இன்று முதல் ஏழரைக்கு நெருங்குகிறது மின்வெட்டு.

நேற்று வரை 5 மணி நேரமாக இருந்து வந்த மின்சார நிறுத்தம் இன்று முதல் 6 மணி 30 நிமிடங்கள் (ஆறரை மணிநேரம் - ஏழரைக்கு நெருக்கமாக) என்று கடலூர் மாவட்ட மின்(வெட்டு) வாரியம் அறிவித்துள்ளது.

தமிழ்நாடு மின்சார வாரிய கடலூர் மின் பகிர்மான வட்ட மேற்பார்வை மின் பொறியாளர் சுதர்சன் வெளியிட்டுள்ள செய்தி குறிப்பில் கூறியிருப்பதாவது:- தமிழகத்தில் தற்பொழுது நிலவி வரும் மின் தட்டுப்பாட்டை சமாளிக்கும் வகையில் கடலூர் மின் பகிர்மான வட்டத்துக்கு உட்பட்ட துணை மின் நிலையங்களில் இருந்து தினமும் 5 மணி நேரம் மின்சாரம் நிறுத்தப்பட்டு வந்தது. ஆனால் இன்று (வெள்ளிக்கிழமை) முதல் காலை 6 மணி முதல் மாலை 6 மணிக்குள் 4 மணி நேரமும், மாலை 6 மணி முதல் இரவு 9 மணிக்குள் 1 மணி நேரமும், இரவு 9 மணி முதல் மறுநாள் காலை 6 மணிக்குள் 1 1/2 மணி நேரமும் என தினமும் 6 1/2 மணி நேரம் சுழற்சி முறையில் மின்சாரம் நிறுத்தம் செய்யப்பட உள்ளது.