கலை, அறிவியல் கல்லூரிகளில் வித்தியாசமான படிப்புகள்

கலை மற்றும் அறிவியல் கல்லூரிகளில் பி.ஏ., வரலாறு, பி.எஸ்சி., கணிதம் உள்ளிட்ட பலரது கவனத்தைக் கவர்ந்த பட்டப்படிப்புகள் மட்டுமின்றி, மாணவர்களின் தற்போதைய தேவைக்கு ஏற்ப பல புதிய படிப்புகளும் வழங்கப்படுகின்றன.

கலை மற்றும் அறிவியல் கல்லூரிகள் என்றவுடன் அனைவரது ஞாபகத்திற்கும் வருவது பி.காம்., பி.ஏ., பி.எஸ்சி., படிப்புகள்தான்.

பி.காமில் பொது, விளம்பரம், விற்பனை மேலாண்மை, வங்கி மேலாண்மை, கார்ப்பரேட் செகரெட்டரிஷிப் என பல பிரிவுகள் உள்ளன.

பி.ஏ., படிப்பில் ஆங்கில மொழித் தொடர்புத் திறன், வர்த்தக பொருளாதாரம், பல மொழிக் கல்விப் படிப்புகளும் உள்ளன.

பி.எஸ்சி.,யில் நவீன விலங்கியல், தாவர உயிரியல், மைக்ரோ பயாலஜி உள்ளிட்ட பல பட்டப்படிப்புகள் வழங்கப்படுகின்றன.

தற்போதைய நிலையில், மாணவர்களின் தேவைக்கு ஏற்ப பல கல்லூரிகளில் புதிய வகையான பட்டப்படிப்புகள் வழங்கப்படுகின்றன.

அவற்றில் சில:

• காது கேளாதோருக்கான பி.சி.ஏ., மற்றும் பி.காம்., படிப்பு:

இதற்கு முன், காது கேளாதவர்களுக்கு பிளஸ் 2 வரை மட்டுமே படிக்கும் வாய்ப்புகள் இருந்தன.

2007-08ம் ஆண்டு முதல் சென்னை மாநிலக் கல்லூரி உள்ளிட்ட சில கல்லூரிகளில், காது கேளாதோருக்கென தனி படிப்புகள் வழங்கப்படுகின்றன.

பிளஸ் 2 படிப்பில் தேர்ச்சி பெற்ற காது கேளாதவர்கள், இப்படிப்பில் சேரலாம்.

இந்த இரு படிப்புகளிலும் தலா 15 இடங்கள் உள்ளன.

• பி.ஏ., சுற்றுலா மற்றும் போக்குவரத்து மேலாண்மை:

பிளஸ் 2வில் தேர்ச்சி பெற்ற மாணவர்கள் இப்படிப்பில் சேரலாம்.

இப்படிப்பை முடிக்கும் மாணவர்கள் டிராவல் ஏஜென்சிகள், டூர் ஆபரேட்டர் நிறுவனங்களில் வேலைக்குச் செல்லலாம்.

அரசு சுற்றுலாத் துறையிலும் பணிபுரிய முடியும்.

இதில் மேற்படிப்புகளும் உள்ளன.

• பி.எஸ்சி., நியூட்ரிஷன், புட் சர்வீஸ் மேனேஜ்மென்ட் அண்டு டயடிக்ஸ்:

பிளஸ் 2வில் அறிவியல் பாடப்பிரிவில் படித்த மாணவர்கள் இப்படிப்பில் சேரலாம்.

இப்படிப்பை முடித்த மாணவர்கள் ஹாஸ்பிடல் மேனேஜ்மென்ட் மற்றும் ஹோட்டல் மேனேஜ்மென்ட் துறையில் பணிபுரியலாம்.

நியூட்ரிஷன் சிறப்பு நிபுணராகவும் பணியாற்றலாம்.

• பி.எஸ்சி., ஹோட்டல் அண்டு கேட்டரிங் மேனேஜ்மென்ட்:

பிளஸ் 2வில் தேர்ச்சி பெற்றவர்கள் இப்படிப்பில் சேரலாம்.

இப்படிப்பை முடித்தவர்களுக்கு நம் நாட்டிலும், வெளிநாட்டிலும் நிறைய வேலை வாய்ப்புகள் உள்ளன.

கப்பல், விமானம், ராணுவம், ஹோட்டல் என பல துறைகளில், இப்படிப்பை முடித்தவர்களுக்கு பணி வாய்ப்புகள் உள்ளன.

• பி.எஸ்சி., சாப்ட்வேர் இன்ஜினியரிங் பி.ஐ.எஸ்.எம்., (பேச்சுலர் ஆப் இன்பர்மேஷன் சிஸ்டம் மேனேஜ்மென்ட்):

சாப்ட்வேர் பொறியியல் படிப்பிற்கு இணையாக கலை, அறிவியல் கல்லூரிகளில் இப்படிப்பு வழங்கப்படுகிறது.

பிளஸ் 2வில் இயற்பியல், வேதியியல், கணிதம் படித்தவர்கள் இப்படிப்பில் சேரலாம்.

இப்படிப்பை முடித்தவர்கள், சாப்ட்வேர் நிறுவனங்களில் பணிபுரியலாம்.

• பி.எஸ்சி., இன்பர்மேஷன் சிஸ்டம் மேனேஜ்மென்ட்:

பிளஸ் 2வில் அறிவியல் மற்றும் கணிதம் அல்லது அக்கவுன்ட்ஸ் மற்றும் கணிதம் ஆகிய பாடங்களை படித்தவர்கள் இப்படிப்பில் சேரலாம்.

இதில் கம்ப்யூட்டர் சயின்ஸ் மற்றும் மேலாண்மை ஆகிய இரண்டும் இடம்பெற்றுள்ளன.

எனவே, இப்படிப்பை முடித்தவர்கள் இரு துறைகளிலும் பணிபுரிய முடியும்.

• பி.எஸ்சி., இன்டீரியர் டிசைன் அண்டு டெகரேஷன்:

பிளஸ் 2 தேர்ச்சியுடன், படம் வரையத் தெரிந்தவர்கள் மற்றும் கற்பனை வளம் மிக்கவர்கள் இப்படிப்பில் சேரலாம்.

இதை முடிக்கும் மாணவர்கள், இன்டீரியர் டிசைனராக பணிபுரிய முடியும்.

மேலும், ஜவுளித் துறையிலும் டிசைன் வடிவமைப்பாளராக பணியாற்றலாம்.

• பி.ஏ., லேபர் மேனேஜ்மென்ட்:

பிளஸ் 2வில் தேர்ச்சி பெற்றவர்கள் இப்படிப்பில் சேரலாம்.

இப்படிப்பை முடித்தவர்கள், நிறுவனங்கள் மற்றும் தொழிற்சாலைகளில் மனிதவள மேம்பாட்டுத் துறையில் பணிபுரியலாம்.

மேலும் அரசாங்கத்தில் பணியாளர் துறையிலும் பணிபுரிய முடியும்.

Source: தினமலர்