பரங்கிப்பேட்டை: பல்வேறு பரபரப்புகளுக்கிடையே சூடு பிடித்து வரும் பரங்கிப்பேட்டை ஜமாஅத் தலைவர் தேர்தல், அறவித்தப்படி நடக்குமா என்கிற பேச்சுகளுக்கிடையில், வேட்பாளாராக களம் காண உள்ள பரங்கிப்பேட்டை பேரூராட்சித் தலைவர் தனது ஆதரவாளர்களுடன் தேர்தல் அலுவலகத்திற்கு வந்து வேட்புமனு பெற்றுச் சென்றார். அப்போது, தேர்தல் குழுவினரிடம் பேசிய அவர், "ஊர் நலனுக்காகவும், சமுதாய நலனுக்காகவும் தேர்தல் குழு எடுக்கும் அனைத்து முடிவுகளுக்கும் ஒத்துழைப்பு தருவேன்" உறுதியளித்தார்.
அப்போது, MYPNO-விடம் எம்.எஸ்.முஹம்மது யூனுஸ் கூறுகையில், "தேர்தலை தவிர்த்து தேர்வுக் குழு முறையில் தலைவரை தேர்ந்தெடுக்க சிலர் முயற்சித்து வருகிறார்கள். ஊர் நலனைக் கருத்தில் கொண்டு நான் எல்லா வகையிலும் அதற்கு ஒத்துழைப்பு தர தயாரக உள்ளேன். தற்போதைய தலைவர் தேர்தல் குழுவினரை நியமித்துள்ளதால், சமுதாய நலனுக்காக அவர்கள் எடுக்கும் முடிவுக்கும் ஒத்துழைப்பு தருவேன். அதே வேளையில் தேர்தல் முறை உறுதியாகிவிட்டால் நாளை மாலை 3.30 மணியளவில் எனது ஆதரவாளர்களுடன் வேட்புமனு தாக்கல் செய்வேன்" எனக் கூறினார்.
இந்த சந்திப்பின்போது, தேர்தல் குழுவின் ஆலோசகர்களான ஆர்.ஹபிபுர் ரஹ்மான், எஸ்.ஏ. ரியாஸ் அஹமது, செய்யது சாகுல் ஹமீது, ஹமீது மரைக்காயர் ஆகியோர் உடனிருந்தனர்.
