மழைக்கால பரங்கிபேட்டை ஆல்பம்

ஊரில் தற்போது இடைவேளை விட்டிருக்கும் புயல் காற்றுடன் கூடிய பெருமழை வழக்கம்போல் ஊரை வெள்ளக்காடாக மாற்றி உள்ளது. ஊரின் மைய பகுதி கொஞ்சம் பிழைக்க, வரும்புகளிலும், வடிகால் ஓரங்களிலும் வாழ்பவர்கள் மிகுந்த சிரமத்திற்குள்ளாகி உள்ளனர். மழைக்கால பரங்கிபேட்டையை லைவ் ஆக கொஞ்சம் பதிவு செய்ய புறப்பட்ட நமது போட்டோகிராபரின் ஆல்பத்திலிருந்து .....

பரங்கிப்பேட்டை தனி தீவானது.

• மின் வினியோகம் அடியோடு பாதிப்பு.
• பல்வேறு இடங்களில் மின் கம்பிகள் அறுந்து கிடக்கின்றன.
• போக்குவரத்து முழுமையாக துண்டிக்கப்பட்டு தீவாக காட்சியளிக்கிறது.
• பரங்கிப்பேட்டையில் நேற்று பெய்த மழை அளவு: 26 செ.மீ.
• மழையால் பாதிக்கப்ட்ட ஏராளமான மக்கள் அரசு பெண்கள் பள்ளி மற்றும் கனகசபை வீட்டிலும் தங்க வைக்கப்பட்டுள்ளனர்.
• மழையால் பாதிக்கப்பட்ட சுமார் 3000 பேருக்கு ஜமாஅத் சார்பில் இன்று உணவு வழங்கப்பட்டது.
• தனிப்பட்ட முறையிலும் சிலர் பால் மற்றும் இதர பொருட்கள் தந்து நிவாரண உதவி செய்து வருகின்றனர்.
• புயல் இன்று காரைக்கால் அருகே கரையை கடந்துவிட்ட நிலையிலும் மழை விட்டு விட்டு தொடர்கிறது.

தில்லி சாஹிப் தர்கா இரண்டாம் பாகம்

நேற்றைய பதிவு நம்மில் சலனங்களை ஏற்படுத்தி இருந்தாலும் இல்லாமல் போனாலும் மழை அதன் பணியை செய்ய, மிகப்பெரும் திண்டாட்டமாகி போய்விட்டது அந்த குடியிருப்பு மக்களுக்கு.. பயந்தது போன்றே கிட்டத்தட்ட முழு குடியிருப்பும் மூழ்கிபோய் விட்டது என்றே சொல்லலாம். ஷாதி மஹாலுக்கு பின்புறமுள்ள கோட்டாறு தற்போது மனை பிரிவு போட்டு விற்கப்பட்டு விட்டதால் அங்கு சமபடுத்தப்பட்ட நிலத்தினால் வேறு வடிகால் இன்றி நீர் முழுதும் இந்த குடியிருப்பு நோக்கி பாய,... ஒரு வழியாக முத்துராஜா அவர்களின் முன்முயற்சியால் வாலிபர்கள் இணைந்து மணலை வெட்டி ஒழுங்கு படுத்தினார்கள். அங்கு வந்த மக்தூம் நானா அவர்கள் களத்தில் இறங்கி நீண்ட நேரம் நின்று வேலை வாங்கினார்கள். ஜமாஅத் தலைவர் முஹம்மது யூனுஸ் அவர்கள் நிலைமையை நேரில் வந்திருந்து பார்வையிட்டார். தொகுதி எம் எல் ஏ ஊரில் இருந்தும் வரவில்லை. அங்கிருந்த வாலிபர்களின் உடனடி நிதி திரட்டலில் நவாப்ஜான் நானா, (ஐநூறு) சுமையா ஹாஜா பக்ருதீன் நானா (ஐநூறு), மக்தூம் நானா (ஐநூறு), மற்றும் அய்மன் (இரநூற்றி ஐம்பது) கிடைத்தது. அதை கொண்டு ஒவ்வொரு வீட்டிற்கும் அரை லிட்டர் பால் வாங்கி கொடுக்கப்பட்டது. ஏற்கனவே ஜமாஅத், குடியிருப்புவாசிகளில் சிலரை ஷாதி மஹாலில் குடியேற்றியும், தவ்ஹீத் நானா அவர்களின் முன்முயற்சியால் இரவு உணவு (பரோட்டா) ஏற்பாடு செய்யபட்டும் இருந்தது. ஏழைகளும் இந்த மழைக்காலத்தை நல்லபடியாக கழித்திட துஆ செய்வோம்.