பரங்கிப்பேட்டையில் அனுமதியின்றி பிரசாரம் செய்த டாடா சுமோ கார் பறிமுதல்

பரங்கிப்பேட்டை தேர்தல் அதிகாரி அனுமதியின்றி விடுதலைச் சிறுத்தைகள் கட்சி வேட்பாளருக்கு பிரசாரம் செய்த இருவர் மீது போலீசார் வழக்குப் பதிந்தனர்.

பிரசாரத்திற்கு பயன்படுத்திய டாடா சுமோ கார் பறிமுதல் செய்யப்பட்டது.

சிதம்பரம் லோக்சபா தொகுதி பரங்கிப்பேட்டை பகுதியில் விடுதலைச் சிறுத்தைகள் கட்சி வேட்பாளர் திருமாவளவனை ஆதரித்து மறுமலர்ச்சி முஸ்லிம் லீக் கட்சி சார்பில் டாடா சுமோ காரில் மைக் மூலம் பிரசாரம் செய்யப்பட்டது.

பரங்கிப்பேட்டை போலீசார் டாடா சுமோ காரை நிறுத்தி விசாரித்தபோது தேர்தல் அலுவலர் அனுமதியின்றி பிரசாரம் செய்வது தெரிய வந்தது.

அதையடுத்து மறுமலர்ச்சி முஸ்லிம் லீக் கட்சியின் மாநில பொதுச்செயலாளர் சலீம்முதீன் (45), சுமோ டிரைவர் சதீஷ் (25) இருவர் மீதும் போலீசார் வழக்குப் பதிந்து, பிரசாரத்திற்கு பயன்படுத்திய டாடா சுமோ காரை பறிமுதல் செய்தனர்.

கோடை கால சிறப்பு ரோலர் ஸ்கேட்டிங் பயிற்சிக்கு மாணவர்கள் சேர்க்கை

கடலூர் மாவட்டத்தில் கோடை கால சிறப்பு ரோலர் ஸ்கேட்டிங் பயிற்சிக்கு மாணவர்கள் சேர்க்கை வரும் 29ம் தேதி நடக்கிறது.

கடலூர் மாவட்ட ரோலர் ஸ்கேட்டிங் சங்கத்தின் கூட்டம் நடந்தது.

சங்கத் தலைவர் ராமலிங்கம், செயலாளர் சந்திரமோகன் பவுள் ராஜ், பொருளாளர் சங்கர நாராயணன்,மாவட்ட விளையாட்டு அலுவலர் பத்மநாபன், ஒருங்கிணைப்பாளர் கார்த்திகேயன், துணைத் தலைவர் கருணாகரன், பயிற்சியாளர் அமரேளதர் குமார் பிரிச்சா பங்கேற்றனர்.

• கூட்டத்தில் கடலூர் மாவட்டத்தில் முறையாக ரோலர் ஸ்கேட்டிங் பயிற்சி வகுப்பு துவங்க முடிவு செய்யப்பட்டது.

• இதில் 3 வயதிற்கு மேற்பட்ட மாணவ, மாணவிகள் சேர்க்கப்படுவர்.

• பயிற்சிக்கான சேர்க்கை வரும் 29ம் தேதி முதல் கடலூர் அண்ணா விளையாட்டு அரங்கில் நடக்கிறது.

• ஸ்கேட்டிங் விளையாட்டினை பள்ளிகளில் அறிமுகப்படுத்தவும் தீர்மானிக்கப்பட்டது.

Source: தினமலர்

விளையாட்டு பள்ளி, விடுதிகளில் சேர கடலூரில் 28ம் தேதி உடல்திறன் தேர்வு

அரசு சார்பிலான விளையாட்டு விடுதிகள் மற்றும் விளையாட்டு பள்ளிகளில் சேர்க்கைக்கான மாணவ, மாணவிகள் உடல் திறன் தேர்வு அண்ணா விளையாட்டரங்கில் வரும் 28ம் தேதி நடக்கிறது.

கடலூர் மாவட்டத்தில் 13 ஒன்றியத்திற்கான வீரர்கள் உடல் திறன் தேர்வு நடக்கிறது. வரும் 28ம் தேதி கடலூர் ஒன்றிய அளவில் வீர்கள் தேர்வு அண்ணா விளையாட்டரங்கில் காலை 8 மணிக்கு நடக்கிறது.

அண்ணாகிராமம் ஒன்றியத்திற்கு புதுப்பேட்டை அரசு மேல்நிலைப் பள்ளியிலும், பண்ருட்டி ஒன்றியத்திற்கு பண்ருட்டி அரசு மேல்நிலை பள்ளியிலும் வீரர்கள் தேர்வு நடக்கிறது.

அதே போல் 29ம் தேதி பரங்கிப்பேட்டை ஒன்றியத்தில் பி.முட்லூர் அரசு ஆண்கள் மேல்நிலை பள்ளியிலும், புவனகிரி ஒன்றியத்தில் புவனகிரி அரசு ஆண்கள் மேல்நிலைப் பள்ளியிலும், கீரப்பாளையம் ஒன்றியத் திற்கு சிதம்பரம் நந்தனார் அரசு ஆண்கள் ஆதிதிராவிடர் மேல் நிலை பள்ளியிலும் நடக்கிறது.

வரும் 30ம் தேதி நல்லூர் ஒன்றியத்தில் எறையூர் அருணா மேல்நிலைப் பள்ளியிலும், மங்களூர் ஒன்றியத்தில் திட்டக்குடி அரசு ஆண்கள் மேல்நிலைப் பள்ளியிலும், கம்மாபுரம் ஒன்றியத்திற்கு மந்தாரக்குப்பம் என்.எல்.சி., மேல்நிலைப் பள்ளியிலும் வீரர்கள் தேர்வு நடக்கிறது.

மே 1ம் தேதி விருத்தாசலம் ஒன்றியத்தில் விருத்தாசலம் அரசு ஆண்கள் மேல்நிலைப் பள்ளியிலும், குறிஞ்சிப்பாடி ஒன்றியத்தில் குறிஞ்சிப்பாடி எஸ்.கே.வி., மேல்நிலைப் பள்ளியிலும், 2ம் தேதி குமராட்சி ஒன்றியத்தில் லால்பேட்டை அரசு மேல்நிலைப் பள்ளியிலும், காட்டுமன்னார்கோவில் ஒன்றியத்தில் காட்டுமன்னார்கோவில் அரசு ஆண்கள் மேல்நிலைப் பள்ளியிலும் நடக்கிறது.

ஒருவர் இரண்டு விளையாட்டில் சேர இரண்டு விண்ணப்பங்கள் அனுப்ப வேண்டும்.

ஊராட்சி ஒன்றிய அளவு, மண்டல அளவு, மாநில அளவு என மூன்று கட்டமாக தேர்வு நடக்கிறது.

உயரமானவர்களுக்கு முன்னுரிமை அளிக்கப்படும்.

7, 8, 9, 11 வகுப்பு மாணவ, மாணவிகள் மட்டுமே விண்ணப்பிக்க வேண்டும்.

இதற்கான விண்ணப்பங்கள் மாவட்ட விளையாட்டு அலுவலகத்திலும், உடல் திறன் தேர்வு நடக்கும் அந்தந்த பள்ளிகளிலும் கிடைக்கும்.

Source: தினமலர்