பெரியமதகு சுங்க வசூல்: உள்ளூர் வாகனங்களுக்கு இனி வசூல் கிடையாது..?

பரங்கிப்பேட்டை: நீண்ட காலமாக நீடித்து வரும் பெரியமதகு பாலத்தின் சுங்க வசூலை தடுத்த நிறுத்தவேண்டும் என்று பல்வேறு தரப்பினரிடமிருந்து கோரிக்கைகள் அடிக்கடி முன்வைக்கப்படும் நிலையில், நேற்று பெரியதெருமுனை ஆட்டோ மற்றும் கார் ஓட்டுநர் சங்கம் சார்பில் பரங்கிப்பேட்டை சேர்மேன் அசோகனிடம் கோரிக்கை மனுவை அளித்து பெரியமதகு பால சுங்க வசூலை தடுத்த நிறுத்துமாறு கேட்டுக் கொண்டனர்.

அப்போது மனு அளித்த ஓட்டுநர் சங்க நிர்வாகிகளிடம் பேசிய அசோகன் கூறியதாவது: "இது குறித்து பலதரப்பட்ட கோரிக்கைகள் தொடர்ந்து வந்துக் கொண்டுதான் இருக்கிறது. தங்களின் மனுவை பரிசீலனைக்கு எடுத்துக் கொள்கிறேன். ஆனால் அரசுத் தரப்பில் எப்போது இதற்கான டென்டர் நிறுத்தப்படுகிறதோ அப்போதுதான் இது முடிவுக்கு வரும்" என்றார். இதனை தொடர்ந்து பேசிய ஓட்டுநர் சங்க நிர்வாகிகள், "அப்படியென்றால் குறைந்தபட்சமாக உள்ளூர் வாகனங்களுக்கு மட்டும் இதனை நிறுத்த நடவடிக்கை எடுங்கள்" என்று கோரினர். அதற்கு பதிலளித்த சேர்மன், "அப்படியென்றால், அதனை குறிப்பிட்டு தனியாக ஒரு மனு எழுதிக் கொடுங்கள்" என்று கூறியதை அடுத்து உள்ளூர் வாகனங்களுக்கு சுங்க வசூலை தடுத்த நிறுத்த கோரி மனுவை ஓட்டுநர் சங்கம் சார்பில் அளித்தனர்.

இதனால்,  உள்ளூர் வாகனங்களுக்கு பெரியமதகு பாலத்தின் சுங்க வசூல் விரைவில் நிறுத்தப்படும் என்று ஓட்டுநர்சங்கத்தினர் நம்பிக்கை தெரிவித்துள்ளனர்.