இஸ்லாமிய சமூக மக்கள் கல்வியில் அதிக கவனம் செலுத்தி இடஒதுக்கீட்டை பயன்படுத்திக் கொள்ள வேண்டும் என தமிழக மக்கள் நல்வாழ்வுத் துறை அமைச்சர் எம்.ஆர்.கே. பன்னீர்செல்வம் தெரிவித்தார்.
சிதம்பரத்தை அடுத்த பரங்கிப்பேட்டையில் இஸ்லாமிய ஐக்கிய ஜமாஅத், இஸ்லாமிய சமூக நல்வாழ்வு சங்கம் சார்பில் 1200 மாணவ, மாணவியர்களுக்கு இலவச சீருடை மற்றும் நோட்டு, புத்தகங்கள் வழங்கும் விழா மற்றும் அரசு பொதுத் தேர்வில் சாதனை படைத்த மாணவர்களுக்கு பதக்கங்கள் வழங்கும் விழா சனிக்கிழமை நடைபெற்றது.
விழாவில் அமைச்சர் எம்.ஆர்.கே. பன்னீர்செல்வம் பங்கேற்று பத்தாம் வகுப்பு மற்றும் பிளஸ்-2 தேர்வில் சாதனை படைத்த மாணவ, மாணவியர்களுக்கு தங்கம் மற்றும் வெள்ளிப் பதக்கங்களையும், மாணவ, மாணவியர்களுக்கு இலவச நோட்டுப் புத்தகங்களையும் வழங்கினார்.
விழாவில் அவர் பேசியது:
விழாவில் அவர் பேசியது:
நடைபெற்ற மக்களவைத் தேர்தலில் இஸ்லாமிய சகோதர, சகோதரிகள் திமுக கூட்டணிக்குத்தான் வாக்களித்துள்ளார்கள்.
இதற்கு காரணம் கருணாநிதி ஆட்சியின் சாதனை மக்களைச் சென்றடைந்ததுதான்.
இஸ்லாமிய சமுதாயத்தினருக்கு கல்வி மற்றும் வேலைவாய்ப்பில் மூன்றரை சதவீதம் இடஒதுக்கீட்டை கருணாநிதி வழங்கியுள்ளார்.
ஆனால், இஸ்லாமிய சமுதாயத்தினர் கல்வியில் அதிக கவனம் செலுத்துவதில்லை.
எனவே அவர்கள் அதிக கவனம் செலுத்தி இடஒதுக்கீட்டை பயன்படுத்திக் கொள்ள வேண்டும்.
2004 ஆண்டு சுனாமி ஏற்பட்ட போது இப்பகுதியில் இஸ்லாமிய ஐக்கிய ஜமாஅத் நிர்வாகிகள் சாதி, மத பேதமின்றி பாதிக்கப்பட்ட மக்களை மசூதியில் தங்க வைத்து உணவு அளித்து நிவாரண உதவிகளை வழங்கியது பாராட்டுக்குரியதாகும்.
கிராமமாக இருந்த பரங்கிப்பேட்டை திமுக அரசின் திட்டங்களால் நகரமாக ஜொலிக்கிறது என அமைச்சர் தெரிவித்தார்.
மூத்த மருத்துவர் டாக்டர் எஸ்.சேஷாத்திரிக்கு வாழ்நாள் சாதனையாளர் விருதையும், மாநில அளவில் பதக்கம் பெற்ற குத்துச்சண்டை வீரர் ஹெச். ஹமீது கவுஸிற்கு விருதையும் அமைச்சர் எம்.ஆர்.கே. பன்னீர்
செல்வம் வழங்கி கெளரவித்தார்.
பேரூராட்சி தலைவரும், ஐக்கிய ஐமாஅத் தலைவருமான எம்.எஸ். முஹமது யூனுஸ் தலைமை வகித்தார்.
பேராசிரியர் ஏ. சித்திக் அலி பாகவி முன்னிலை வகித்தார்.
ஐ. முஹமது இசாம் வரவேற்றார்.
பரங்கிப்பேட்டை ஒன்றியத் தலைவர் முத்து பெருமாள், அண்ணாமலைப் பல்கலை. கடல்வாழ் உயிரின உயராய்வு மைய பேராசிரியர் கே. கதிரேசன் ஆகியோர் வாழ்த்துரையாற்றினர்.
எல். ஹமீதுமரைக்காயர் நன்றி கூறினார்.
Source: தினமணி
மேலதிக செய்திகளுக்கும், புகைப்படங்களுக்கும்.... www.mypno.com
