ஓவிய போட்டி - எக்ஸ்ட்ரா பிட்

கிரசன்ட் நல்வாழ்வு சங்கம் நடத்திய ஓவிய போட்டி பற்றி....

பரங்கிபேட்டையில் தீண்டத்தகாத போட்டி போன்று கருதப்பட்ட ஓவியபோட்டிகளை காபத்துல்லாஹ் எனும் தலைப்பில் சில ஆண்டுகளுக்கு முன் கல்வி குழு துவக்கி வைத்தது.

அருமையான ஒரு தலைப்பினை எடுத்துக்கொண்டு சிறந்த முறையில் திட்டமிட்டு professional ஆக நடத்தி காண்பித்த கிரசன்ட் நல்வாழ்வு சங்கம் நிச்சயம் பாராட்டுக்குரியது.

நாக்கை துருத்திக்கொண்டு, வித்தியாசமான யோகாசன போஸ்களில் எல்லாம் குனிந்து படுத்து கஷ்ட்டப்பட்டு வரைந்த பிள்ளைகள் அடுத்த பாராட்டுக்குரியவர்கள். 

கிட்டத்தட்ட நான்கு மணி நேரம் கொடுக்கப்பட்ட tea, பிஸ்கட்களை வைத்து கொண்டு தங்கள் பிள்ளைகளின் திறமையை நுணுக்கமான முறையில் அங்கீகரித்த பெற்றோர்கள் அடுத்த பாராட்டுக்குரியவர்கள். 

எது எப்படியாயினும், பிரயோஜன அளவிலும், கான்செப்ட் அளவிலும், மாணவர்களை சரியான முறையில் ஊக்கப்படுத்திய அளவிலும், காலத்திற்கேற்ற விஷயத்தை முன்னெடுத்த அளவிலும் இன்னும் பல மட்டங்களிலும் கிரசன்ட் நல்வாழ்வு சங்கம் நடத்திய இந்த நிகழ்ச்சி அதன் சமீப கால வரலாற்றில் ஒரு சிறந்த முத்திரையாகவே கணிக்கப்படும் என்பது உண்மை. இது போன்ற பயனுள்ள நிகழ்ச்சிகளை கிரசன்ட் நல்வாழ்வு சங்கம் அடிக்கடி வழங்கும், வழங்க வேண்டும் என்று வலைப்பூ சார்பில் வாழ்த்துகிறோம். இந்த நிகழ்ச்சியின் கோர் கான்செப்ட் (Core Concept) வழங்கிய (சிங்கப்பூர் சகோதரர் தாரிக் என்று கேள்விபடுகிறோம்) சகோதரருக்கு வாழ்த்துக்கள்.

சொல்லாமல் சொல்லியது ஜமாத் சோறு

சமூக ஒற்றுமைக்கு சிறப்பான உதாரணங்களுள் நமது பரங்கிப்பேட்டையும் ஒன்று. சகோதர மதத்தவர்/இனத்தவர்களுடனான வெளிப்புறத்து ஒற்றுமைகள் மட்டுமின்றி, ஒரே இன/மதத்தவர்களுள் நிலவும் உள்ஒற்றுமையும் கருத்தொருமிப்பும் யாரையும் 'மாஷா அல்லாஹ்' என்று சொல்லவைக்கும்.

கடந்த டிசம்பர் 18ம்தேதி நடந்த ஊர் ஜமாஅத் பொதுக்குழுவில் கருத்துவேறுபாடு கொண்டிருந்த ஒருசில சகோதரர்களும் இந்த ஒற்றுமை நீரோட்டத்தில் இரண்டற ஒன்றாகக் கலந்து மனம் விட்டுப் பேசியது நெகிழ்ச்சியான உணர்ச்சிப் பெருக்கை ஒவ்வொரு உள்ளத்திலும் ஏற்படுத்தியது.

இந்த ஒற்றுமையை வசப்படுத்தித் தந்த இறைவனுக்கு நன்றி தெரிவித்தபடியும், இந்நிலை இனிவரும் நாள்களிலும் தொடர்ந்திடப் பிரார்த்தித்தபடியும்.....

"ஷாதி மஹாலில் " ஊர் ஜமாத் சார்பாக மெகா விருந்து நடைப்பெற்றது இதில்

பரங்கிப்பேட்டையைச் சார்ந்த அனைத்து முஸ்லிம் குடும்பங்களுக்கும் குடும்பத்தலைவரின் பெயரில் அழைப்பிதழ் அனுப்பிவைக்கப்பட்டது.

இந்த மெகா விருந்து நிகழ்ச்சியில் பெருவாரியான ஆண்கள் மகிழ்ச்சியுடன் கலந்துக்கொண்டனர்

இந்த விருந்து அழைப்பிதழ் கடலூர் மாவட்டத்தில் உள்ள அனைத்து முஸ்லிம் ஜமாஅத்துகளுக்கும் அனுப்பிவைக்கப்பட்டதாகவும் நிகழ்ச்சியில் தெரியவந்தது.

பார்ப்பதற்க்கு கண் கொள்ளாகாட்சியாக இருந்த இந்த சந்தோஷ விழா அழைப்பிதழில் போட்டிருந்தபடி சரியாக 11மணியளவில் ஆரம்பமாகியது.

உற்றார்-உறவினர்கள்,நண்பர்கள் அனைவரும் உற்சாகமாய் கலந்துக்கொண்டு களப்பணியாற்றியது , நம்மை யாரும் இனி பிரிக்கமுடியாது என்பதைச் சொல்லாமல் சொல்லியது

விருந்து நடைபெற்ற நேரத்தில் "எங்கே தால்ச்சா? எங்கே மறுசோறு? அங்கே ஒரு சஹன் வையுங்க! போன்ற சந்தோஷ குரல்கள் ஷாதிமஹால் எங்கும் எதிரொலித்துக்கொண்டே இருந்தது.

இந்த விழாவில் மத நல்லிணக்கத்தை பேணும் விதமாக மாற்று மத சகோதரர்களும் கலந்துகொண்டார்கள் .

ஓட்டு இல்லை!

எதிர் வரும் ஜமாஅத் தேர்தலில் வெளிநாட்டுவாழ் பரங்கிப்பேட்டை மக்கள் ஆன்லைன் வழியாக ஓட்டு போடும் தீர்மானம் நிறைவேற்றப்ட்டிருந்ததாக ஏற்கனவே தகவல் வெளியான நிலையில், தற்போது NRIகளுக்கு ஓட்டு இல்லை என்கிற செய்தி கசிந்துள்ளதால் இவர்களிடைளே சிறிது சலசலப்பு ஏற்பட்டுள்ளது.  

இந்நிலையில், தேர்தல் குழுவை தொடர்பு கொண்டு கேட்டபோது, "சில நாட்கள் முன்பு வரை அப்படித்தான் (ஆன்லைன் ஓட்டு) இருந்தது. ஆனால் சற்று உள்ளார்ந்து பார்த்ததில் இது இந்திய அரசியல் சட்டத்தில் பொருந்தவில்லை(?) எனவே, NRI களுக்கு வாக்களிக்கும் உரிமை கொடுக்க இயலவில்லை" என்று கூறினர்.

இந்த ஆன்லைன் ஓட்டு மூலம் முழுமையாக ஓட்டுகள் கிடைத்திராவிட்டாலும், ஒரு குறிப்பிட்ட சதவீதத்தினர் நிச்சயமாக இந்த வாக்கெடுப்பில் பங்கு கொள்வார்கள் என்று எதிர்பார்க்கப்பட்ட நிலையில், தேர்தல் குழுவின் இம்முடிவு ஏமாற்றமே அளிக்கிறது.

விழிப்புணர்வு ஓவியப்போட்டி

புவி வெப்பமாதல் குறித்து விழிப்புணர்வு ஓவியப்போட்டி ஒன்றை வெற்றிகரமாக நடத்தியுள்ளது கிரசண்ட் நல்வாழ்வுச் சங்கம். நேற்று காலை பரங்கிப்பேட்டை ஷாதி மஹாலில் நடைபெற்ற இப்போட்டியில் அனைத்துப் பள்ளி மாணவ-மாணவியர் பங்குப் பெற்றனர். இப்போட்டியில் கலந்துக் கொண்ட மாணவ-மாணவியருக்கு பரிசுகள் வழங்கப்பட்டது.

இரு பிரிவாக நடந்த இப்போட்டியில் முதற்பிரிவில் அரசு ஆண்கள் பள்ளியைச் சார்ந்த மாணவன் ஸ்ரீதரும், இரண்டாவது பிரிவில் கலிமா மெட்ரிக் பள்ளியைச் சார்ந்த மாணவி ஃபாத்திமாவும் முதல் இடத்தை பிடித்தனர்.

இப்போட்டியை பரங்கிப்பேட்டை இஸ்லாமியச் சங்கம் (ரியாத்) நிர்வாகி செய்யது முஸஸ்தபா தலைமையில், பேரூராட்சி மற்றும் ஜமாஅத் தலைவர் முஹமது யூனுஸ் துவங்கிவைத்தார். இதில் சிறப்பு விருந்தினராக அண்ணாமலை பல்கலைகழகத்தின் கடல்வாழ் ஆராய்ச்சிப் பிரிவைச் சார்ந்த டாக்டர் ராஃபி கலந்துக் கொண்டார். CWO தலைவர் இர்பான் நன்றியுரை வழங்கினார்.

image courtesy: CWO blog