பரங்கிப்பேட்டையில் 8ம் வகுப்பு வரை உள்ள அரசு பள்ளியில் இரு ஆசிரியர்கள் மட்டுமே பாடம் நடத்தும் அவலம்!

பரங்கிப்பேட்டை:

பரங்கிப்பேட்டை அருகே ஊராட்சி ஒன்றிய நடுநிலைப் பள்ளியில் இரண்டு ஆசிரியர்களே மாணவர்களுக்கு பாடம் நடத்தும் அவல நிலை ஏற்பட்டுள்ளது.

பரங்கிப்பேட்டை அடுத்த அரியகோஷ்டி கிராமத்தில் ஊராட்சி ஒன்றிய நடுநிலைப்பள்ளி உள்ளது.

152 மாணவிகளும், 143 மாணவர்களும் படித்து வருகின்றனர்.

இந்த ஆண்டு பள்ளி துவங்கிய நாளில் இருந்து முதல் வகுப்பு முதல் எட்டாம் வகுப்பு வரை படிக்கும் மாணவர்களுக்கு இரண்டு ஆசிரியர்களே பாடம் நடத்தி வருகின்றனர்.

பள்ளியில் எட்டு ஆசிரியர்களுக்கு பணியிடம் இருந்தும் கடந்த ஆண்டு ஐந்து ஆசிரியர்கள் பணியில் இருந்தனர்.

முக்கிய பாடங்களுக்கு ஆசிரியர்கள் இருந்ததால் மாணவர்களுக்கு எந்த பிரச்னையும் இன்றி அனைத்து பாடங்களும் நடத்தி முடிக்கப்பட்டது.

தற்போது இரண்டு ஆசிரியர்களே உள்ளதால் மாணவர்களுக்கு பாடம் நடத்துவதைவிட மாணவர்களை கவனிக்கவே முடியாத நிலை உள்ளது.

இங்கிருந்த மூன்று ஆசிரியர்கள் இட மாற்றல் வாங்கி கொண்டு சென்றுவிட்டனர்.

அவர்களுக்கு பதிலாக இதுவரை புதிய ஆசிரியர்கள் நியமிக்கப்படவில்லை.

இங்கு மண்டபம், கொய்யாத்தோப்பு, குத்தாப்பாளையம், அரியகோஷ்டி சாலை ஆகிய பகுதியில் இருந்து ஏழை, எளிய மாணவர்கள் அதிகளவில் படிக்க வருகின்றனர்.

இது குறித்து அந்த பகுதியை சேர்ந்த அரசியல் கட்சி பிரமுகர்கள், சமூக ஆர்வலர்கள் கல்வித்துறை அதிகாரிகளுக்கு தகவல் தெரிவித்தும் இதுவரை நடவடிக்கை இல்லை என புலம்புகின்றனர்.

கல்வித் துறை அதிகாரிகள் நடவடிக்கை எடுக்க வேண்டும் என பெற்றோர்கள் கோரிக்கை விடுத்துள்ளனர்.

Source: தினமலர்