10:42:00.003+05:30

இன்று காலை வெளியான 10ம் வகுப்பு தேர்வில் எந்த முறையும் இல்லாத அளவிற்கு முதல் ராங்கை 5 பேர் பிடித்துள்ளனர். இவர்கள் அனைவரும் மாணவி‌களே. மொத்தம் 496 மார்க்குகள் பெற்றுள்ளனர்.இதில் மொத்தம் தேர்வு எழுதியதில் 7 லட்சத்து 1ஆயிரத்து 786 பேர் தேர்ச்சி பெற்றுள்ளனர். மொத்தம் ‌தேர்ச்சி விகிதம் 85. 30 சதம் ஆகும். இதில் மாணவர்கள் 82. 30 சதம், மாணவிகள் 88.10 சதம் ஆகும். பரங்கிப்பேட்டை பெண்கள் மேல்நிலைப்பள்ளி மாணவிகள் செய்யது ராபியா பிவீ 479 மதிப்பெண்களும், தீபா 470 மதிப்பெண்களும், நூர் சுல்தானா 463 மதிப்பெண்களும் பெற்றுள்ளனர். மாணவிகள் தீபா, செய்யது ராபியா பீவி ஆகிய இருவரும் கணக்கு பாடத்தில் 100 மதிப்பெண்கள் பெற்றுள்ளனர் என்பது குறிப்பிடத்தக்கது. மேலதிக விவரங்கள் இறைவன் நாடினால் விரைவில்.

நாளை எஸ்.எஸ்.எல்.சி. தேர்வு முடிவுகள்: MYPNO.COM-ல் காணலாம்

2011-05-26T20:55:00.001+05:30

10-ம் வகுப்பு தேர்வு முடிவுகள் நாளை வெளியாகின்றன. அதே போல மெட்ரிக் தேர்வு,ஆங்கிலோ-இந்தியன், ஓரியண்டல் தேர்வுகள் முடிவுகளும் நாளை வெளியிடப்படுகின்றன. இந்தத் தேர்வு முடிவுகளை MYPNOவில் (www.mypno.com) உடனுக்குடன் காணலாம்.

தமிழகம் மட்டுமின்றி புதுச்சேரியிலும் இந்தத் தேர்வு முடிவுகள் நாளை வெளியாகின்றன. தமிழ்நாடு, புதுச்சேரியில் 9.5 லட்சம் மாணவ- மாணவிகள் எஸ்.எஸ்.எல்.சி. தேர்வு எழுதியுள்ளனர். இந்தத் தேர்வுகள் கடந்த மார்ச் மாதம் 22ம் தேதி தொடங்கி, ஏப்ரல் 11ம் தேதி வரை நடந்தன.

இந் நிலையில் பிளஸ்-2 தேர்வுகள் கடந்த 9ம் தேதியும், சி.பி.எஸ்.இ. 12ம் வகுப்பு தேர்வு முடிவுகள் 22ம் தேதியும் வெளியாயின.

இந் நிலையில் எஸ்.எஸ்.எல்.சி, மெட்ரிக், ஆங்கிலோ- இந்தியன், ஓரியண்டல் பொதுத்தேர்வு முடிவுகள் 27ம் தேதி (நாளை) காலை 10 மணிக்கு வெளியாகின்றன.

மாணவ-மாணவிகள் தாங்கள் படித்த பள்ளிகள் மூலமாகவும், MYPNO.COM மற்றும் அரசு இணையத் தளங்களிலும் உடனுக்குடன் அறியலாம். மேலும் மதிப்பெண் விவரங்களையும் அறிந்து கொள்ளலாம்.

TNTJ கோடைகால பயிற்சி முகாம் பரிசளிப்பு நிகழ்ச்சி!

2011-05-25T13:32:00.000+05:30

பரங்கிப்பேட்டை: தமிழ்நாடு தவ்ஹீத் ஜமாஅத் பரங்கிப்பேட்டை கிளையில் கோடைகால பயிற்சி முகாம் 09.05.2011 ஆரம்பிக்கபட்டு 18.05.2011 நிறைவடைந்தது. பத்து நாட்கள் நடைப்பெற்ற இந்த பயிற்சி முகாமில் 50-க்கும் மேற்பட்ட மாணவ, மாணவிகள் கலந்து கொண்டு பயன்பெற்றனர்.

இதற்கான பரிசளிப்பு நிகழ்ச்சி கடந்த 21.05.2011 சனிக்கிழமை அன்று மாவட்ட துனை செயலாளர் சகோ.தாஜூதீன் அவர்களின் தலைமையில் நகர தலைவர் சகோ.முத்துராஜா முன்னிலையில் "மஸ்ஜிதுத் தவ்ஹீத்" பள்ளியில் நடைப்பெற்றது.

இந்த நிகழ்ச்சிகள் பயிற்சி முகாமில் சிறப்பாக பயின்ற மூன்று மாணவர்களுக்கு சிறப்பு பரிசுகள் அளிக்கப்பட்டது. மேலும் முகாமில் கலந்து கொண்ட அனைத்து மாணவ, மாணவியர்களுக்கும் பரிசு வழங்கப்பட்டது..

source: tntj-pno

கட்டாயக் கல்விச் சட்டத்தை மீறும் தனியார் பள்ளிகளை கண்டித்து ஆர்ப்பாட்டம்!

2011-05-24T18:52:00.000+05:30

கட்டாய இலவசக் கல்வித் சட்டத்தை மீறிச் செயல்படும் கடலூர் மாவட்டத் தனியார் பள்ளிகளை கண்டித்து தமிழ்நாடு நுகர்வோர் கூட்டமைப்பின் சார்பில் கடலூரில் ஆர்ப்பாட்டம் நடந்தது.

குழந்தைகள் இலவசக் கட்டாயக் கல்வி உரிமைச் சட்டம் 2009 என்ற மத்திய அரசின் சட்டம் 6 முதல் 14 வயது வரையிலான அனைத்து குழந்தைகளுக்கும் இலவசக் கல்வி உரிமையை வழங்குகிறது.

இச் சட்டத்துக்கு முரணாக கடலூரில் கட்டாய நன்கொடை, மறைமுகக் கட்டணங்கள் வசூலிக்கப்படுகிறது. கட்டணங்களுக்கு ரசீது வழங்கப்படுவதில்லை, ஒடுக்கப்பட்ட, தாழ்த்தப்பட்ட மற்றும் வறுமைக்

கோட்டுக்கு கீழ் உள்ள மாணவர்களுக்கு 25 சதவீதம் ஒதுக்கீட்டை கடலூர் பள்ளிகளில் அளிக்கவில்லை.

சட்டவிரோதமாக நுழைவுத் தேர்வுகள், பெற்றோருக்கு அறிவுச்சோதனை போன்ற வடிகட்டும் தேர்வுகளை நடத்திக் கொண்டிருக்கின்றன. மெட்ரிக் பள்ளிகள் தனியாரிடம் இருந்து தரமற்ற பாடப் புத்தகங்களை வாங்கி மாணவர்களுக்கும் பெற்றோருக்கும் சுமைகளை ஏற்றுகின்றன என்றும் தமிழ்நாடு நுகர்வோர் கூட்டமைப்பு குற்றம்சாட்டியுள்ளது. எனவே இத்தகைய விதிமீறல்களை செய்துவரும் கடலூர் மாவட்ட தனியார் பள்ளிகள் மீது நடவடிக்கை எடுக்க வலியுறுத்தி திங்கள்கிழமை ஆர்ப்பாட்டம் நடந்தது.

நகரில் உள்ள பல்வேறு பொதுநல அமைப்புகளின் பிரதிநிதிகளும் இதில் கலந்துகொண்டனர். மாவட்ட ஆட்சியர் அலுவலகம் முன்பு நடந்த ஆர்ப்பாட்டத்துக்கு தமிழ்நாடு நுகர்வோர் கூட்டமைப்பின் பொதுச் செயலாளர் எம்.நிஜாமுதீன் தலைமை வகித்தார்.

பொதுநல அமைப்புகளின் பிரதிநிதிகள் வெண்புறா குமார், அருள்செல்வம், திருநாவுக்கரசு, லெனின், பி.பண்டரிநாதன், பாலசுப்பிரமணியன், கதிர் மணிவண்ணன், தெய்வகுரு, எஸ்.புகழேந்தி உள்ளிட்ட பலர் கலந்து கொண்டனர்.

வாத்தியாப்பள்ளி கிரிக்கெட் போட்டியை தொடங்கி வைத்தார் பாலகிருஷ்ணன்!

2011-05-23T11:16:00.001+05:30

பரங்கிப்பேட்டை: கோல்ட் ஸடார் கிரிக்கெட் கிளப் சார்பாக வாத்தியாப்பள்ளியில் கிரிக்கெட் போட்டிகள் நேற்று தொடங்கியது. இப்போட்டியை சிதம்பரம் சட்டமன்ற உறுப்பினர் கே.பாலகிருஷ்ணன் தொடங்கி வைத்தார். மனிதநேயமக்கள் கட்சி நகர தலைவர் ஜாக்கீர், செயலாளர் பிலால் தலைமையில் நடைபெற்ற போட்டி துவக்கவிழாவில் இந்திய தவ்ஹீத் ஜமாஅத் கவுஸ் ஹமீது மற்றும் பலர் கலந்து கொண்டனர்.

போட்டி குறித்து, சட்ட மன்ற உறுப்பினர் பேசுகையில், 'இளைஞர்கள் ஒழுக்கங்கெட்டு வீணாண விசயங்களில் ஈடுபடும் இந்த காலகட்டத்தில், அவற்றிலிருந்து திசை திரும்பும் விதமாக இது போன்ற விளையாட்டுப் போட்டிகள் அமைகிறது. அதுவும் இந்த கிரிக்கெட் போட்டியில்தான் டீம் ஸ்பிரிட் எனப்படும் குழு உணர்வு ஏற்படுகிறது' என்றார்.

கிராம வளர்ச்சிக்கு முக்கியத்துவம் கொடுப்பேன்: ஐ.ஏ.எஸ். மாணவி அனுகிரகா பேட்டி!

2011-05-23T10:41:00.000+05:30

பரங்கிப்பேட்டை ; "கடின உழைப்பு இருந்தால், எளிதாக சாதிக்க முடியும் என, ஐ.ஏ.எஸ்., தேர்வில் வெற்றி பெற்ற, அனுகிரகா கூறினார். பரங்கிப்பேட்டை ஐ.ஓ.பி., வங்கியில் மேலாளராக இருப்பவர் பாண்டியதுரை. இவருக்கு அனுகிரகா, கார்த்திகா ஆகிய இரண்டு மகள்களும், சரவணன் என்ற மகனும் உள்ளனர். அனுகிரகா, ஐ.ஏ.எஸ்., தேர்வில் தேர்ச்சி பெற்றுள்ளார். கடலூர் செயின்ட் மேரிசில் பள்ளிப்படிப்பை முடித்தார். கோயம்புத்தூர் பி.எஸ்.ஜி., கல்லூரியில் இன்ஜினியரிங் படித்தார். ஐ.ஏ.எஸ்., தேர்வு எழுத, கடந்த ஒரு ஆண்டாக புதுடில்லியில் தங்கி படித்து, முதல் தேர்விலேயே தேர்ச்சி பெற்றுள்ளார்.

இதுகுறித்து அனுகிரகா கூறியதாவது: கிராம பகுதியில் இருந்து ஐ.ஏ.எஸ்., தேர்வில் வெற்றி பெற்றுள்ளேன். கிராமத்தில் படித்தவர்களுக்கு, அதிக திறமை உள்ளது. ஆனால், அவர்களுக்கு சரியான விழிப்புணர்வு இல்லாததால் சாதிக்க முடியவில்லை. யார் எந்த மூலையில் இருந்தாலும் அவர்களுக்கு முயற்சி, விழிப்புணர்வு இருந்தால் வாழ்க்கையில் எளிதாக முன்னேறலாம். கடின உழைப்பு இருந்தால் எளிதாக சாதிக்க முடியும். கிராம வளர்ச்சிக்கு முக்கியத்துவம் கொடுத்து பணியாற்றுவேன். கல்வி மற்றும் பெண்கள் மேம்பாட்டிற்கு பாடுபடுவேன்.இவ்வாறு அனுகிரகா கூறினார்.

பரங்கிப்பேட்டையில் சிறப்பு கூட்டுக்குடிநீர் திட்டம்: சட்டமன்ற உறுப்பினர் பாலகிருஷ்ணன் தகவல்!

2011-05-22T20:36:00.000+05:30

பரங்கிப்பேட்டையை உள்ளடக்கிய சிதம்பரம் தொகுதியின் சட்டமன்ற உறுப்பினர் கே.பாலகிருஷ்ணன் செய்தியாளர்களிடம் தெரிவித்ததாவது: சிதம்பரம் தொகுதியில் பாகுபாடின்றி அனைவருக்கும் அனத்து திட்ட பயன்களும் கிடைக்க பாடுபடுவேன். எம்.எல்.ஏ., அலுவலகத்தில் தகுதியான ஊழியர்கள் நியமிக்கப்பட்டு 24 மணி நேரமும் இயங்குவதோடு மக்கள் குறைகளை எந்த நேரத்திலும் தெரிவிக்கும் வகையில் ஏற்பாடு செய்யப்படும். மின் வெட்டு பிரச்னை தீர்க்க முயற்சி மேற்கொள்ளப்படும்.

என்.எல்.சி., யில் உற்பத்தி செய்யப்படும் மின்சாரத்தில் 250 மெகா வாட் முதல் 300 மெகாவாட் வரை பெற்று மின் பற்றாக்குறையை முற்றிலும் தீர்க்க நடவடிக்கை எடுக்கப்படும். அதற்காக முதல்வர் ஜெயலலிதா, என்.எல்.சி., அதிகாரிகள், துறை சார்ந்த அமைச்சர் ஆகியோரிடம் பேசி தீர்வு காணப்படும். சிதம்பரம் நகரில் செயல்படுத்த முடியாமல் உள்ள பாதாள சாக்கடைத் திட்டம், 7 கோடி ரூபாயில் கொண்டு வரப்பட்ட புதிய குடிநீர் திட்டம் ஆகியவற்றை உடனடியாக செயல்படுத்த நடவடிக்கை எடுக்கப்படும். அதேப்போன்று பஸ் நிலையம், மீன் மார்க்கெட், அரசு மருத்துவமனையில் சுகாதார வசதிகள் என மக்கள் பணிகள் நிறைவேற்றித்தரப்படும்.

பரங்கிப்பேட்டை, குமராட்சி, கிள்ளை பகுதியில் சிறப்பு கூட்டுக்குடிநீர் திட்டம் செயல்படுத்தப்படும். காவிரி டெல்டா பகுதியாக இருந்தும் சிதம்பரம் டெல்டா பகுதிக்கான எந்த சலுகையும் கொடுக்காமல் புறக்கணிக்கப்படுகிறது. அந்த நிலையை மாற்ற அதிகாரிகளிடம் பேசி நடவடிக்கை எடுக்கப்படும். சிதம்பரம் தொகுதிக்கு வரும் எந்த திட்டமாக இருந்தாலும், எனது தொகுதி மேம்பாட்டு நிதியில் செயல்படுத்தப்படும் பணிகளாக இருந்தாலும் கமிஷன், லஞ்சம் எதுவுமின்றி ஒதுக்கப்படும் நிதி முழுவதும் செலவழிக்கப்பட்டு நேர்மையான, வெளிப்படையாக நிர்வாகம் நடத்தப்படும். இவ்வாறு பாலகிருஷ்ணன் கூறினார்.

பரங்கிப்பேட்டையில் பலத்த இடி..!

2011-05-21T10:43:00.007+05:30

கடந்த சில நாட்களாகவே, பரங்கிப்பேட்டையில் கடும் வெயிலின் காரணமாக மக்கள் மிகுந்த அவதிக்குள்ளாகி வந்தனர்., இந்நிலையில் மாலை முதல் நிலவி வந்த மேகமூட்டத்தின் காரணமாக இரவு 7.30 மணியளவில் லேசான தூறலாக தொடங்கி, மிக பலத்த இடியோசையுடன் பலத்த மழையாக இரவு 8.20 வரை பெய்தது. தொடர்ச்சியாக 45 நிமிடத்திற்கும் மேலாக மின்னல் - இடியோசையின் ஆதிக்கம் மிகுந்திருந்த காரணத்தினால் நகரில் பெரியோர்கள் முதல் சிறியவர்கள் வரை பயத்துடனே காணப்பட்டனர். முன்னெச்சரிக்கையின் காரணமாக நிறுத்தப்பட்டிருந்த மின்சாரம் வினியோகம் மீண்டும் இரவு 9 மணிக்கு தொடங்கியது.

பரங்கிப்பேட்டை பகுதியில் வாக்களர்களை சந்தித்து நன்றி கூறுவதற்காக புதுக்குப்பம் - சின்னூர் - மாதக்கோயில் தெரு வழியாக பரங்கிப்பேட்டைக்கு வருகை தர திட்டமிட்டிருந்த சிதம்பரம் தொகுதி சட்டமன்ற உறுப்பினர் K.பாலகிருஷ்ணன் தனது சுற்றுப்பயணத்தை பலத்த மழை - இடி - மின்னல் காரணமாக மாதக்கோயில் பகுதியிலேயே நிறைவு செய்தார். பலத்த இடியின் காரணமாக பெரும்பாலோர் செல்போன் உள்ளிட்ட மின்னனு சாதனங்களை அந்நேரத்தில் உபயோகிக்கவில்லை, இருந்தபோதிலும் நகரிலுள்ள சில வர்த்தக நிறுவனங்களின் மின்னணு சாதனங்கள் பழுதுக்குள்ளாகியது.

மீண்டும் நள்ளிரவு சுமார் 2.30 முதல் பெய்யத்தொடங்கிய மழை பலத்த மழையாக உருவெடுத்து அதிகாலை வரை பெய்தது. இந்நேரத்தில் இடியோசை இல்லாமல் இருந்தது சற்று ஆறுதலாக இருந்தது. கோடையின் வெப்பத்தை தவிர்க்க இம்மழை பேருதவியாக இருந்தது என்றாலும் மிகக்கடுமையான இடியோசையின் காரணமாக மக்கள் மிரட்சியுடனே இருந்தனர்.

இந்த பதவி கிடைக்கும் என்று நான் சற்றும் எதிர்பார்க்க வில்லை: அமைச்சர் செல்வி ராமஜெயம் பேட்டி

2011-05-20T19:27:00.000+05:30

அ.தி.மு.க. அமைச்சரவையில் அங்கம் வகிக்கும் பரங்கிப்பேட்டையைச் சார்ந்த சமூகநலத்துறை அமைச்சர் செல்வி ராமஜெயம் அளித்துள்ள பேட்டியில், '"நடுத்தர குடும்பத்தை சேர்ந்த எனக்கு இவ்வளவு பெரிய பொறுப்பை முதல்- அமைச்சர் ஜெயலலிதா கொடுத்திருப்பதற்கு காலமெல்லாம் நன்றி சொல்ல கடமைப்பட்டு இருக்கிறேன்" என்றார்.

அவர் மேலும் கூறியதாவது: இந்த பதவி எனக்கு கிடைக்கும் என்று நான் சற்றும் எதிர்பார்க்க வில்லை. கடந்த 10 வருடமாக பஞ்சாயத்து தலைவராகவும், சட்டமன்ற உறுப்பிளராகவும் பணியாற்றினேன். இப்போது முதல்-அமைச்சர் எனக்கு அதை விட முக்கிய பொறுப்பை வழங்கி இருக்கிறார். அதற்கு நான் தகுதி உள்ளவராக செயலாற்றுவேன்.

3-வது முறையாக பொறுப்பேற்ற முதல்-அமைச்சர் ஜெயலலிதா பெண்களுக்கான திட்டங்களுக்கு முன்னுரிமை கொடுத்துள்ளார். பின்தங்கிய ஏழை மக்களின் வாழ்வாதாரத்தை மேம்படுத்தும் வகையில் கணவனால் கைவிடப்பட்ட பெண்கள், முதியோர், விதவைகள், மாற்றுத் திறனாளிகள் உதவித் தொகை ரூ.1000 ஆக உயர்த்தி வழங்கி ஆணை பிறப்பித்துள்ளார்.

படித்த, ஏழை பெண்கள், பட்டதாரி, டிப்ளமோ படித்த பெண்கள் திருமண உதவித் தொகை ரூ.25 ஆயிரத்துடன் தாலிக்கு 4 கிராம் தங்கம், ரூ.50 ஆயிரத்துடன் 4 கிராம் தங்கம் போன்ற திட்டங்கள் சமூக நலத்துறையின் கீழ் பெண்களுக்கு முழுமையாக சென்றடைய பாடுபடுவேன்.சத்துணவு, அங்கன்வாடி ஊட்டச்சத்து துறை பணிகள் சிறப்பாக செயல்படுத்தப்படும்.

முதல்-அமைச்சர் ஜெயலலிதா செயல்படுத்திய தொட்டில் குழந்தை திட்டம் கடந்த ஆட்சியில் முறையாக செயல்படுத்தப் படவில்லை. அரசு மருத்துவமனைகளில் தொட்டில் குழந்தைகளை பாதுகாக்கவும், பின்னர் காப்பகங்களில் பராமரித்து வளர்க்கவும் உரிய நடவடிக்கை எடுக்கப்படும். சேலம், தர்மபுரி, கிருஷ்ண கிரி, கரூர், நாமக்கல் உள்ளிட்ட மாவட்டங்களில் இத்திட்டத்திற்கு தேவையானவற்றை செய்து மேம்படுத்தப்படும்.

இவ்வாறு செல்வி ராமஜெயம் கூறினார்.

கடந்த வாரம் ரிசல்ட், இந்த வாரம் அரெஸ்ட்..!

2011-05-20T14:46:00.007+05:30

ஸ்பெக்ட்ரம் வழக்கில் சி.பி.ஐ. தாக்கல் செய்த இரண்டாவது குற்றப்பத்திரிகையில் கனிமொழி எம்.பி.யின் பெயர் சேர்க்கப்பட்டுள்ளது. இவ்வழக்கில், சம்மன் அனுப்பப்பட்டதால், கடந்த 6-ந் தேதி சி.பி.ஐ. கோர்ட்டில் கனிமொழி ஆஜரானார். அவர் தாக்கல் செய்த முன்ஜாமீன் மனு மீதான தீர்ப்பு 20-ந் தேதிக்கு (இன்று) ஒத்திவைக்கப்பட்டது. அதன்படி, கனிமொழி முன்ஜாமீன் மனு மீது இன்று பிற்பகல் 1 மணிக்கு தீர்ப்பு வழங்கப்படும் என்று கோர்ட்டு அறிவித்தது. இந்தநிலையில் கனிமொழி ஜாமீன் மனு மீது பிற்பகல் 2.30 மணிக்கு தீர்ப்பு வழங்கப்படும் என்று அறிவிக்கப்பட்டது. மனு இன்று விசாரணைக்கு வந்தபோது கனிமொழியின் முன் ஜாமீன் மனுவை கோர்ட்டு தள்ளுபடி செய்தது.

முன்னதாக கனிமொழி நிருபர்களிடம் கூறுகையில், "தீர்ப்புக்காக காத்து இருக்கிறேன். எது நடந்தாலும் எதிர்கொள்வேன்'' என்றார். கனிமொழி எம்.பி. முன் ஜாமீன் மனு மீது பிற்பகல் 2.30 மணிக்கு தீர்ப்பளிக்கப்படும் என்று சி.பி.ஐ. கோர்ட்டு நீதிபதி சைனி அறிவித்தார். அதன்படி 2.30 மணிக்கு நீதிபதி சைனி தீர்ப்பை வாசித்தார். கனிமொழி எம்.பி.க்கும், கலைஞர் டி.வி. நிர்வாக இயக்குனர் சரத்குமாருக்கும் முன்ஜாமீன் வழங்க இயலாது என்று தீர்ப்பளித்தார். 14 நாள் கோர்ட்டு காவலில் வைக்கவும் நீதிபதி உத்தரவிட்டார். முன்ஜாமீன் மறுக்கப்பட்ட காரணத்தால் கனிமொழி எம்.பி. உடனடியாக கைது செய்யப்பட்டார். சரத்குமாரும் கைது செய்யப்பட்டார். அவர்கள் இருவரையும் திகார் ஜெயிலில் அடைக்க சி.பி.ஐ. போலீசார் அழைத்துச் சென்றனர். ஸ்பெக்ட்ரம் வழக்கு விசாரணை நாளை மீண்டும் நடைபெற உள்ளதால் கனிமொழியை நாளை காலை 10 மணிக்கு கோர்ட்டில் மீண்டும் ஆஜர்படுத்த வேண்டும் என்று நீதிபதி சைனி உத்தரவிட்டார்.

அடுத்தடுத்த வெள்ளிக்கிழமைகளி்ல் திமுகவிற்கு பின்னடைவு ஏற்பட்டு வருவதால், அக்கட்சியினர் கலக்கத்தில் உள்ளனர். கடந்த வெள்ளிக்கிழமை தமிழக சட்டசபை தேர்தல் மு‌டிவில், பொதுமக்கள் திமுகவை தோற்கடித்து அதிர்ச்சி வைத்தியம் கொடுத்தனர். அந்த அதிர்ச்சியிலிருந்து மீள்வதற்குள்ளாக, இந்த வெள்ளிக்கிழமை, திமுக தலைவரின் மகள் கனிமொழி கைது செய்யப்பட்டுள்ளார். இதனால், அடுத்த வெள்ளிக்கிழமை என்ன ஆகும் என்‌று திமுகவினர் பெரும் அதிர்ச்சியில் இருக்கின்றனர்.

I .P.S. அதிகாரிகள் அதிரடியாக மாற்றம்

2011-05-19T10:10:00.000+05:30

ஐ.பி.எஸ். அதிகாரிகள் அதிரடியாக மாற்றம் செய்யப்பட்டுள்ளனர். இதுகுறித்து, உள்துறை முதன்மைச் செயலாளர் ஷீலா ராணி சுங்கத் வெளியிட்ட உத்தரவு: (பழைய பதவி அடைப்புக் குறிக்குள்.) சட்டம்-ஒழுங்கு ஏடிஜிபியாக ஜார்ஜ் நியமிக்கப்பட்டுள்ளார்.

திமுக அரசில் முக்கியப் பொறுப்பு வகித்து வந்த ஐ.பி.எஸ். அதிகாரி ஜாபர் சேட், மண்டபம் அகதிகள் முகாமின் சிறப்பு அலுவலராக நியமனம் செய்யப்பட்டுள்ளார்.

எஸ்.ஜார்ஜ் - சட்டம்-ஒழுங்கு ஏ.டி.ஜி.பி., - (மாநில மனித உரிமைகள் ஆணையத்தின் ஏ.டி.ஜி.பி.,)

ஏ.ஜி.பொன் மாணிக்கவேல் - ரயில்வே டி.ஐ.ஜி., - (விழுப்புரம் சரக டி.ஐ.ஜி.,)

அஸ்வின் எம்.கோட்னீஸ் - புளியந்தோப்பு துணை ஆணையர் (கடலூர் மாவட்ட எஸ்.பி.,).

பத்தாம் வகுப்பு தேர்வு முடிவுகள்

2011-05-18T12:22:00.004+05:30

10 லட்சம் மாணவர்கள் எழுதியுள்ள பத்தாம் வகுப்பு விடைத்தாள்கள் திருத்தம் செய்யப்பட்டு, தேர்வு முடிவுகள் தயாராக உள்ளன., மாணவ - மாணவிகளும், பெற்றோர்களும் தேர்வு முடிவை ஆவலுடன் எதிர்பார்த்துள்ளனர். இத்தேர்வு முடிவுகள், வரும் 24ம் தேதி வெளியாகிறது.கடந்த ஆண்டு S.S.L.C. தேர்வில் நெல்லை டவுன் கல்லணை மாநகராட்சி பள்ளி மாணவி ஜாஸ்மின், 500க்கு 495 மதிப்பெண்கள் பெற்று மாநிலத்திலேயே முதலிடம் பெற்றார் என்பது குறிப்பிடத்தக்கது. கடந்த ஆண்டைப் போலவே இவ்வாண்டும் உங்கள் MYPNO.COM இணையத் தளத்தில் தேர்வு முடிவுகள் வெளியாக விரிவான ஏற்பாடுகள் செய்யப்பட்டுள்ளது.

இறப்புச் செய்தி

2011-05-16T18:21:00.003+05:30

கிதர்சா மரைக்காயர் தெருவில் மர்ஹும் மரக்கச்சி மரைக்காயரின் மகளாரும், மர்ஹும் மெக்தார் சாஹிப் அவர்களின் மனைவியும், மரக்கச்சி மரைக்காயர், கஜ்ஜாலி இவர்களின் தாயாருமான மைமுன் பீவி மர்ஹும் ஆகிவிட்டார்கள். இன்று மாலை 4 மணிக்கு புதுப்பள்ளியில் நல்லடக்கம் செய்யப்பட்டது.

தகவல்: sky news

செல்வி ராமஜெயம் என்கிற நான்.... (வீடியோ!)

2011-05-16T14:32:00.002+05:30

தமிழக அமைச்சராக இன்று சென்னை பல்கலைக்கழக நூற்றாண்டு விழா மண்டபத்தில் செல்வி ராமஜெயம் பதவியேற்றுக்கொண்டார். கவர்னர் பர்னாலா பதவிப்பிரமாணமும், ரகசிய காப்பு பிரமாணமும் செய்து வைத்தார்.

அப்போது செல்வி ராமஜெயம் ஏற்றுக்கொண்ட உறுதிமொழி: ‘’செல்வி ராமஜெயம் என்னும் நான் சட்டப்படி அமைக்கப்பட்ட இந்திய அரசியல் அமைப்பின் பால் உண்மையான நம்பிக்கையும், மாறாப்பற்றும் கொண்டிருப்பேன் என்றும், இந்திய நாட்டின் ஒப்பில்லாத முழு முதல் ஆட்சியையும், ஒருமையையும் நிலைநிறுத்துவேன் என்றும்,

தமிழ்நாட்டு அரசின் அமைச்சராக, உண்மையாகவும், உளச்சான்றின் படியும், என் கடமைகளை
நிறைவேற்றுவேன் என்றும், அரசியல் அமைப்பிற்கும், சட்டத்திற்கும் இணங்க, அச்சமும், ஒருதலை சார்பும் இன்றி, விருப்பு, வெறுப்பை விளக்கி, பலதரப்பட்ட மக்கள் அனைவருக்கும், நேர்மையானதை செய்வேன் என்றும், ஆண்டவன் மீது ஆணையிட்டு உறுதி மொழிகிறேன்.

வீடியோ: எஸ்.ஏ. ரியாஸ் அஹமத்.

சமூக நலத்துறை அமைச்சராகிறார் செல்வி ராமஜெயம்!

2011-05-15T19:51:00.000+05:30

புவனகிரி சட்டமன்ற உறுப்பினராக தேர்ந்தெடுக்கபட்டுள்ள பரங்கிப்பேட்டையை சார்ந்த செல்வி ராமஜெயம் அமையப் போகும் தமிழக அமைச்சரவையில் இடம்பெற உள்ளார். ஜெயலலிதா தலைமையிலான புதிய அமைச்சரவை நாளை பதவி ஏற்க இருக்கிறது. இதில் செல்வி ராமஜெயத்திற்கு சமூக நலத்துறை ஒதுக்கப்படுகிறது. இரண்டாவது முறையாக வெற்றியை தக்க வைத்து கொண்டார் என்பது குறிப்பிடத்தக்கது. புவனகிரி தொகுதியிலிருந்து பரங்கிப்பேட்டை சிதம்பரம் தொகுதியில் இணைக்கப்ட்டுவிட்டாலும், பரங்கிப்பேட்டையில் இவரது ஆதரவாளர்கள் மட்டுமின்றி பலரும் தமது மகிழ்ச்சியை வெளிப்படுத்தி வருகின்றனர்.

தமிழக புதிய அமைச்சரவை- முழுப்பட்டியல்!

2011-05-15T19:30:00.000+05:30

சென்னை: தமிழக சட்டசபை அ.தி.மு.க., தலைவராக பொதுசெயலர் ஜெயலலிதா தேர்வு செய்யப்பட்டார். இன்று கட்சியின் தலைமை அலுவலகத்தில் நடந்த எம்.எல்.ஏ.,க்கள் கூட்டத்தில் அவர் தேர்வு செய்யப்பட்டதை அடுத்து கவர்னரரை சந்தித்து ஆட்சி அமைக்க உரிமை கோரினார். தொடர்ந்து கவர்னர் விடுத்த அழைப்பின்பேரில் நாளை ( 16 ம் தேதி ) முதல்வராக பதவியேற்கிறார்.

இதனிடையே, நாளை பதவியேற்கவுள்ள அமைச்சர்கள் பட்டியலை ஜெயலலிதா வெளியிட்டுள்ளார்.

ஜெயலலிதா : முதலமைச்சர்

ஒ பன்னீர்செல்வம் : நிதித்துறை....

செங்கோட்டையன்: விவசாயம்

கே பி முனுசாமி: உள்ளாட்சி துறை

பி தங்கமணி : வருவாய்துறை

நத்தம் விஸ்வநாதன்: மின்சார துறை

வைத்தியலிங்கம் : வீட்டு வசதி துறை

சி வி சண்முகம்: பள்ளி கல்வி துறை

கே வி ராமலிங்கம்: பொதுப்பணித்துறை

கருப்பசாமி : கால்நடைத்துறை

செந்தில் பாலாஜி : போக்குவரத்துத்துறை

சுப்பையா : சட்டத்துறை

வி எஸ் விஜய் : மக்கள் நலவாழ்வுத்துறை

ஆர் பி உதயகுமார் : தகவல் தொழில்நுட்பம்

செல்லூர் ராஜு: கூட்டுறவுத்துறை

மரியம்பிச்சை : சுற்றுசூழல்துறை

சண்முகவேல்:தொழில்துறை

செல்வி ராமஜெயம்: சமுகநலம்

பச்சைமால் : வனத்துறை

சின்னையா : பிற்படுத்த பட்டோர் நலன்

என் சுப்ரமணியன் : ஆதிதிராவிடர் நலன்

கோகுல இந்திரா : வணிக வரித்துறை

பி வி ரமணா : கைத்தறித்துறை

என் ஆர் சிவபதி : விளையாட்டுத்துறை

அக்ரி கிருஸ்ணமூர்த்தி : உணவுத்துறை

பழனியப்பன் : உயர் கல்வி துறை

எஸ் பி சண்முகநாதன் : அறநிலையத்துறை

எம் சி சம்பத் : ஊரக தொழில்துறை

எஸ் பி வேலுமணி : சிறப்பு திட்ட அமலாக்கம்

ஜி செந்தமிழன் : செய்தித்துறை

ஜெயபால் : மீன்வளத்துறை

செல்லபாண்டியன் : தொழிலாளர் நலன்

புத்தி சந்திரன் : சுற்றுலாத்துறை

எடப்பாடி பழனிசாமி : நெடுஞ்சாலை துறை

பரங்கிப்பேட்டை மாணவிக்கு ரியாத் நிகழ்ச்சியில் வெற்றிப்பரிசளிப்பு

2011-05-14T19:46:00.000+05:30

தஃபர்ரஜ் நற்பணி அமைப்பு நடத்திய பல்சுவை நிகழ்ச்சி கடந்த 13 - 05 - 2011 அன்று ரியாத்தில் நதா, முஹம்மதியா மகிழகங்களில் சிறப்புடன் நடைபெற்றது.

அவ்வமயம், கடந்த ஆண்டு ரியாத்தில் பன்னாட்டு இந்தியப்பள்ளியில் C B S E பத்தாம் வகுப்பில் தமிழில் முதல் நிலை பெற்ற மாணவ மாணவிகள் பாராட்டும் கேடயமும் வழங்கிச் சிறப்பிக்கப்பட்டனர். நடந்து முடிந்த மேல்நிலைப் பள்ளித் தேர்வில் 1180 மதிப்பெண்கள் பெற்று மாநில அளவில் ஆறாவதாக வந்த மாணவர், பன்னாட்டு இந்தியப் பள்ளியின் முன்னாள் மாணவர் என்னும் பெருமிதங் கொண்டு அவருடைய தகப்பனார் ரிபாயி அவர்களிடம் பாராட்டும், வெகுமதியான பரிசிலும் வழங்கப்பட்டன.

கடந்த ஆண்டு CBSE பத்தாம் வகுப்பு தேர்வில் தமிழில் முதல் நிலை பெற்ற மாணவி ஹமீதா நஸ்லுன் சிதாரா பரங்கிப்பேட்டை மாணவியாவார். அவருடைய தகப்பனார் ஜாஃபர் அலி ரியாத்தில் பணி புரிந்து வருகிறார் என்பது குறிப்பிடத்தக்கது.

இந்நிகழ்ச்சியின் ஒருங்கிணைப்பாளராக இப்னுஹம்துன் செயலாற்றினார்.

பாலகிருஷ்ணன் வெற்றி!

2011-05-13T21:30:00.000+05:30

சிதம்பரம் சட்டமன்ற தொகுதியில் அ.தி.மு.க.கூட்டணில் அங்கம் வகிக்கும் மா.கம்யூ வேட்பாளர் கே. பாலகிருஷ்ணன், தன்னை எதிர்த்து போட்டியிட்ட மூவேந்தர் முன்னேற்றக் கழக வேட்பாளர் வாண்டையாரை விட 2270 வாக்குகள் வித்தியாசத்தில் வெற்றிபெற்றுள்ளார். முன்னதாக வெற்றி அறிவிப்பு வெளியாவதில் காலதாமதம் ஏறபட்ட நிலையில் தற்போது அதிகாரபூர்வ அறிவிப்பு வெளியாகியுள்ளது. சுமார் 74,600 வாக்குகள் பெற்று வெற்றிபெற்றுள்ளார்.

மீண்டும் செல்வி ராமஜெயம் எம்.எல்.ஏ.: 13117 ஓட்டுகள் வித்தியாசத்தில் வெற்றி!

2011-05-13T19:00:00.000+05:30

பரங்கிப்பேட்டை: புவனகிரி தொகுதியில்இ அதிமுக வெற்றி பெற்றுள்ளது. புவனகிரி தொகுதியில், அதிமுக வேட்பாளர் செல்வி ராமஜெயம் 87413 ஓட்டுகளும், பாமக வேட்பாளர் அறிவுச்செல்வன் 74296 ஓட்டுகளும் பெற்றள்ளனர். இதன்மூலம், அதிமுக 13117 ஓட்டுகள் வித்தியாசத்தில் வெற்றி பெற்றது. தொடர்ந்து இரண்டாவது முறையாக சட்டமன்ற உறுப்பினராக தேர்ந்தெடுக்கப்பட்டள்ள பரங்கிப்பேட்டையை சாந்த இவருக்க அமைச்சரவையில் பங்குபெறுவாரா என்ற எதிர்பார்ப்பு ஏற்பட்டுள்ளது.