பரங்கிப்பேட்டை அருகே கிராமத்தை விட்டு ஒதுக்கி வைத்ததாக மனித உரிமை ஆணையத்திடம் மீனவர் புகார் கூறியுள்ளார்.
கடலூர் மாவட்டம் பரங்கிப்பேட்டை சி. புதுப்பேட்டை சின்னூர் தெற்கு தெருவை சேர்ந்தவர் வீரப்பசெட்டி.
இவரது மகன் ஆறுமுகம்.
இவர் மாநில மனித உரிமை ஆணையத்திடம் புகார் மனு அனுப்பி உள்ளார்.
அதில் அவர் கூறியிருப்பதாவது:-
எனக்கும், அதே ஊரை சேர்ந்த ஒரு பெண்ணுக்கும் பிரச்சினை ஏற்பட்டது.
இது குறித்து அந்த பெண் பரங்கிப்பேட்டை போலீசில் புகார் செய்தார்.
இதற்கிடையில் கிராம முக்கியஸ்தர்கள் பேசி சமாதானம் செய்தனர்.
அதையடுத்து நான் மீன்பிடிக்க சென்று விட்டேன்.
அதை தொடர்ந்து போலீசார் நடத்திய விசாரணை சரியில்லை என்று கிராம பஞ்சாயத்தார் என்னை மீண்டும் விசாரணைக்காக அழைத்தனர்.
அப்போது நான் தொழிலுக்கு சென்றதால் கால தாமதம் ஆகிவிட்டது.
அதன் பிறகு நாங்கள் கூப்பிட்டு நீ வரவில்லை என்று எனது ஊரில் எனக்கு
சாதிக் கட்டுப்பாடு செய்து விட்டார்கள்.
அன்று முதல் குடி தண்ணீர் கூட பிடிக்க முடியவில்லை.
எனது குடும்பத்தாருக்கும், எனக்கும் மன உளைச்சல் ஏற்பட்டுள்ளது.
எனது பேரக்குழந்தைகள் பள்ளிக்கு சென்றால் அங்கேயும், பேச மறுக்கின்றனர்.
ஊரில் நல்லது, கெட்டது நிகழ்ச்சிகளில் கலந்து கொள்ள முடியவில்லை.
இது பற்றி பரங்கிப்பேட்டை போலீசில் புகார் செய்தேன்.
ஆனால் அவர்கள் போலீஸ் நிலையம் வரவில்லை.
ஆகவே எனது குடும்பத்தின் மீதும் கருணை கொண்டு எனது இயல்பு நிலையை திரும்ப பெற்றுத் தருமாறு கேட்டுக் கொள்கிறேன்.
இவ்வாறு அந்த மனுவில் கூறியுள்ளார்.
Source: தினத்தந்தி
